ଆସନ୍ତା ବର୍ଷରୁ ଗୁରୁକୁଳ ଆଶ୍ରମରେ ଆରମ୍ଭ ହେବ ପାଠପଢା

ପୁରୀରେ ଗୁରୁକୁଳ ଆଶ୍ରମ ନିର୍ମାଣ ପାଇଁ ଶ୍ରୀମନ୍ଦିର ପରିଚାଳନା କମିଟି ବୈଠକ ଅନୁଷ୍ଠିତ । ୨୦୨୪ ଶିକ୍ଷାବର୍ଷରୁ ଆରମ୍ଭ ହେବ ପାଠ୍ୟକ୍ରମ । ଅଧିକ ପଢନ୍ତୁ

ପୁରୀ: ୨୦୨୪ ଶିକ୍ଷାବର୍ଷରୁ ଗୁରୁକୁଳ ଆଶ୍ରମରେ ଆରମ୍ଭ ହେବ ପାଠ୍ୟକ୍ରମ । ସେବାୟତ ପରିବାରର ପିଲାଙ୍କ ପାଠପଢା ପାଇଁ ଆଦର୍ଶ ଗୁରୁକୂଳ ଆଶ୍ରମ ଖୁବଶୀଘ୍ର ନିର୍ମାଣ ହେବାକୁ ଯାଉଛି । ଏଥିପାଇଁ ଚୂଡାନ୍ତ ବ୍ଲୁ ପ୍ରିଣ୍ଟ ପ୍ରସ୍ତୁତି ଶେଷ ହୋଇଥିବା ବେଳେ ଏହି ପରିପ୍ରେକ୍ଷୀରେ ସୋମବାର ଶ୍ରୀମନ୍ଦିର କାର୍ଯ୍ୟାଳୟରେ ପରିଚାଳନା କମିଟିର ଏକ ସ୍ବତନ୍ତ୍ର ବୈଠକ ଅନୁଷ୍ଠିତ ହୋଇଯାଇଛି । ଶ୍ରୀମନ୍ଦିର ମୁଖ୍ୟ ପ୍ରଶାସକ ବୀର ବିକ୍ରମ ଯାଦବ ଓ ପରିଚାଳନା କମିଟିର ସଦସ୍ୟଙ୍କୁ ନେଇ ବୈଠକ ବସିଥିଲା । ଆଦର୍ଶ ଗୁରୁକୁଳ ନିର୍ମାଣ କାର୍ଯ୍ୟ ଯଥାଶୀଘ୍ର ଆରମ୍ଭ କରିବାକୁ ବୈଠକରେ ମତ ପ୍ରକାଶ ପାଇଛି ।

ଏହି ପ୍ରକଳ୍ପ ନେଇ ପୂର୍ବରୁ ବିର୍ଲା ଫାଉଣ୍ଡେସନ ସହ ଏମ୍ଓୟୁ ସ୍ବାକ୍ଷରିତ ହୋଇଥିବା ବେଳେ ୨୦୨୪ ବର୍ଷ ଠାରୁ ଆଶ୍ରମରେ ପାଠ୍ୟକ୍ରମ ଆରମ୍ଭ ହେବା ନେଇ ନିଷ୍ପତ୍ତି ନିଆଯାଇଛି । ଏଥିପାଇଁ ଟେଣ୍ଡର ଡକାଯିବା ପରେ ଭୂମି ପୂଜନ କରାଯାଇ ଗୁରୁକୂଳ ନିର୍ମାଣ କାର୍ଯ୍ୟ ଆରମ୍ଭ ହେବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଗଜପତି ମହାରାଜାଙ୍କ କରକମଳରେ ଏହି ପ୍ରକଳ୍ପର ଭୂମି ପୂଜନ କାର୍ଯ୍ଯ ହେବ । ସମୁଦାୟ ୩୨ ଏକର ଜମିରେ ଏକାଡେମିକ ଭବନ, ଯଜ୍ଞ ସାଳା, ଖେଳ ପଡ଼ିଆ, ହଷ୍ଟେଲ ଆଦି ନିର୍ମାଣ କରାଯିବ । ଶ୍ରୀମନ୍ଦିର କାର୍ଯ୍ୟାଳୟରେ ଅନୁଷ୍ଠିତ ଶ୍ରୀମନ୍ଦିର ପରିଚାଳନା କମିଟିର ସ୍ବତନ୍ତ୍ର ବୈଠକରେ ଏହି ନିଷ୍ପତ୍ତି ନିଆଯାଇଛି ।

ଗଜପତି ମହାରାଜା ଦିବ୍ୟସିଂହ ଦେବଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସ୍ବତନ୍ତ୍ର ବୈଠକରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ବୀର ବିକ୍ରମ ଯାଦବ, ଏସପି ଡ. କନୱର ବିଶାଳ ସିଂ, ଶ୍ରୀମନ୍ଦିର ପରିଚାଳନା କମିଟି ସଦସ୍ୟ, ନୀତି ଓ ଉନ୍ନୟନ ପ୍ରଶାସକ, ବିର୍ଲା ଫାଉଣ୍ଡେସନର ସଦସ୍ୟଙ୍କ ସହ ଅନ୍ୟାନ୍ୟ ଅଧିକାରୀମାନେ ଉପସ୍ଥିତ ଥିଲେ । ଗୁରୁକୁଳ ଆଶ୍ରମ ସଂକ୍ରାନ୍ତରେ ପାୱାର ପଏଣ୍ଟ ମାଧ୍ୟମରେ ଉପସ୍ଥାପନା କରାଯାଇଥିଲା । ତେବେ ଏହି ଆଦର୍ଶ ଗୁରୁକୁଳରେ ମହାପ୍ରଭୁଙ୍କ ନୀତିକନ୍ତି, ପୂଜା ପଦ୍ଧତି ଆଦି ସେବାୟତ ପିଲାଙ୍କୁ ଶିକ୍ଷା ଦିଆଯିବ । ସ୍କୁଲରେ ୫୦ ପ୍ରତିଶତ ସେବାୟତ ଘର ପିଲା ଏବଂ ବାକି ୫୦ ପ୍ରତିଶତ ସବୁ ସାଧାରଣ ପିଲା ପଢ଼ିପାରିବେ ।

ଇଟିଭି ଭାରତ, ପୁରୀ