ପୁରୀ: ଆଜି ଶ୍ରୀକ୍ଷେତ୍ର ଶରଧାବାଲିରେ ତିନି ରଥ ନେଇଛି ଦକ୍ଷିଣ ମୋଡ । ପ୍ରଥମେ ସୁଭଦ୍ରାଙ୍କ ରଥ, ପରେ ବଳଭଦ୍ରଙ୍କ ରଥକୁ ଆଜ୍ଞାମାଳ ବିଜେ ପରେ ଅପରାହ୍ନରେ ଦକ୍ଷିଣ ମୋଡ କରାଯାଇଛି । ତେବେ ଆସନ୍ତାକାଲି ସକାଳେ ଶ୍ରୀଜଗନ୍ନାଥଙ୍କ ରଥକୁ ଦକ୍ଷିଣ ମୋଡ କରାଯିବ ।
ପବିତ୍ର ହେରାପଞ୍ଚମୀ ତିଥି ପରଦିନ ତିନି ରଥ ନିଏ ଦକ୍ଷିଣ ମୋଡ଼ । ମହାଲକ୍ଷ୍ମୀ ଶ୍ରୀଜଗନ୍ନାଥଙ୍କୁ ଶ୍ରୀମନ୍ଦିରକୁ ଫେରିଯିବାକୁ ଅନୁରୋଧ କରିଥିଲେ କିନ୍ତୁ ମହାଲକ୍ଷ୍ମୀଙ୍କ ପ୍ରସ୍ତାବକୁ ପ୍ରଭୁ ଜଗନ୍ନାଥ ଅସ୍ବୀକାର କରିଥିଲେ । ଆଉ ତାପରେ ରାଗରେ ମହାଲକ୍ଷ୍ମୀ ଜଗନ୍ନାଥଙ୍କ ରଥ ନନ୍ଦିଘୋଷର କାଠ ଭାଙ୍ଗି ଦେଇଥିଲେ । ଯାହାଫଳରେ ପରେ ଜଗନ୍ନାଥ ଶ୍ରୀମନ୍ଦିର ବାହୁଡିବାକୁ ଚିନ୍ତା କରି ରଥ ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଥିଲେ ।
ତାପରେ ଆରମ୍ଭ ହୁଏ ମହାପ୍ରଭୁଙ୍କ ବାହୁଡା ଯାତ୍ରା ପ୍ରସ୍ତୁତି । ତିନିରଥଙ୍କୁ ଗୁଣ୍ଡିଚା ମନ୍ଦିର ସିଂହଦ୍ବାରରୁ ଟାଣି ଅପର ଦ୍ବାରକୁ ନିଆଯାଏ, ଯାହାକୁ ନାକଚଣା କୁହାଯାଏ । ଏହି ସମୟରେ ଭକ୍ତ ମାନେ ହରିବୋଲ ପକାଇବା ସହ ସେବକମାନେ ରଥ ଉପରେ ଘଣ୍ଟ,କାହାଳି ବଜାଇ ରଥ ଆଗେଇବାକୁ ଭକ୍ତ ଗଣଙ୍କୁ ଉତ୍ସାହିତ କରିଥାନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
