ପୁରୀ: ସେବାୟତ ଓ ଶ୍ରୀମନ୍ଦିର ପ୍ରଶାସନ ମଧ୍ୟରେ ତୁତୁ ମେମେ। ଯାତ୍ରୀ ସହାୟତା କେନ୍ଦ୍ରକୁ ନେଇ ଘନେଇଲା ଶ୍ରୀମନ୍ଦିରରେ ପ୍ରଶାସନ ଓ ସେବାୟତ ବିବାଦ । କାହିଁ କେତେବର୍ଷରୁ ସେବାୟତ ମାନେ ଯାତ୍ରୀ ମାନଙ୍କୁ ସେବା ପରିଚର୍ଯ୍ୟା କରି ଆସୁଛନ୍ତି । କିନ୍ତୁ ଏବେ ରାଜ୍ୟ ସରକାର ଓ ଶ୍ରୀମନ୍ଦିର ପ୍ରଶାସନ ଏହି ସେବା ଦାୟିତ୍ବ ଏକ ଘରୋଇ ସଂସ୍ଥାକୁ ହସ୍ତାନ୍ତର କରିବାକୁ ନିଷ୍ପତ୍ତି ନେଇଛି। ଯାହାକୁ ନେଇ ସେବାୟତଙ୍କ ମଧ୍ୟରେ ତେଜିଛି ବିବାଦ।
ପୁରୀକୁ ଆସୁଥିବା ଯାତ୍ରୀ ମାନେ ଏବେ ହିନସ୍ତା ହେବେନାହିଁ । ସେମାନଙ୍କୁ ଶ୍ରୀମନ୍ଦିର ସମେତ ଅନ୍ୟ ସ୍ଥାନରେ ବୁଲାଇବା ସହ ପ୍ରତ୍ୟକ ସ୍ଥାନର ମହତ୍ବ ବିଷୟରେ ବୁଝାଇବା ପାଇଁ ଶ୍ରୀମନ୍ଦିର ପ୍ରଶାସନ ତରଫରୁ vfc(visitor facilation centre)ବ୍ୟବସ୍ଥା ଲାଗୁ ହେବାକୁ ଯାଉଛି । ବାହାରୁ ଆସୁଥିବା ଜଗନ୍ନାଥ ପ୍ରେମୀ ଭକ୍ତ ଓ ପର୍ଯ୍ୟଟକ କିଭଳି ଭାବରେ ଶ୍ରୀମନ୍ଦିରରେ ଶୃଙ୍ଖଳିତ ଦର୍ଶନ କରିବା ସହ ଜଗନ୍ନାଥ ସଂସ୍କୃତି ସହ ଜଡିତ ଅନେକ ତଥ୍ୟ ଓ ମହତ୍ବ ଜାଣି ପାରିବେ ସେନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ଏ ପଦକ୍ଷେପ ଗ୍ରହଣ କରାଯାଇଛି । ତେବେ ସୋମବାର ପରିଚାଳନା କମିଟିର ବୈଠକରେ ଶ୍ରୀମନ୍ଦିର ଉପମୁଖ୍ୟ ପ୍ରଶାସକ ତଥା ପୁରୀ ଜିଲ୍ଲାପାଳ ବଳବନ୍ତ ସିଂହ ଏହା ଉପରେ ଆଲୋଚନା କରିଥିଲେ । ପରେ ଗଣମାଧ୍ୟମ ଆଗରେ ଯାତ୍ରୀ ସହାୟତା କେନ୍ଦ୍ରକୁ ନେଇ ନିଜର ପ୍ରତିକ୍ରିୟା ରଖିଛନ୍ତି । ତେବେ ଏହାକୁ ନେଇ ସେବାୟତ ମାନେ ବିରୋଧ କରିବା ସହ ପରିଚାଳନା କମିଟି ଓ ଛତିଶାନିଯୋଗରେ ଏହି ପ୍ରସ୍ତାବ ପଡିନଥିବା କହିଛନ୍ତି। ପରମ୍ପରା ମୁତାବକ ଭକ୍ତ, ଶ୍ରଦ୍ଧାଳୁ ଓ ପର୍ଯ୍ୟଟକଙ୍କୁ ସେବା ଓ ଅତିଥି ଚର୍ଚ୍ଚା କରି ଆସୁଛନ୍ତି ଏହି କୌଳିକ ସେଵାୟତ ମାନେ ।
ତେବେ ଶ୍ରୀମନ୍ଦିର ପ୍ରଶାସନ ପକ୍ଷରୁ ଏହି ସେବା ଏକ ଘରୋଇ ସଂସ୍ଥାକୁ ହସ୍ତାନ୍ତର କରାଯିବା ନିଷ୍ପତ୍ତିକୁ ବିରୋଧ କରିଛନ୍ତି ସେବାୟତ। ସେପଟେ ଶ୍ରୀମନ୍ଦିର ପ୍ରଶାସନର ଏହି ନିଷ୍ପତ୍ତି ଦ୍ବାରା ସେବାୟତ ମାନଙ୍କ ପେଟପାଟଣା କିଭଳି ଭରଣପୋଷଣ ହେବ ସେନେଇ ସେବାୟତ ପ୍ରଶ୍ନ ଉଠାଇଛନ୍ତି। ତେବେ ରାଜ୍ୟ ସରକାର ଓ ଶ୍ରୀମନ୍ଦିର ପ୍ରଶାସନର ଏଭଳି ଏକାଚାଟିଆ ନିଷ୍ପତ୍ତି ଏବଂ ଛତିଶାନିଯୋଗ ସହ ଆଲୋଚନା ନକରି ଏଭଳି ପଦକ୍ଷେପ ନେଇଥିବା କହିଛନ୍ତି କିଛି ସେବାୟତ । ଏପରି ନିଷ୍ପତ୍ତିକୁ ନିନ୍ଦା କରିଛନ୍ତି ସେବାୟତ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
