ନିଆଳି: ପଞ୍ଚାୟତ କାର୍ଯ୍ୟାଳୟ ପରିସରରେ ରହିଛି ସ୍ବୟଂ ସହାୟକ ମହାସଂଘ ଗୋଷ୍ଠୀର କାର୍ଯ୍ୟାଳୟ । ତେବେ ପଞ୍ଚାୟତ କାର୍ଯ୍ୟାଳୟର ମୁଖ୍ୟ ଫାଟକରେ ତାଲା ପଡିବା ଯୋଗୁଁ ସ୍ବୟଂ ସହାୟକ ଗୋଷ୍ଠୀର କାର୍ଯ୍ୟରେ ବାଧା ସୃଷ୍ଟି ହୋଇଛି । ଏଭଳି ଘଟଣା ପୁରୀ ଜିଲ୍ଲା ନିମାପଡ଼ା ବ୍ଲକର କଳାପାଞ୍ଚଣ ପଞ୍ଚାୟତରେ ଦେଖିବାକୁ ମିଳିଛି । ଏହି ସ୍ବୟଂ ସହାୟକ ଗୋଷ୍ଠୀ କାର୍ଯ୍ୟାଳୟ ଦୀର୍ଘ ବର୍ଷ ହେବ ଅସ୍ଥାୟୀ ଭାବରେ ପଞ୍ଚାୟତ କାର୍ଯ୍ୟାଳୟ ପରିସରରେ କାର୍ଯ୍ୟ କରି ଆସୁଛି ।
ଗତକାଲି(ସୋମବାର) ପଞ୍ଚାୟତରେ ସରପଞ୍ଚ ଦାୟିତ୍ଵ ଗ୍ରହଣ ପରେ ପଞ୍ଚାୟତ କାର୍ଯ୍ୟାଳୟ ମୁଖ୍ୟ ଫାଟକରେ ତାଲା ପଡିଥିଲା । ଫଳରେ ମହାସଂଘର ମହିଳାମାନେ ପ୍ରତିବାଦ ସ୍ବରୂପ ଦିନ ୨ଟାରୁ ସନ୍ଧ୍ୟା ପର୍ଯ୍ୟନ୍ତ ଧାରଣାରେ ବସିଥଲେ । ଆଜି(ମଙ୍ଗଳବାର) ପଞ୍ଚାୟତ ମୁଖ୍ୟ ଫାଟକରେ ତାଲା ଖୋଲାଯାଇଥିଲା ।
କିନ୍ତୁ ଗତକାଲି ଘଟଣାକୁ କେନ୍ଦ୍ର କରି ଆଜି ପଞ୍ଚାୟତ କାର୍ଯ୍ୟାଳୟରେ ହୋ ହାଲ୍ଲା ଓ ପାଟି ତୁଣ୍ଡ ହୋଇଥିଲା । ଖବର ପାଇ ଚାରିଛକ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ସ୍ବୟଂ ସହାୟକ ଗୋଷ୍ଠୀର ସଦସ୍ୟଙ୍କୁ ବୁଝାସୁଝା କରିଥିଲା । ଏହାପରେ ପରିସ୍ଥିତି ଏବେ ଶାନ୍ତ ପଡ଼ିଛି ।
ନିଆଳିରୁ ଉମେଶ ଚନ୍ଦ୍ର ମଲ୍ଲିକ, ଇଟିଭି ଭାରତ
