ପୁରୀ: ଜୁଲାଇ 4 ତାରିଖରେ ଘୋଷଯାତ୍ରା । ଏଥିପାଇଁ ପ୍ରସ୍ତୁତି ସରିବା ଉପରେ । ଗୁଣ୍ଡିଚା ମନ୍ଦିରରେ ରଙ୍ଗ କାମ ସମେତ ସବୁ ମରାମତି କାର୍ଯ୍ୟ ପ୍ରାୟ ଶେଷ ପର୍ଯ୍ୟାୟରେ । ସେହିପରି ତିନି ରଥରେ ଆଜି(ରବିବାର) ପାରାଭାଡି କାର୍ଯ୍ୟ ସରିବା ପରେ ଚାରି ଦ୍ବାର, ସିଂହାସନ, ପ୍ରଭା କାର୍ଯ୍ୟ ଆରମ୍ଭ ହୋଇଛି । ଅନ୍ୟପଟେ ଆଜି ମହାପ୍ରଭୁଙ୍କ ରାଜପ୍ରସାଦ ବିଜେ ନୀତି । ଦଇତାପତି ସେବକ ମାନେ ଗଜପତି ମହାରାଜଙ୍କୁ ମହାପ୍ରଭୁଙ୍କ ସୁସ୍ଥ ସମ୍ବାଦ ଦେବା ସହ ମହାପ୍ରଭୁଙ୍କ ପ୍ରସାଦ ପ୍ରଦାନ କରିବେ ।
ପାଖେଇ ଆସୁଛି ଘୋଷଯାତ୍ରା । ଚଳଚଞ୍ଚଳ ରଥଖଳା । ରଥ ନିର୍ମାଣ ପାଇଁ ରାତି ଦିନ ଏକ କରି ଦେଇଛନ୍ତି ମହାରଣା ସେବାୟତ । ନିର୍ମାଣ କାମ ଶେଷ ପାଇଁ ଚାଲିଛି ଜୋରଦାର ଉଦ୍ୟମ । ପୋଟଳ କାମ, ପାରାଭାଡି କାମ ଶେଷ ହୋଇଥିବାବେଳେ ଖପୁରି ମଧ୍ୟ ରଥ ଉପରକୁ ଉଠିସାରିଛି । ରଥ ଚାରିପଟ ପଟା ସେଟିଂ କାମ ଶେଷ ପର୍ଯ୍ୟାୟରେ ପହଞ୍ଚିଛି । ସେହିପରି ଚିତ୍ରକର ସେବାୟତ ମାନେ ରଙ୍ଗଦିଆ କାମକୁ ତ୍ବରାନ୍ବିତ କରିଛନ୍ତି ।
ସେପଟେ ମହାପ୍ରଭୁଙ୍କୁ ରଥାରୂଢରେ ସ୍ବାଗତ କରିବା ପାଇଁ ପ୍ରସ୍ତୁତ ହେଉଛି ଗୁଣ୍ଡିଚା ମନ୍ଦିର । ମନ୍ଦିରର ବିଭିନ୍ନ ସ୍ଥାନରେ ରଙ୍ଗଦିଆ କାମ ଚାଲିଛି । ଅନ୍ୟପଟେ ଶ୍ରୀମନ୍ଦିରରେ ଆଜି ରାଜପ୍ରାସାଦ ବିଜେ ନୀତି ଅନୁଷ୍ଠିତ ହେବ । 108 କଳସରେ ସ୍ନାନ କରି ଅଣସରରେ ଥିବା ମହାପ୍ରଭୁଙ୍କ ସୁସ୍ଥତା ସମ୍ପର୍କରେ ଗଜପତିଙ୍କୁ ଅବଗତ କରାଇବେ ଦଇତା ସେବକ ।
ତେବେ ମହାପ୍ରଭୁ ସୁସ୍ଥ ହେବା ପରେ ପ୍ରଥମେ ନବଯୌବନ ଦର୍ଶନ ଦେବେ । ପରେ ଶ୍ରୀଗୁଣ୍ଡିଚା ଯାତ୍ରା ଅନୁଷ୍ଠିତ ହେବ ।
ପୁରୀରୁ ଶକ୍ତିପ୍ରସାଦ ମିଶ୍ର, ଇଟିଭି ଭାରତ