ପୁରୀ: ସଦର ବ୍ଲକ ବିଡ଼ିଓ ଙ୍କ କାର୍ଯ୍ୟାଳୟ ଘେରାଉ କଲେ ମାଳତିପାଟପୁର ସରପଞ୍ଚ ଓ ତାଙ୍କ ସମର୍ଥକ । ପଞ୍ଚାୟତରେ ଚାଲିଥିବା ଉନ୍ନୟନ ପ୍ରକଳ୍ପ କାର୍ଯ୍ୟରେ ସରପଞ୍ଚ, ସମିତି ସଭ୍ୟଙ୍କ ସହ ଆଲୋଚୋନା କରାନଯାଇ ବ୍ଲକ କର୍ତ୍ତୃପକ୍ଷ ମନମାନି କରି ମନଇଚ୍ଛା କାର୍ଯ୍ୟ କରୁଥିବା ଅଭିଯୋଗ କରିଛନ୍ତି ସରପଞ୍ଚ । ଏହାସହ ଏହାକୁ ପ୍ରତିବାଦ କରି ପୁରୀ ସଦର ବ୍ଲକର ସରପଞ୍ଚ ଓ ତାଙ୍କ ସମର୍ଥକ ବିଡ଼ିଓଙ୍କ କାର୍ଯ୍ୟାଳୟ ଘେରାଉ କରିଥିଲେ ।
ଜନ ପ୍ରତିନିଧିଙ୍କୁ ବ୍ଲକ କର୍ତ୍ତୃପକ୍ଷ ଗୁରୁତ୍ଵ ନଦେଇ ବିଭିନ୍ନ ପ୍ରକଳ୍ପ କାର୍ଯ୍ୟ ନେଇ କାମ ଚାଲିବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ମାଳତିପାଟପୁର ସରପଞ୍ଚ ମହେନ୍ଦ୍ର କୁମାର ମହାପାତ୍ର କହିଛନ୍ତି । ସରପଞ୍ଚ କହିଛନ୍ତି ଗ୍ରାମରେ ବିଭିନ୍ନ କାର୍ଯ୍ୟ ପାଇଁ ଆର୍ଥିକ ଅନୁଦାନ ଆସିଛି । ଏଥିପାଇଁ କିଭଳି କାର୍ଯ୍ୟ ହେବ ସେ ପୁରୀ ସଦର ବ୍ଲକର କନିଷ୍ଠ ଯନ୍ତ୍ରୀ ଙ୍କ ସହ ଆଲୋଚନା ପାଇଁ ଫୋନ କରିଥଲେ । ହେଲେ କନିଷ୍ଠ ଯନ୍ତ୍ରୀ ତାଙ୍କ ଫୋନ ଉଠାଉ ନାହାନ୍ତି । ହେଲେ ଯନ୍ତ୍ରୀ ଜଣଙ୍କ ଶାସକ ଦଳର କିଛି ସ୍ଥାନୀୟ ନେତାଙ୍କୁ ନେଇ ବିଭିନ୍ନ ପ୍ରକଳ୍ପ କାର୍ଯ୍ୟ କରୁଛନ୍ତି ।
ଜଣେ ନିର୍ବାଚିତ ସରପଞ୍ଚକୁ ଯନ୍ତ୍ରୀ ଗୁରୁତ୍ଵ ନଦେଇ ଶାସକ ଦଳର ନେତାଙ୍କ ହାତ ବାରିସି ସାଜିବାକୁ ସେ ବିରୋଧ କରିଛନ୍ତି । ଏନେଇ ସେ ପୁରୀ ସଦର ବିଡିଓଙ୍କୁ ଫୋନ୍ ଯୋଗେ ଅବଗତ କରିବା ପରେ ବିଡିଓ ମଧ୍ୟ ତାଙ୍କ କଥା ଶୁଣି ନଥିବା ଅଭିଯୋଗ କରିଛନ୍ତି ସରପଞ୍ଚ । ଯଦି ତାଙ୍କର ଅଭିଯୋଗକୁ ପ୍ରଶାସନ ଗୁରୁତ୍ବ ନଦିଏ, ସେ ଆନ୍ଦୋଳନକୁ ଓହ୍ଲାଇବେ ଏବଂ ବ୍ଲକ ପ୍ରଶାସନର ଅବହେଳାର ଦୃଢ଼ ପ୍ରତିବାଦ କରିବେ ବୋଲି କହିଛନ୍ତି ।
ସେପଟେ ପ୍ରତିବାଦକୁ ଦେଖି ପୁରୀ ସଦର ବ୍ଲକ ବିଡ଼ିଓ ସରପଞ୍ଚଙ୍କ ସହ ଆଲୋଚୋନା କରିଥିଲେ । ଏଭଳି ଅଭିଯୋଗ ତାଙ୍କ ନିକଟକୁ ପୁର୍ବରୁ ଆସି ନଥିବା ବେଳେ ଆଗାମୀ ଦିନରେ ସରପଞ୍ଚଙ୍କ ସହ ଆଲୋଚୋନା କରାଯାଇ ସବୁ କାର୍ଯ୍ୟ ହେବ ବୋଲି ପୁରୀ ସଦର ବ୍ଲକ ବିଡ଼ିଓ କହିଛନ୍ତି । ତେବେ ପୁରୀ ସଦର ବ୍ଲକ ପ୍ରଶାସନ ସରପଞ୍ଚ କଥାକୁ ଗୁରୁତ୍ଵ ନଦେଇ ଶାସକ ଦଳ ବିଜେଡିର କିଛି ନେତାଙ୍କ କଥାରେ ପରିଚାଳିତ ହେବାକୁ ନେଇ ପୁରୀ ସଦର ବ୍ଲକ ମାଳତୀପାଟପୁର ପଞ୍ଚାୟତରେ ଅସନ୍ତୋଷ ପ୍ରକାଶ ପାଇଛି ।
ଇଟିଭି ଭାରତ, ପୁରୀ
