ପୁରୀ: ସହରରେ କୋରୋନାକୁ ନେଇ ଲକଡାଉନ ଜାରି ରହିଛି । ଏହି ଭିତରେ କେତେକ ନିୟମକୁ ପୁରୀ ଜିଲ୍ଲାପାଳ ବଲବନ୍ତ ସିଂ କଡାକଡି କରିଛନ୍ତି । ଯଦି ଏହି ନିୟମ କିଏ ଉଲ୍ଲଘଂନ କରେ ତେବେ ସମ୍ପୃକ୍ତ ବ୍ୟକ୍ତି ଓ ଅନୁଷ୍ଠାନକୁ ଅଧିକ ଟଙ୍କାର ଫାଇନ ଚାର୍ଜ କରାଯିବ । ପ୍ରଥମେ ପୁରୀ ସହରରେ ପ୍ରତ୍ୟେକ ଘରୁ ସ୍ବଚ୍ଛ ସବାରୀ ଗାଡି ଯାଇ ଅଳିଆ ସଂଗ୍ରହ କରୁଛି । କିନ୍ତୁ କେତେକ ଲୋକ ଘରୁ ଅଳିଆ ଦେଉନଥିବା ଦେଖିବାକୁ ମିଳୁଛି ।
ତେଣୁ ଆସନ୍ତା ମେ ମାସରୁ କେହି ଯଦି ଘର ଆଗରେ କି ରାସ୍ତାରେ ଅଳିଆ ପକାଇବା ନଜରକୁ ଆସେ, ସେମାନଙ୍କୁ ଅଧିକ ଟଙ୍କାର ଜୋରିମାନା କରାଯିବ । ସେହିପରି ଦ୍ବିତୀୟ ବାର୍ତ୍ତା ରହିଛି ବାଧ୍ୟତାମୂଳକ ମାସ୍କ ବ୍ୟବହାର । ଘରୁ ବାହାରିବା ମାତ୍ରେ ସମସ୍ତେ ମାସ୍କ ପିନ୍ଧିବା ବାଧ୍ୟତାମୂଳକ । ଏହାକୁ ଉଲ୍ଲଘଂନ କଲେ ଫାଇନ କରାଯିବ। ଅନ୍ୟପଟେ ତୃତୀୟ ବାର୍ତ୍ତା ରହିଛି ଏଣେତେଣେ ଛେପ ନପକାଇବା । ସର୍ବସାଧାରଣ ଜାଗାରେ ଛେପ ପକାଇବା ଉପରେ କଟକଣାକୁ କଡାକଡି କରାଯାଇଛି । ଏହାର ବ୍ୟତିକ୍ରମ ନଜରକୁ ଆସିଲେ ଫାଇନ କରାଯିବ ବୋଲି ଜିଲ୍ଲାପାଳ ସୂଚନା ଦେଇଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
