ପୁରୀ: ଦେବସ୍ନାନ ପୂର୍ଣ୍ଣିମାରେ 108 ସୁବାସିତ ଜଳରେ ସ୍ନାନ କରିବା ପରେ ଜ୍ବରରେ ପୀଡିତ ଅଛନ୍ତି ମହାପ୍ରଭୁ। ଅଣସରରେ ଗୃହରେ ଦଇତାପତିମାନେ କରୁଛନ୍ତି ଗୁପ୍ତସେବା । ଆଉ ଆଜି ଶ୍ରୀଅଙ୍ଗରେ ଲାଗି ହେବ ଫୁଲୁରି ତେଲ । ଦ୍ଵି-ପ୍ରହର ଧୂପ ପରେ ଏହି ନୀତି ଅନୁଷ୍ଠିତ ହେବ। ଦଇତାପତି ଓ ପତି ମହାପାତ୍ର ସେବକମାନେ ଏହି ଫୁଲୁରି ତେଲ ଲାଗି ସେବା କରିବେ। ତା ପରେ ଧୀରେଧୀରେ ସୁସ୍ଥ ହେବେ ଚତୁର୍ଦ୍ଧାମୂର୍ତ୍ତୀ ।
ଭିଡିଓ ସୌଜନ୍ୟ: ସମ୍ବାଦାତା, ପୁରୀ
ପରମ୍ପରା ଅନୁସାରେ, ଅଣସରର ପଞ୍ଚମ ଦିନ ମହାପ୍ରଭୁଙ୍କ ଶ୍ରୀଅଙ୍ଗରେ ଏହି ସ୍ୱତନ୍ତ୍ର ଫୁଲୁରି ତେଲ ମାଲିସ କରାଯାଏ । ଓଡ଼ିଆ ମଠ ପକ୍ଷରୁ ଏହି ସ୍ୱତନ୍ତ୍ର ଫୁଲୁରି ତେଲ ତିଆରି ବିଶେଷ ଭାବେ ପ୍ରସ୍ତୁତ କରାଯାଏ। ବିଶୁଦ୍ଧ ରାଶି ତେଲରେ ବିଭିନ୍ନ ସୁବାସିତ ପୁଷ୍ପ ଯଥା , ମଲ୍ଲୀ, କେତକୀ, ଜୁଇ ଆଦି ଫୁଲ ତେଲରେ ପକାଯାଏ।
