ପୁରୀ: ପୁରୀ ସହରରେ ଲୋକଙ୍କ ଜୀବନ ସହ ଖେଳ ଖେଳୁଛି ଟାଟା ପାୱାର । ଟାଟା ପାୱାର ଦାୟିତ୍ଵରେ ଥିବା ଅଧିକାରୀଙ୍କ ଖାମଖିଆଲି ମନୋଭାବ ଯୋଗୁଁ ବିଦ୍ୟୁତ୍ ଆଘାତର ଶିକାର ହୋଇ ଅନେକ ନିରୀହ ଲୋକଙ୍କର ପ୍ରାଣ ଚାଲି ଯାଉଛି । ତଥାପି ଦାୟିତ୍ଵରେ ଥିବା ଅଧିକାରୀଙ୍କ ନିଦ ଭାଙ୍ଗୁନି । ରାସ୍ତାକଡ଼ରେ ବିଦ୍ୟୁତ ଖୁଣ୍ଟର ସ୍ଥିତି ଦୟନୀୟ ହୋଇ ରହିଛି । ଜନବସତି ଅଞ୍ଚଳ ଦେଇ 33 କେଭି ବିଦ୍ୟୁତ ତାର ଯାଇଛି । ସେହିଭଳି ରାସ୍ତା ମଝିରେ ବିଦ୍ୟୁତ ଖୁଣ୍ଟ ରହିଛି । ଏସବୁ ସମସ୍ୟାର ସମାଧାନ କରିବାକୁ ଦାବି କରୁଛନ୍ତି ଲୋକେ । ସେପଟେ ସମୀକ୍ଷା ପରେ ପଦକ୍ଷେପ ନିଆଯିବ ବୋଲି କହିଛନ୍ତି ଜିଲ୍ଲାପାଳ ।
ବିପଦ ଟାଣୁଛି କଳଙ୍କି ବିଦ୍ୟୁତ ଖୁଣ୍ଟ
ସିଦ୍ଧମହାବୀର ଏନ୍ସିସି ଅଫିସ ଛକଠାରୁ ଦେନା ବ୍ୟାଙ୍କ୍ ପର୍ଯ୍ୟନ୍ତ ରାସ୍ତା ଦେଇ ଯାଇଥିବା ବିଦ୍ୟୁତ ଲାଇନ୍ ଅବସ୍ଥା ଅତ୍ୟନ୍ତ ଦୟନୀୟ ଅବସ୍ଥାରେ ରହିଛି । ରାସ୍ତା ମଝିରେ ରହିଛି ବିଦ୍ୟୁତ୍ ଖୁଣ୍ଟ । ଜନବସତି ଅଞ୍ଚଳ ଉପର ଦେଇ ଉଚ୍ଚ ଶକ୍ତି ସମ୍ପନ୍ନ ୩୩ କେଭି ଲାଇନ୍ ଯାଇଛି । ଏଥିପାଇଁ ଲୋକଙ୍କ ଉପରେ ସବୁବେଳେ ବିଦ୍ୟୁତ ଆଘାତର ବିପଦ ରହୁଛି ।
ଯମ ସାଜିଛି ଟାଟା ପାୱାର
ଟାଟା ପାୱାର ଦାୟିତ୍ବ ନେବପରଠୁ ବିଦ୍ୟୁତ ସରବରାହ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଥିବା ଅଭିଯୋଗ ହୋଇଛି । ଟାଟା ପାୱାର ଗୁଣ୍ଡାମୀ କରୁଛି । ମିଥ୍ୟା ଅଭିଯୋଗ କରି ଲୋକଙ୍କ ବିଲ୍ କଲେକ୍ସନ କରୁଛି । ଏଥିପ୍ରତି ଧ୍ୟାନ ଦେବାର ଆବଶ୍ୟକତା ରହିଥିବା ଦାବି ହେଉଛି । ଲୋକଙ୍କ ପାଇଁ ଟାଟା ପାୱାର ଯମ ସାଜିଥିବା ଆଲୋଚନା ହେଉଛି ।
ଅଣ୍ଡର ଗ୍ରାଉଣ୍ଡରେ ବିଦ୍ୟୁତ୍ ଲାଇନ ଦାବି
ତାର ଛିଡ଼ି ତଳେ ଓହଲୁଥିବା ଦେଖା ଯାଇଛି । ସେହିଭଳି ଲୋକଙ୍କ ଘର ସାମ୍ନାରେ ବିଦ୍ୟୁତ ତାର ଓହଳି ପଡ଼ିଥିବା ମଧ୍ୟ ଦେଖାଯାଇଛି । ବିଦ୍ୟୁତ ଖୁଣ୍ଟ କଳଙ୍କି ଖାଇ ଠିଆ ହୋଇଛି । କେତେବେଳେ ଏହା ଲୋକଙ୍କ ଉପରେ ଖସି ପଡ଼ିବ ତାହାର କହି ହେବନି । ପୁରୀ ସହର ଓ ବିଭିନ୍ନ ଗଳିକନ୍ଦିରେ ବିଦ୍ୟୁତ୍ ଖୁଣ୍ଟ ସହିତ ଅନେକ ଟ୍ରାନ୍ସଫରମର ଅତି ବିପଦ ଶଙ୍କୁଳ ଭାବେ ଖୋଲାମେଲା ଭାବେ ପଡ଼ି ରହିଛି । ଲୋକନାଥ ରୋଡର ଶଣ୍ଢ ଯାଗା ଠାରୁ ଦାମୋଦର ରୋଡ ପର୍ଯ୍ୟନ୍ତ ରାସ୍ତା ଉପରେ ଥିବା ଏହି ଲୁହା ବିଦ୍ୟୁତ ଖୁଣ୍ଟ ସ୍ଥିତି ଅତି ଦୟନୀୟ ହୋଇ ରହିଛି ।
ଏହାକୁ ନେଇ ସ୍ଥାନୀୟ ଲୋକେ କହିଛନ୍ତି, "ଏହି ଯେଉଁ ୩୩ କେଭି ଏଠାରୁ ହଟାଯାଉ ନହେଲେ ଅଣ୍ଡରଗ୍ରାଉଣ୍ଡ କରାଯାଉ । ଏହାଦ୍ବାରା ଲୋକଙ୍କ ଜୀବନ ପ୍ରତି ବିପଦ ରହିଛି । ଆମେ PWDର କାର୍ଯ୍ୟ ବନ୍ଦ କରାଯାଇଛି । ଟାଟା ପାୱାର ଦାବି ନଶୁଣିଲେ ଆମେ ବିଲ୍ ବୈଠ କରିବୁ ନାହିଁ । ଆମେ ଜୀବନ କିଭଳି ରକ୍ଷା ପାଇବ ତାହା ଆମେ ଚିନ୍ତା କରୁଛୁ । ରାସ୍ତା ମଝିରେ ୩୩କେଭି ତାର ଯାଇଛି ।"
ଏହି ଅଭିଯୋଗ ନେଇ ପୁରୀ ଜିଲ୍ଲାପାଳ ସମର୍ଥ ବର୍ମା କହିଛନ୍ତି, "ଆମେ ଯେତେବେଳେ ବି ଅଭିଯୋଗ ପାଉଛୁ ସେଥିପ୍ରତି ପଦକ୍ଷେପ ନେଇଛୁ । ଏହାପରେ ଆମେ ଏକ ସର୍ଭେ କରାଇବୁ ଏହାପରେ ଯେଉଁସବୁ ସ୍ଥାନରେ ସମସ୍ୟା ରହିଛି ତାହାକୁ ନେଇ ଟାଟା ପାୱାରକୁ ପଦକ୍ଷେପ ନେବାକୁ ନିର୍ଦ୍ଦେଶ ଦେଲୁ । ସେହି କାର୍ଯ୍ୟ ସେମାନେ କରିବା ଆରମ୍ଭ କରିଥିଲେ । ଟାଟା ଟିମ୍ ପରିକ୍ରମା ପ୍ରକଳ୍ପରେ ଲାଗିଥିଲା । ସେହି କାର୍ଯ୍ୟ ଶେଷ ହୋଇଛି ବର୍ତ୍ତମାନ ଏହି କାର୍ଯ୍ୟ ଆରମ୍ଭ ହେବ ।"
ଗୋଟିଏ ମାସର ବିଦ୍ୟୁତ୍ ବିଲ୍ ପୈଠ ନହେଲେ ଉପଭୋକ୍ତାଙ୍କ ଲାଇନ୍ କଟା ଯାଉଛି । ଦୁର୍ବ୍ୟବହାର କରିବାକୁ ପଛାଉ ନାହାନ୍ତି ଟାଟା ପାୱାର କର୍ମଚାରୀ । ପୁଳାପୁଳା ଅଭିଯୋଗ ପରେ ପୁରୀ ସହରବାସୀଙ୍କ ସୁରକ୍ଷା ଦିଗରେ ଟାଟା ପାୱାର ଉଚିତ୍ ପଦକ୍ଷେପ ନେବାକୁ ଦାବି ହୋଇଛି । ଆଗାମୀ ଦିନରେ ଟାଟା ପାୱାରକୁ ଦୃଢ଼ ବିରୋଧ କରାଯିବ ବୋଲି ବିଭିନ୍ନ ସଙ୍ଗଠନ ପକ୍ଷରୁ ଚେତାବନୀ ଦିଆଯାଇଛି ।
ଇଟିଭଇ ଭାରତ, ପୁରୀ
