ପୁରୀ: ପୁରୀରେ ଘରେଘରେ ବ୍ୟାପୁଛି ଝାଡାବାନ୍ତି । ଝାଡାବାନ୍ତିରେ ଜଣେ ମହିଳାଙ୍କ ମୃତ୍ୟୁ ହୋଇଥିବା ପରିବାର ଲୋକେ ଅଭିଯୋଗ କରିଛନ୍ତି । ମୃତକ ହେଉଛନ୍ତି ବିମାନବଡୁ ସାହି ସେବାୟତ ପରିବାରର ୭୦ ବର୍ଷୀୟା ବୃଦ୍ଧା ବାସନ୍ତୀ ଦାଶ ।
ସୂଚନା ମୁତାବକ, ଗତ କିଛି ଦିନ ହେବ ଜନସ୍ବାସ୍ଥ୍ୟ ବିଭାଗ ଦ୍ବାରା ଯୋଗାଉଥିବା ପାନୀୟ ଜଳ ଅତ୍ୟନ୍ତ ଦୂଷିତ ଓ ମଇଳା ପାଣି ଆସୁଥିବା ଅଭିଯୋଗ ହୋଇଥିଲା। ବାସେଳୀ ସାହିରେ ପାଣି ପାଇପ୍ ଫାଟି ଯାଇଥିବା ଯୋଗୁଁ ଏଥିରେ ଡ୍ରେନର ପାଣି ବିଶୁଦ୍ଧ ପାନୀୟ ଜଳରେ ମିଶିଯିବାରୁ ଝାଡ଼ାବାନ୍ତି ବ୍ୟାପିଛି । ତେବେ ସ୍ଥିତି ସମୀକ୍ଷା ପାଇଁ ଗତ ଦୁଇଦିନ ତଳେ ଜିଲ୍ଲାପାଳ ସମର୍ଥ ବର୍ମା ସ୍ଥାନୀୟ ଅଞ୍ଚଳ ପରିଦର୍ଶନ କରିବା ସହ ଚିକିତ୍ସା ସୁବିଧା ଯୋଗାଇ ଦେଇଥିଲେ ମଧ୍ୟ ପରିସ୍ଥିତିରେ କୌଣସି ଉନ୍ନତି ଘଟିନାହିଁ । ଫଳରେ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଝାଡ଼ାବାନ୍ତିରେ ଜଣେ ବୃଦ୍ଧାଙ୍କ ମୃତ୍ୟୁ ଯୋଗୁ ଆତଙ୍କ ଖେଳିଯାଇଛି ।
ଅନ୍ୟପଟେ ଏବେବି ଶତାଧିକ ଲୋକେ ଝାଡାବାନ୍ତିରେ ଆକ୍ରାନ୍ତ ଥିବାବେଳେ ଉପଯୁକ୍ତ ଚିକିତ୍ସା ଯୋଗାଇ ଦେବା ପାଇଁ ଦାବି ହୋଇଛି । ସେହିପରି ବିଶୁଦ୍ଧ ପାନୀୟ ଜଳ ଆସୁଥିବା ପାଣି ପାଇପ୍ରେ ଏବେବି ଦୂଷିତ ଜଳ ଆସୁଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି ।
ଇଟିଭି ଭାରତ, ପୁରୀ
