ପୁରୀ: ବିନା ମଳଦ୍ବାରରେ ଦୀର୍ଘ 3 ବର୍ଷ କଷ୍ଟରେ ଜର୍ଜରିତ ପୁରୀ ମଶାଣିଚଣ୍ଡୀ ଅଞ୍ଚଳର 4 ବର୍ଷର ଶିଶୁ ବିକ୍ରମ । ଦୁଇ- ଦୁଇଟି ଅପରେସନ ସରିଥିଲେ ବି ଏବେ ଆହୁରି ଅପରେସନ ଲୋଡ଼ା । କିନ୍ତୁ ଅର୍ଥ ସାଜିଛି ବାଧକ । ଅଟୋ ଚାଳକ ବାପା ପାଇଁ ଶିଶୁକୁ ସୁସ୍ଥ କରିବା ଏବେ ଅସମ୍ଭବ ହୋଇପଡିଥିଲା ବେଳେ ଦରକାର ସହାୟତାର ହାତ ।
ପୁରୀରେ ଘର ଭଡା ନେଇ ରହୁଛନ୍ତି ବିକ୍ରମଙ୍କ ବାପା ଅନିରୁଦ୍ଧ । ଲକଡାଉନ ଯୋଗୁଁ ଅଟୋ ବି ଗଡୁନଥିଲା । ଫଳରେ ଘର ଭଡା 10 ମାସ ଦେଇନଥିଲା ବେଳେ ଓଳିଏ ଖାଇଲେ ଦୁଇ ଓଳି ଉପାସ ରହୁଛନ୍ତି । ଏଭଳି କଷ୍ଟକର ସମୟରେ ପୁଅ ବିକ୍ରମକୁ ନେଇ ଚିନ୍ତାରେ ପରିବାର ।
ଜନ୍ମର 8 ମାସ ବେଳକୁ ବିକ୍ରମଙ୍କ ମଳଦ୍ବାର ନାଡୀଟି ନଷ୍ଟ ହୋଇ ଯାଇଥିଲା। ବାଇପାସ ସର୍ଜରି କରାଯାଇ 3 ବର୍ଷ ହେବ ଏକ ପ୍ଲାଷ୍ଟିକ ଥଳିରେ ପେଟରୁ ମଳ ନିଷ୍କାସନ ହେଉଛି । ପ୍ରତି 4 ରୁ 5 ଦିନରେ ଗୋଟିଏ ଥଳି ବଦଳା ଯାଉଛି । ପ୍ଲାଷ୍ଟିକ ଥଳି ବାବଦ ମାସକୁ ଖର୍ଚ୍ଚ ହେଉଛି 4 ରୁ 5 ହଜାର ଟଙ୍କା । ପୁରୀର ସାମାଜିକ ସଂଗଠନ ସାହି ଭାଇ ଅନୁଷ୍ଠାନ ସେ ସବୁ ଯୋଗାଇ ଦେଉଛନ୍ତି । ମାତ୍ର ସମସ୍ୟାର ସ୍ଥାୟୀ ସମାଧାନ ଲାଗି ତୃତୀୟ ଅସ୍ତ୍ରୋପଚାର ନିହାତି ଆବଶ୍ୟକ । ମଳଦ୍ବାର ଠିକ ନ କଲେ ସେହି ସ୍ଥାନ ସଂକ୍ରମିତ ହୋଇ ପାରେ ବୋଲି ଡାକ୍ତର କହିଛନ୍ତି । ହେଲେ ଏଥିପାଇଁ ଖର୍ଚ୍ଚ ହେବାକୁ ଥିବା 2 ରୁ 3 ଲକ୍ଷ ଟଙ୍କା ଯୋଗାଡ କରିବା ଅନିରୁଦ୍ଧଙ୍କ ପକ୍ଷେ ଅସମ୍ଭବ । ପୁଅ ପାଇଁ ସେ ନିଜର ସଞ୍ଚୟ, ଗହଣା ସବୁ ବିକି ଚିକିତ୍ସାରେ ଲଗାଇସାରିଛନ୍ତି । ଏବେ ସମ୍ପୂର୍ଣ୍ଣ ହାତ ଖାଲି। । ଏବେ କେବଳ ସହାୟତାକୁ ଆଶା । ତେବେ ଏଭଳି ଅସମୟରେ ପ୍ରଶାସନ କିମ୍ବା କେହି ସହହୃଦୟ ବ୍ୟକ୍ତି ସାହାଯ୍ୟ ପାଇଁ ଆକୁଳ ନିବେଦନ କରିଛନ୍ତି ବିକ୍ରମଙ୍କ ବାପା ଓ ମା’ ।
ତେବେ କେହି ଯଦି ବିକ୍ରମକୁ ସାହାଯ୍ୟ ହାତ ବଢ଼େଇ ବାକୁ ଚାହୁଁଛନ୍ତି ତାହା ହେଲେ ତାଙ୍କ ବାପା ଅନିରୁଦ୍ଧ ଙ୍କୁ 98614 97175 ନମ୍ବର ରେ ଯୋଗାଯୋଗ କରିପାରିବେ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
