ପୁରୀ: ସହରରେ 3ଟି ନବ ନିର୍ମିତ ମାର୍କେଟ କମ୍ପ୍ଲେକ୍ସ ନିର୍ମାଣ ଶେଷ ହୋଇଛି । ସ୍ୱଚ୍ଛତା ଭିତ୍ତିରେ ପ୍ରକୃତ ଯୋଗ୍ୟ ବ୍ୟକ୍ତିଙ୍କୁ ଦୋକାନ ଗୃହ ଆବଣ୍ଟନ ନେଇ ବିଭିନ୍ନ ମହଲରେ ଦାବି ହୋଇଛି । ପୁରୀ ସହରର ମାର୍କେଟ ଛକ, ମୋଚିସାହି ଛକ ଏବଂ ଜେଲ୍ ରୋଡ଼ରେ ତିନୋଟି ଅତ୍ୟାଧୁନିକ ମାର୍କେଟ କମ୍ପ୍ଲେକ୍ସର ନିର୍ମାଣ କାର୍ଯ୍ୟ ଶେଷ ହେବା ପରେ ଏବେ ଦୋକାନ ଗୃହ ଆବଣ୍ଟନ ପ୍ରକ୍ରିୟା ଆରମ୍ଭ ହୋଇଛି ।
ଦୋକାନ ଗୃହ ପାଇଥିବା ଦୋକାନୀଙ୍କ ନାମ ଏକ ନୋଟିସ ମାଧ୍ୟମରେ ସର୍ବସାଧାରଣରେ ପ୍ରକାଶ କରାଯାଇଛି । ଯଦି କାହାର ଆପତ୍ତି ଅଭିଯୋଗ ଥିବ ସେମାନେ ପ୍ରଶାସନକୁ ଜଣାଇବା ପାଇଁ କୁହାଯାଇଛି । ସେପଟେ ଦୋକାନ ଗୃହ ପାଇଥିବା ବ୍ୟବସାୟୀ ମାନେ ମଧ୍ୟ ବେଶ୍ ଖୁସି ଅଛନ୍ତି । ସରକାରଙ୍କ ଏଭଳି ପଦକ୍ଷେପକୁ ଦୋକାନ ଗୃହ ପାଇଥିବା ବ୍ୟବସାୟୀ ପ୍ରଶଂସା କରିଛନ୍ତି । ସେପଟେ ଦୋକାନ ଗୃହ ଆବଣ୍ଟନରେ ପ୍ରିୟାପ୍ରତି ପୋଷଣ କରାନଯାଇ ଉଚିତ୍ ଢଙ୍ଗରେ ଯୋଗ୍ୟ ହିତାଧିକାରୀଙ୍କୁ ଦୋକାନ ଗୃହ ଦେବାକୁ ନଗର କଂଗ୍ରେସ୍ ସଭାପତି ଛବିନ୍ଦ୍ର ପଢୀଆରୀ ଦାବି କରିଛନ୍ତି ।
ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଯୋଗୁଁ ଅନେକ ଛୋଟବଡ଼ ବ୍ୟବସାୟୀଙ୍କୁ ଉଚ୍ଛେଦ କରାଯାଇଥିଲା । ତେବେ ନୂତନ ମାର୍କେଟ କମ୍ପ୍ଲେକ୍ସ ନିର୍ମାଣ କରାଯାଇ ବିସ୍ଥାପିତ ବ୍ୟବସାୟୀଙ୍କୁ ଥଇଥାନ କରାଯିବା ନେଇ ପ୍ରତିଶ୍ରୁତି ଦେଇଥିଲେ ସରକାର । ଗତ ୨୦୨୦ ମସିହା ଜାନୁଆରୀ ୧୭ ତାରିଖରେ ପୁରୀ ମାର୍କେଟ ଛକରେ ଥିବା ମ୍ୟୁନିସିପାଲଟି ମାର୍କେଟକୁ ଅତ୍ୟାଧୁନିକ ମାର୍କେଟ କମ୍ପ୍ଲେକ୍ସରେ ପରିଣତ କରିବା ପାଇଁ ମୁଖ୍ୟମନ୍ତ୍ରୀ ଭିତ୍ତିପ୍ରସ୍ତର ସ୍ଥାପନ କରିଥିଲେ । ତେବେ ପରବର୍ତ୍ତୀ ସମୟରେ ମୋଚି ସାହି ଏବଂ ଜେଲ୍ ରୋଡ୍ରେ ଅତ୍ୟାଧୁନିକ ମାର୍କେଟ କମ୍ପ୍ଲେକ୍ସ ନିର୍ମାଣ ନେଇ ସରକାର ନିଷ୍ପତ୍ତି ନେଇଥିଲେ ।
ମୋଟ ୧୪୮ କୋଟି ଟଙ୍କା ବ୍ୟୟରେ ମାର୍କେଟ ଛକ, ମୋଚିସାହି ଓ ଜେଲ୍ ରୋଡ଼ରେ ନିର୍ମାଣ ହୋଇଥିବା ମାର୍କେଟ କମ୍ପ୍ଲେକ୍ସରେ ମୋଟ ୧୦୦୦ଟି ଦୋକାନ ଗୃହ ରହିଛି । ଯାହାକୁ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବିସ୍ଥାପିତ ବ୍ୟବସାୟୀଙ୍କ ସମେତ ମ୍ୟୁନିସିପାଲଟି ମାର୍କେଟ୍ କମ୍ପ୍ଲେକ୍ସ ଏବଂ ମୋଚିସାହି ମାର୍କେଟ କମ୍ପ୍ଲେକ୍ସ ବ୍ୟବସାୟୀଙ୍କୁ ମଧ୍ୟ ଥଇଥାନ କରିବା ପାଇଁ ଏହି ତିନୋଟି ମାର୍କେଟ କମ୍ପ୍ଲେକ୍ସରେ ବ୍ୟବସ୍ଥା ହୋଇଛି । ତେବେ ଖୁବଶୀଘ୍ର ସମସ୍ତ ପ୍ରକ୍ରିୟା ଶେଷ ହେବା ପରେ ବିସ୍ଥାପିତ ଏବଂ ଯୋଗ୍ୟ ହିତାଧିକାରୀଙ୍କୁ ଦୋକାନ ଗୃହ ପ୍ରଦାନ କରାଯିବ ବୋଲି ଜିଲ୍ଲାପାଳ କହିଛନ୍ତି ।
ପୁରୀ ସହରରେ ନିର୍ମାଣ ହୋଇଥିବା ତିନୋଟି ଅତ୍ୟାଧୁନିକ ମାର୍କେଟ କମ୍ପ୍ଲେକ୍ସ ଗୃହ ଆବଣ୍ଟନରେ ବ୍ୟାପକ ଦୁର୍ନୀତି ହୋଇଥିବା ପୂର୍ବରୁ ଅଭିଯୋଗ ହୋଇଥିବା ବେଳେ ଏହି ମାମଲା ହାଇକୋର୍ଟକୁ ମଧ୍ୟ ଯାଇଥିଲା । ତେବେ ପୁରୀ ଜିଲ୍ଲା ପ୍ରଶାସନ କିଭଳି ସ୍ବଚ୍ଛତା ତାର ସହ ଦୋକାନ ଗୃହ ଆବଣ୍ଟନ କରିବ ତା'କୁ ହିଁ ସମସ୍ତଙ୍କ ଅପେକ୍ଷା ।
ଇଟିଭି ଭାରତ, ପୁରୀ
