ପୁରୀ: ରାବଣ ପୋଡିରେ ଜଳା ହେଲା ଗଣଶିକ୍ଷା ମନ୍ତ୍ରୀ ସମୀର ଦାଶଙ୍କ କୁଶ ପୁତ୍ତଳିକା । ଗୋପର ଜିଲ୍ଲା ପରିଷଦ ସଭ୍ୟ ଧର୍ମେନ୍ଦ୍ର ସାହୁ ମୃତ୍ୟୁ ଘଟଣାରେ ଭାରତୀୟ ଜନତା ପାର୍ଟି(BJP) ରାବଣ ବଦଳରେ ମନ୍ତ୍ରୀଙ୍କ କୁଶ ପୁତ୍ତଳିକା ଦାହ କରିଛି(BJP workers burn Samir Dash effigy) । ସମୀର ଦାଶଙ୍କୁ ନିମାପଡା ଗୋପ ଅଞ୍ଚଳର ରାବଣ ବୋଲି କହିଛି ବିଜେପି । ଲଙ୍କାପତି ରାବଣ ସୀତାଙ୍କୁ ହରଣ କରିବା ଭଳି ମନ୍ତ୍ରୀ ମଧ୍ୟ ପର ସ୍ତ୍ରୀକୁ ହରଣ କରୁଛନ୍ତି ବୋଲି ନିମାପଡା ବିଜେପି କର୍ମୀ ଅଭିଯୋଗ କରି ବିଜୟ ଦଶମୀରେ ରାବଣ ବଦଳରେ ତାଙ୍କର କୁଶ ପୁତ୍ତଳିକା ଦହନ କରିଛନ୍ତି ।
ଜିଲ୍ଲା ପରିଷଦ ସଭ୍ୟ ଧର୍ମେନ୍ଦ୍ର ସାହୁଙ୍କ ଆତ୍ମହତ୍ୟା ଘଟଣାରେ ଗଣଶିକ୍ଷା ମନ୍ତ୍ରୀଙ୍କ ସମ୍ପୃକ୍ତି ରହିଥିବା ବିଜେପି ଅଭିଯୋଗ କରିଆସୁଛି । ଏହି ପରିପ୍ରେକ୍ଷୀରେ ସମୀର ଦାଶଙ୍କ ଇସ୍ତଫା ଦାବି କରି ବୁଧବାର ବିଜୟା ଦଶମୀ ଅବସରରେ ବିଜେପି ନେତ୍ରୀ ପ୍ରଭାତୀ ପରିଡ଼ାଙ୍କ ନେତୃତ୍ବରେ ଶତାଧିକ ଦଳୀୟ କର୍ମୀ ଏଭଳି ନିଆରା ବିକ୍ଷୋଭ ପ୍ରଦର୍ଶନ କରିଛନ୍ତି । ମନ୍ତ୍ରୀଙ୍କୁ ରାବଣ ଭାବେ ଅଭିହିତ କରି ତାଙ୍କର କୁଶ ପୁତ୍ତଳିକା ଦାହ କରିଛି ଦଳ । ତେବେ ଏହି ବିକ୍ଷୋଭକୁ ନେଇ ପ୍ରବଳ ଉତ୍ତେଜନା ଦେଖିବାକୁ ମିଳିଥିଲା । ବିଜେଡ଼ି ଓ ବିଜେପି କର୍ମୀଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା । ପରେ ପୋଲିସ ପକ୍ଷରୁ ଉଭୟ ପକ୍ଷଙ୍କୁ ବୁଝାସୁଝା କରି ପରିସ୍ଥିତିକୁ ନିୟନ୍ତ୍ରଣ କରାଯାଇଛି । ତେବେ ରାବଣ ପୋଡ଼ି ଦିନ ରାଜ୍ୟର ଜଣେ ମନ୍ତ୍ରୀଙ୍କ କୁଶପୁତ୍ତଳିକା ଦହନ କରିବା ଘଟଣା ଏବେ ସାଧାରଣରେ ବେଶ୍ ଚର୍ଚ୍ଚାର ବିଷୟ ହେଇଛି ।
ଏଠାରେ ଉଲ୍ଲେଖଯୋଗ୍ୟ ଯେ, ଗୋପ ୧୧ ନଂ ଜିଲ୍ଲା ପରିଷଦ ସଭ୍ୟ ଧର୍ମେନ୍ଦ୍ର ସାହୁଙ୍କ ମୃତ୍ୟୁ(Dharmendra Sahoo Death Case) ଘଟଣାକୁ ନେଇ ଗଣଶିକ୍ଷା ମନ୍ତ୍ରୀ ସମୀର ଦାସ ଅଡୁଆରେ ପଡିଛନ୍ତି । ଧର୍ମେନ୍ଦ୍ର ସାହୁ ତାଙ୍କ ଜଣେ ବନ୍ଧୁ ଅକ୍ଷୟ ନାୟକଙ୍କ ସହ ଫୋନରେ କଥା ହେବା ବେଳେ ଆଗକୁ ଯଦି ତାଙ୍କର ମୃତ୍ୟୁ ହୁଏ ମନ୍ତ୍ରୀ ସମୀର ଦାଶ ଓ ତାଙ୍କର କିଛି ଅନୁଗତ ଲୋକ ଦାୟୀ ରହିବେ ବୋଲି ଫୋନରେ କହିଥିଲେ । ଏହି ଅଡିଓ କ୍ଲିପ୍ ଭାଇରାଲ୍ ପରେ ବିଜେପି ମନ୍ତ୍ରୀଙ୍କ ଇସ୍ତଫା ସହ ତାଙ୍କୁ ପୋଲିସ ତଦନ୍ତ ପରିସର ଭୁକ୍ତ କରିବାକୁ ଦାବି କରିଆସୁଛି ।
ଇଟିଭି ଭାରତ, ପୁରୀ
