ପୁରୀ: ରାଜରାଜେଶ୍ଵରୀ ବେଶରେ ଭକ୍ତଙ୍କୁ ଦର୍ଶନ ଦେଉଛନ୍ତି ମା’ ଦକ୍ଷିଣ କାଳୀ । କାଳୀ ପୂଜା ଅବସରରେ ସୋମବାର ଲୋକାରଣ୍ୟ ସାକ୍ଷୀଗୋପାଳର ବୀରଗୋବିନ୍ଦପୁର ଗ୍ରାମରେ ଥିବା ମାଆଙ୍କ ପୀଠ। ବହୁ ପୁରାତନ କାଳରୁ ମା’ ଏଠାରେ ପୂଜା ପାଇଆସୁଛନ୍ତି। ରୀତିନୀତି ଅନୁସାରେ ପୂଜାର୍ଚ୍ଚନା ସହ ପୀଠରେ ଆଖୁ ଓ ପାଣିକଖାରୁ ବଳି ଦିଆଯାଇଛି। ଭକ୍ତଙ୍କ ଭିଡକୁ ଦୃଷ୍ଟିରେ ରଖି ପ୍ରଶାସନ ପକ୍ଷରରୁ ବ୍ୟାପକ ପଦକ୍ଷେପ ଗ୍ରହଣ କରାଯାଇଛି।
ସୂଚନା ମୁତାବକ ଗତ ରବିବାର ରାତିରେ ମା’ଙ୍କ ସେବକ ସାଙ୍ଗରେ ପୋଥି ଓ ମାଆଙ୍କ ପ୍ରତିମୂତ୍ତି ଧରି ପ୍ରଥମେ ମନ୍ଦିରରେ ପ୍ରବେଶ କରିଥିଲେ । ଏହାପରେ ଘଣ୍ଟ, ମାଦଳ, ଛତି, ତ୍ରାଶଧରି ସେବାୟତ ନିକଟସ୍ଥ ପୋଖରୀରୁ 16 ଗୋଟି କଳସରେ ଜଳ ଆଣି ମାଆଙ୍କୁ ସ୍ନାନ କରାଇଥିଲେ। ରୀତିନୀତି ଅନୁସାରେ ପ୍ରଥମେ ଘଟପୂଜା, ଚକ୍ଷୁଦାନ, ଆଖୁ ଓ ପାଣିକଖାରୁ ବଳି ମାଆଙ୍କ ପାଖରେ ସମର୍ପଣ କରାଯାଇଥିଲା। ସୋମବାର ସକାଳୁ ମା’ ଶ୍ରଦ୍ଧାଳଙ୍କୁ ରାଜରାଜେଶ୍ଵରୀ ବେଶରେ ଦର୍ଶନ ଦେଉଛନ୍ତି । ବିଶ୍ବାସ ରହିଛି ମାଆଙ୍କ ନିକଟରେ ଯେଉଁ ଭକ୍ତ ମନସ୍କାମନା ରଖେ ତାହା ପୂରଣ ହୋଇଥାଏ।
ପ୍ରକାଶ ଥାଉ କି ପୂର୍ବରୁ ଏଠାରେ ହଜାର ହଜାର ସଂଖ୍ୟାରେ ପଶୁବଳି ଦିଆଯାଉଥିବା ବେଳେ ଦୀର୍ଘ ବର୍ଷ ହେବ ପ୍ରଶାସନ ପକ୍ଷରୁ ଏହା ଉପରେ ରୋକ ଲଗାଯିବା ପରେ ପାଣିକଖାରୁକୁ ବଳି ଦିଆଯାଇ ପୂଜାର୍ଚ୍ଚନା କରାଯାଉଛି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
