ବ୍ରହ୍ମଗିରି: ୨୦୧୯ରେ ଫନି ଝଡର ମାଡରେ ଛାରଖାର ହୋଇଯାଇଥିଲା ଉପକୂଳ ଓଡିଶା । ବିଶେଷଭାବେ ପୁରୀର ବ୍ରହ୍ମଗିରି ବ୍ଲକ ଅଞ୍ଚଳରେ ତାଣ୍ଡବ ରଚିଥିଲା ଫନି । ଅନେକଙ୍କ ମୁଣ୍ଡରୁ ଛାତ ଉଡି ଯାଇଥିବାବେଳେ ଆଉ କେତେକ ଲୋକଙ୍କ ରୋଜଗାର ଛଡାଇ ନେଇଥିଲା । ଯାହାର ଭରଣା କରିବାକୁ ରାଜ୍ୟ ସରକାର କ୍ଷତିଗ୍ରସ୍ତଙ୍କ ପାଇଁ ସହାୟତା ରାଶି ଘୋଷଣା କରିଥିଲେ । ହେଲେ ବ୍ରହ୍ମଗିରି ବ୍ଲକରେ ଏହି ସରକାରୀ ଟଙ୍କା ବାଟବଣା ହୋଇଥିବା ଅଭିଯୋଗ ଆସିଛି । ଯାହାକୁ ବିରୋଧ କରି ଫନି କ୍ଷତିଗ୍ରସ୍ତ ସଂଗ୍ରାମ ସମିତି ପକ୍ଷରୁ ଶତାଧିକ କ୍ଷତିଗ୍ରସ୍ତ ହାତରେ ଝାଡୁ ଧରି ଗଣ ଆନ୍ଦୋଳନ କରିଛନ୍ତି ।
ଆନ୍ଦୋଳନକାରୀଙ୍କ କହିବା କଥା, ଅଞ୍ଚଳରେ ଯେଉଁମାନଙ୍କ ପକ୍କା ଘର ସେମାନଙ୍କୁ ଫନି ସହାୟତା ରାଶି ମିଳିଛି । ହେଲେ ପ୍ରକୃତ ହିତାଧିକାରୀ ଆଜି ବି ସହାୟତାରୁ ବଞ୍ଚିତ । ଆରଆଇ ଲାଞ୍ଚ ନେଇ ଫନି କ୍ଷତିଗ୍ରସ୍ତ ଚୟନ ଏବଂ ସହାୟତା ଟଙ୍କା ବଣ୍ଟନରେ ବ୍ୟାପକ ଦୁର୍ନୀତି କରିଛନ୍ତି । ଯାହାକୁ ପ୍ରତିବାଦ କରି ଶତାଧିକ ଫନି କ୍ଷତିଗ୍ରସ୍ତ ଝାଡୁ ଧରି ବିକ୍ଷୋଭ କରିବା ସହ ୫ ଦଫା ଦାବି ନେଇ ବ୍ରହ୍ମଗିରି ତହସିଲ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି ।
ବ୍ରହ୍ମଗିରିରୁ ଦେବାଶିଷ ଦାସ, ଇଟିଭି ଭାରତ
