ପୁରୀ: ନବବର୍ଷ ସାଙ୍ଗକୁ ଆଜି ନୂଆବର୍ଷ । ନବବର୍ଷର ଆଗମନକୁ ନେଇ ସବୁଠି ଉତ୍ସବର ମାହୋଲ । ନୂଆବର୍ଷରେ ପହିଲି ସୂର୍ଯ୍ୟୋଦୟ ଦେଖିବାକୁ ଚନ୍ଦ୍ରଭାଗା ବେଳାଭୂମିରେ ଶ୍ରଦ୍ଧାଳୁଙ୍କ ପ୍ରବଳ ଭିଡ ଦେଖିବାକୁ ମିଳିଛି । ପବିତ୍ର ଶାମ୍ବ ଦଶମୀ ପାଇଁ ବେଳାଭୂମିରେ ସାମୁହିକ ସୂର୍ଯ୍ୟ ପୂଜା ମଧ୍ୟ କରିଛନ୍ତି ଶ୍ରଦ୍ଧାଳୁ ( devotees Surya Puja on Samba Dashami ) ।
ସକଳ ଶକ୍ତିର ଆଧାର ସୂର୍ଯ୍ୟ । ପବିତ୍ର ଶାମ୍ଵ ଦଶମୀ ତିଥିରେ ସୂର୍ଯ୍ୟ ଦେବତାଙ୍କୁ ପୂଜା କରାଯାଏ । ଶାମ୍ବ ଦଶମୀରେ ପ୍ରଭୁ ସୂର୍ଯ୍ୟଙ୍କୁ ପୂଜାର୍ଚ୍ଚନା କଲେ ରୋଗ, ଶୋକ ଦୂର ହେବା ସହ ପାରିବାରର ମଙ୍ଗଳ ହୋଇଥାଏ । ଏଣୁ ଆଜି ଦିନରେ ମାଆ ମାନେ ନିଜ ପିଲାର ମଙ୍ଗଳ ପାଇଁ ପ୍ରଭୁ ସୂର୍ଯ୍ୟ ଦେବତାଙ୍କୁ ପୂଜାର୍ଚ୍ଚନା କରନ୍ତି । କୋଣାର୍କ ଚନ୍ଦ୍ରଭାଗା ବେଳା ଭୂମିରେ ସୂର୍ଯ୍ୟ ଦେବତାଙ୍କ ପୂଜାର୍ଚ୍ଚନା କରିଛନ୍ତି ଶ୍ରଦ୍ଧାଳୁ ।
ପୌରାଣିକ କିମ୍ଵଦନ୍ତୀ ଅନୁସାରେ କୃଷ୍ଣଙ୍କ ପୁତ୍ର ଶାମ୍ଵ ଅଭିଶପ୍ତ ହୋଇ କୃଷ୍ଠ ରୋଗରେ ପୀଡିତ ହୋଇଥିଲେ । ପବିତ୍ର ଚନ୍ଦ୍ରଭାଗାରେ ବୁଡ ପକାଇବା ପରେ ରୋଗ ମୁକ୍ତ ହୋଇଥିବାର ବିଶ୍ଵାସ ରହିଛି । ସୂର୍ଯ୍ୟ ଦେବତାଙ୍କୁ ଆଜି ଘରେ ଘରେ ପୂଜା କରିଥାନ୍ତି ଶ୍ରଦ୍ଧାଳୁ । ଏଣୁ ନୂଆବର୍ଷରେ ପ୍ରଭୁ ସୂର୍ଯ୍ୟ ଦେବତାଙ୍କୁ ପୂଜା କରିବା ପାଇଁ ଚନ୍ଦ୍ରଭାଗା ବେଳଭୂମିରେ ହଜାର ହଜାର ଭକ୍ତଙ୍କ ଭିଡ ଦେଖିବାକୁ ମିଳିଛି । ଚନ୍ଦ୍ରଭାଗା ବେଳଭୂମିରେ ପହିଲି ସୂର୍ଯ୍ୟୋଦୟ ଦେଖିବାକୁ ଶ୍ରଦ୍ଧାଳୁଙ୍କ ସମାଗମ ହୋଇଛି ।
ଏହା ବି ପଢନ୍ତୁ...ଶ୍ରୀମନ୍ଦିରକୁ ସ୍ମାର୍ଟଫୋନ ନେଇ ପାରିବେନି ସେବାୟତ, ଆଜିଠୁ ଲାଗିଲା କଟକଣା
ସେପଟେ ପରମ୍ପରା ଅନୁସାରେ କୋଣାର୍କରେ ସୂର୍ଯ୍ୟ ରଥଯାତ୍ରା ଅନୁଷ୍ଠିତ ହୋଇଥାଏ । ହୋମ ଓ କଳସ ସ୍ଥାପନ ପରେ ସୂର୍ଯ୍ୟଙ୍କ ବିଗ୍ରହକୁ ରଥକୁ ଅଣାଯିବା ପରେ ରଥ ଉପରେ ବରା, କାକରା ଓ ପୋଡ ପିଠା ଲାଗି କରାଯିବ । ଅବଦୁତ ମଠରୁ ଏହି ରଥ ବାହାରି ଚନ୍ଦ୍ରଭାଗା ପର୍ଯ୍ୟନ୍ତ ଯାଇ 27 ଦିନ ପର୍ଯ୍ୟନ୍ତ ସେଠାରେ ରହି ପୂଜାର୍ଚ୍ଚନା କରାଯିବା ପରେ ମାଘ ସପ୍ତମୀ ଦିନ ପୁଣି ଥରେ ଅବଦୁତ ମଠକୁ ଫେରିବ ଏହି ରଥ । କୋଣାର୍କରେ ମଧ୍ୟ ଶ୍ରଦ୍ଧାଳୁଙ୍କ ଭିଡ ଦେଖିବାକୁ ମିଳିଛି ।
ଏହା ବି ପଢନ୍ତୁ...New Year 2023: ମହାପ୍ରଭୁଙ୍କ ଦର୍ଶନରୁ ନୂଆବର୍ଷ ଆରମ୍ଭ, ଲୋକାରଣ୍ୟ ଶ୍ରୀକ୍ଷେତ୍ର
ଇଟିଭି ଭାରତ, ପୁରୀ
