ପୁରୀ: ଆଉ ଦିନକ ପରେ ବିଶ୍ବ ପ୍ରସିଦ୍ଧ ଘୋଷଯାତ୍ରା । ବର୍ଷକର ଅପେକ୍ଷା ପରେ ପୁଣି ରତ୍ନ ବେଦୀରୁ ବାହାରି ଆସି ମାଉସୀ ଘରକୁ ଯିବେ ଚତୁର୍ଦ୍ଧାମୂର୍ତ୍ତି । ସେଥିପାଇଁ ଚଳଚଞ୍ଚଳ ହୋଇଉଠିଲାଣି ରଥଖଳା । ତିନି ରଥକୁ ଶେଷ ସ୍ପର୍ଶ ଦେବାକୁ ଆପ୍ରାଣ ଉଦ୍ୟମ ଜାରି ରଖିଛନ୍ତି ସେବକ । ଗତକାଲି ଦୁଆର କାମ ଶେଷ ହେବା ପରେ ଆଜି ତିନି ରଥକୁ ସଂଯୋଗ କରାଯାଇଛି ।
ଅନ୍ୟପଟେ ପ୍ରଭା କାମ ଏହାରି ମଧ୍ୟରେ ଶେଷ ହୋଇଥିବା ବେଳେ ରାତି ସୁଦ୍ଧା ପ୍ରଭା ସଂଯୋଗ କାର୍ଯ୍ୟ ଶେଷ କରିବାକୁ ଲକ୍ଷ୍ୟ ରଖାଯାଇଛି । ସେହିପରି ତିନି ରଥ ପାଇଁ ବେଦୀ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ବେଦୀ କାମ ବ୍ୟତୀତ ଚାଳି ମଧ୍ୟ ଖୋଲାଯାଇଛି । ଏହି କାର୍ଯ୍ୟକୁ ଭୋଇ ସେବକମାନେ ସମ୍ପାଦନ କରିଛନ୍ତି ।
ତେବେ ଦର୍ଜି ସେବକ ମାନେ ରଥକନା ସିଲେଇ କାମ ଶେଷ କରିଥିବା ବେଳେ ମହାରଣା ସେବକ ମାନେ ମଧ୍ୟ ରଥ ନିର୍ମାଣ କାମ ଶେଷ ସ୍ପର୍ଶ ଦେବାରେ ଲାଗିଛନ୍ତି । ଅନ୍ୟପଟେ ରଥଯାତ୍ରାକୁ ମଝିରେ ଆଉ ମାତ୍ର ଗୋଟିଏ ଦିନ ଥିବାରୁ ଆସନ୍ତାକାଲି ସୁଦ୍ଧା ସମସ୍ତ କାର୍ଯ୍ୟ ସମାପନ କରାଯିବ ବୋଲି ବିଶ୍ବକର୍ମା ମହାରଣା କହିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
