ପୁରୀ: ଆସୁଛି ରଥଯାତ୍ରା । ଏନେଇ ମଙ୍ଗଳବାରଠାରୁ ରଥଖଳାରେ ତିନି ରଥର ନିର୍ମାଣ କାର୍ଯ୍ୟ ଆରମ୍ଭ ନେଇ ଶ୍ରୀମନ୍ଦିର ପରିଚାଳନା କମିଟି ନିଷ୍ପତ୍ତି ନେଇଛି । ଏହାକୁ ମାନି ପ୍ରସ୍ତୁତି ଆରମ୍ଭ କରିଛନ୍ତି ବିଶ୍ବକର୍ମା ମହାରଣା ସେବକ । ମଙ୍ଗଳବାର ସକାଳ 8 ଟାରେ ରଥଖଳାରେ ଅନୁକୂଳ ପରେ ରଥ ନିର୍ମାଣ ଆରମ୍ଭ କରିବେ ମହାରଣା ସେବକ । ଅକ୍ଷୟ ତୃତୀୟାଠାରୁ ରଥ ନିର୍ମାଣ ଆରମ୍ଭ ହେବାର ବିଧି ରହିଥିଲେ ମଧ୍ୟ ଲକଡାଉନ ଯୋଗୁଁ ଏହା ସମ୍ଭବପର ହୋଇ ପାରିନଥିଲା ।
ତେବେ ତୃତୀୟ ପର୍ଯ୍ୟାୟ ଲକଡାଉନରେ ପୁରୀ ଜିଲ୍ଲା ଗ୍ରୀନ ଜୋନରେ ରହିଥିବାରୁ ନିର୍ମାଣ କାର୍ଯ୍ୟ ନେଇ କୌଣସି କଟକଣା ରଖାଯାଇନାହିଁ । ତେଣୁ ରଥ ନିର୍ମାଣ କାର୍ଯ୍ୟ ପୂର୍ବପରି କରିବା ନେଇ ଘୋଷଣା ହୋଇଥିଲା । ବର୍ତ୍ତମାନ ହାତରେ ଅଳ୍ପ ଦିନ ରହିଥିବାରୁ ଦିନ ରାତି ଏକ କରି ଅଧିକ ସମୟ କାର୍ଯ୍ୟ କରି ରଥ ନିର୍ମାଣ ସାରିବାକୁ ମହାରଣା ସେବକମାନେ କହିଛନ୍ତି । ଏନେଇ ମହାରଣା ସେବକଙ୍କ ଉପସ୍ଥିତିରେ ଶ୍ରୀମନ୍ଦିର କାର୍ଯ୍ୟଳୟରେ ଏକ ବୈଠକ ଅନୁଷ୍ଠିତ ହୋଇଛି । ଶ୍ରୀମନ୍ଦିର ନୀତି ପ୍ରଶାସକ ଜିତେନ୍ଦ୍ର ସାହୁଙ୍କ ଅଧ୍ୟକ୍ଷତାରେ ଏହି ବୈଠକ ବସିଥିଲା ।
ରଥ ନିର୍ମାଣ କାର୍ଯ୍ୟ ପାଇଁ ମହାରଣାମାନେ ଅଧିକ ସମୟ ଦେବାକୁ ଥିବାରୁ ସେମାନଙ୍କୁ ଅଧିକ ମଜୁରୀ ଦିଆଯିବ ବୋଲି ନିଷ୍ପତ୍ତି ହୋଇଛି । ସାମାଜିକ ଦୂରତ୍ବ କଟକଣାକୁ ନଜରରେ ରଖି ରଥ ନିର୍ମାଣ ହେବ । ତେବେ ହାତରେ ଅଳ୍ପ ଦିନ ଥିବା ବେଳେ ମହାପ୍ରଭୁଙ୍କ ଆଶୀର୍ବାଦରେ ରଥ ନିର୍ମାଣ କାର୍ଯ୍ୟ ସଠିକ ସମୟରେ ସରିବ ବୋଲି ନନ୍ଦିଘୋଷ ରଥର ମୁଖ୍ୟ ମହାରଣା ବିଜୟ ମହାପାତ୍ର କହିଛନ୍ତି ।
ଆସନ୍ତା ଜୁନ 23ରେ ରଥଯାତ୍ରା ହେବାକୁ ଥିବା ବେଳେ ଏପ୍ରିଲ 26ରେ ଅକ୍ଷୟ ତୃତୀୟାରୁ ରଥ ନିର୍ମାଣ ଅନୁକୂଳ ହେବାର ପରମ୍ପରା ରହିଛି । ହେଲେ ଦ୍ବିତୀୟ ପର୍ଯ୍ୟାୟ ଲକଡାଉନ କଟକଣା ଯୋଗୁଁ ରଥ ନିର୍ମାଣ ଅନୁକୂଳ ଶ୍ରୀମନ୍ଦିର ଭିତରେ କରାଯାଇ ରଥଖଳାରେ ରଥ ନିର୍ମାଣ ବନ୍ଦ ରହିଥିଲା ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
