ପୁରୀ: ଜିଲ୍ଲା ସ୍ଥିତ କାକଟପୁର ଥାନା ଅନ୍ତର୍ଗତ ଓଥକା ସୁହାଣପୁର ରାସ୍ତାର ସିଙ୍ଗାପଦା ଠାରେ ଥିବା ଚାଷଜମିରୁ ଏକ ମୃତଦେହ ଉଦ୍ଧାର ହୋଇଛି । କେତେକ ଶ୍ରମିକ ଜମିରେ କାମ କରୁଥିବା ସମୟରେ ମୃତଦେହ ଦେଖିବାକୁ ପାଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ଏବଂ ତଦନ୍ତକାରୀ ସଂସ୍ଥା ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
ଗ୍ରାମବାସୀଙ୍କ କହିବା ଅନୁଯାୟୀ ମୃତଦେହଟି ଏକ ମହିଳାର ଏବଂ କେହି ତାଙ୍କୁ ହତ୍ୟା କରିଥିବା ଆଶଙ୍କା କରାଯାଉଛି । ଖବର ପାଇ କାକଟପୁର ଥାନା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ତଦନ୍ତ ଚଳାଇ ଥିବାବେଳେ କେବଳ ଅସ୍ଥି କେତେଖଣ୍ଡ ପଡିଥିବାରୁ ମୃତଦେହକୁ ଚିହ୍ନଟ କରିବା ପାଇଁ ସମୟ ଲାଗିପାରେ । ଅନ୍ୟପଟେ ଫୋରେନସିକ ଏକ୍ସପର୍ଟ ଘଟଣାସ୍ଥଳରେ ପହଞ୍ଚି ମୃତଦେହ ବ୍ୟବଚ୍ଛେଦ ପାଇଁ ପଠାଇଛି ।
ପରେ ଘଟଣା ସ୍ଥଳରେ ନିମାପଡା ଏସଡିପିଓ ଏବଂ କାକଟପୁର ତହସିଲଦାର ପହଞ୍ଚିଛନ୍ତି । ସେପଟେ ମୃତ୍ୟୁର କାରଣ ଅସ୍ପଷ୍ଟ ଥିବାବେଳେ ପାରିପାର୍ଶ୍ବିକ ସ୍ଥିତିକୁ ଦେଖି ମୃତ ମହିଳାଜଣକ ଗ୍ରାମର ସୁର କାଣ୍ତିଙ୍କ ଝିଅ ଉଷା କାଣ୍ତି ବୋଲି ସନ୍ଦେହ କରାଯାଉଛି । ଏନେଇ ନିଖୋଜ ଝିଅଙ୍କ ବାପା ସୁର କାଣ୍ଡି କହିଛନ୍ତି " ମୋ ଝିଅ କିଛିଦିନ ହେବ ନିଖୋଜ ଥିବାରୁ ମୁଁ କାକଟପୁର ଥାନାରେ ଏତଲା ଦେଇଛି । ସେ ମାନସିକ ବିକାରଗ୍ରସ୍ତ, ପୂର୍ବରୁ ବହୁ ଥର ଘରୁ ନିଖୋଜ ହୋଇଯାଏ ଏବଂ ପୁଣି ମଧ୍ୟ ଆସେ । ମାତ୍ର ଏହି ମୃତେଦହଟି ମୋ ଝିଅର ବୋଲି ଜଣାପଡୁନାହିଁ ।"
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
