ପୁରୀ: ହସ୍ପିଟାଲରେ ରୋଗୀଙ୍କୁ ଉତ୍ତମ ଚିକିତ୍ସା ଯୋଗାଇବାକୁ ରାଜ୍ୟ ସରକାରଙ୍କ 'ମୋ ସରକାର' କାର୍ଯ୍ୟକ୍ରମ । ଏହି କାର୍ଯ୍ୟକ୍ରମ ନାଁରେ 5 'ଟି' ସଚିବ ଓ ତାଙ୍କ ଟିମ୍ ଘନଘନ ବିଭିନ୍ନ ହସ୍ପିଟାଲକୁ ଗସ୍ତ କରୁଛନ୍ତି । ଏତେ ପ୍ରକାରର ବ୍ୟବସ୍ଥା ପରେ ମଧ୍ୟ ବାସ୍ତବ ଚିତ୍ର ସମ୍ପୂର୍ଣ୍ଣ ଭିନ୍ନ । ସ୍ବାସ୍ଥ୍ୟସେବାର ଏଭଳି ନଗ୍ନ ଚିତ୍ର ଦେଖିବାକୁ ମିଳିଛି ପୁରୀ ଡେଲାଙ୍ଗ ମେଡିକାଲରେ । ହସ୍ପିଟାଲରେ ଜଣେ ରୋଗୀଙ୍କ ମୃତ୍ୟୁ ପରେ ତାଙ୍କ ସମ୍ପର୍କୀୟ ମୃତଦେହକୁ ବାଇକରେ ନେଇ ଯାଉଥିବାର ଦୃଶ୍ୟ ଏବେ ସୋସିଆଲ ମିଡିଆରେ ଭାଇରାଲ ହେଉଛି ।
ସୂଚନାନୁସାରେ ଡେଲାଙ୍ଗ ଉଦୟପୁର ଗ୍ରାମର ଅକୃତ ଜେନାଙ୍କ ଦେହ ଖରାପ ହେବାରୁ ତାଙ୍କୁ ଡେଲାଙ୍ଗ ମେଡ଼ିକାଲରେ ଭର୍ତ୍ତି କରାଯାଇଥିଲା । ମାତ୍ର ମେଡ଼ିକାଲରେ ପହଞ୍ଚିବା ପରେ ହୃଦଘାତରେ ତାଙ୍କର ମୃତ୍ୟୁ ହୋଇଥିବା ଡାକ୍ତର କହିଥିଲେ । ପରେ ଅକୃତଙ୍କ ମୃତଦେହ ନେବାକୁ ସମ୍ପର୍କୀୟମାନେ ମହାପ୍ରୟାଣ ଗାଡି କିମ୍ବା ଆମ୍ବୁଲାନ୍ସ ଦେବାକୁ ଅନୁରୋଧ କରିଥିଲେ । ହେଲେ ମେଡ଼ିକାଲ କର୍ତ୍ତୃପକ୍ଷ ହସ୍ପିଟାଲରେ ମହାପ୍ରୟାଣ ଗାଡି କିମ୍ବା ଅନ୍ୟ ଗାଡି କିଛି ନଥିବା କହିଥିଲେ । ବାହାରେ ଅଟୋ ବୁଝିବାରୁ ସେ ମାତ୍ର 3କିମି ରାସ୍ତାକୁ 1000 ଟଙ୍କା କହିଥିଲା । ଏତେ ପଇସା ଦେବାକୁ ଅକ୍ଷମ ଥିବା ମୃତ ଅକୃତଙ୍କ ସମ୍ପର୍କୀୟ ଏକ ବାଇକ ଯୋଗେ ତାଙ୍କ ମୃତଦେହକୁ ଘରକୁ ନେଇଥିଲେ । ବାଟରେ କିଛି ବ୍ୟକ୍ତି ଏହି ଘଟଣାକୁ ମୋବାଇଲରେ କଏଦ କରି ସୋସିଆଲ ମିଡିଆରେ ଛାଡିବା ପରେ ଘଟଣା ଲୋକଲୋଚନକୁ ଆସିଥିଲା ।
ଉକ୍ତ ଘଟଣାର ଭିଡିଓ ଭାଇରାଲ ପରେ ଏବେ ରାଜ୍ୟ ସରକାରଙ୍କ 'ମୋ ସରକାର' ଏବଂ 5 'ଟି' ସଚିବ ଓ ତାଙ୍କ ସଚିବଙ୍କ ଗସ୍ତ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
