ନୂଆପଡା: ଜିଲ୍ଲ ସୁନାବେଡା ଅଭୟାରଣ୍ୟ ସୋସେଙ୍ଗ ଗ୍ରାମପଞ୍ଚାୟତ ସ୍ଥିତ ଜଳମଡେଇ ଗାଁରେ ଗତକାଲି ବାଘ ଆତଙ୍କ ଖେଳାଇଥିଲା । ଘର ପଛପଟ ବାଡ଼ିକୁ ଜାଳେଣି କାଠ ସଂଗ୍ରହ ପାଇଁ ଯାଇଥିବାବେଳେ 65ବର୍ଷୀୟା ବୃଦ୍ଧଙ୍କୁ ବାଘ ଝାମ୍ପି ନେଇଥିଲା । ସାନମତି ବାରିକଙ୍କୁ ମହାବାଳ ଝାମ୍ପି ଖାଇଥିବା ଅଭିଯୋଗ ହୋଇଥିଲା । କିନ୍ତୁ ମହାବାଳ ନୁହେଁ କଲରାପତରିଆ ବୃଦ୍ଧାଙ୍କୁ ଘୋଷାଡି ନେଇଥିବା ବନ ବିଭାଗ ପକ୍ଷକୁ ସୂଚନା ମିଳିଛି ।
ସାନମତି ଜଙ୍ଗଲକୁ କାଠ ସଂଗ୍ରହ ପାଇଁ ଯାଇଥିଲେ । ଏହି ସମୟରେ ତାଙ୍କୁ ବାଘ ଝାମ୍ପି ନେଇଥିଲା । ଜଳମଡେଇ ଗାଁ ଲୋକେ ଏକାଠୀ ହୋଇ ଠେଙ୍ଗା ବାଡ଼ି ଧରି ବାଘକୁ ଘଉଡାଇ ଥିଲେ । ଜଙ୍ଗଲରୁ ବୃଦ୍ଧାଙ୍କ ଖଣ୍ଡ ବିଖଣ୍ଡିତ ମୃତଦେହ ଉଦ୍ଧାର ହୋଇଥିଲା । ବୃଦ୍ଧାଙ୍କୁ ମହାବଳ ବାଘ ଆକ୍ରମଣ କରିଥିବା ଗ୍ରାମବାସୀ ଅଭିଯୋଗ କରିଥିଲେ । ଅଭିଯୋଗ ପାଇ ସୁନାବେଡା ବନ୍ୟପ୍ରାଣୀ ସୁରକ୍ଷା ବିଭାଗ ଫରେଷ୍ଟର ଶିବରାମ ମାଝୀଙ୍କ ନେତୃତ୍ବରେ ଏକଟିମ ଜଳମଡେଇ ଗାଁକୁ ଯାଇ ତଦନ୍ତ ଆରମ୍ଭ କରିଥିଲେ ।
ତଦନ୍ତ ବେଳେ ଜଳମଡେଇ ଗାଁର 65 ବର୍ଷୀୟ ମହିଳା ସାନମତି ବାରିକଙ୍କୁ ବାଘ ଝାମ୍ପି ମାରି ଖାଇଥିବା ଘଟଣା ସତ ହୋଇଥିବା ବେଳେ, ମହାବଳ ବାଘ ଝାମ୍ପି ଖାଇଥିବା ଗାଁ ଲୋକଙ୍କ ଅଭିଯୋଗକୁ ଖଣ୍ଡନ କରିଛନ୍ତି ଫରେଷ୍ଟର ଶିବରାମ ମାଝୀ । ସାନମତି ବାରିକଙ୍କୁ ମହାବଳ ବାଘ ଝାମ୍ପି ଖାଇନାହିଁ, କଲରାପତରିଆ ବାଘ ଝାମ୍ପିଥିବା ସ୍ପଷ୍ଟ କରିଛନ୍ତି ଫରେଷ୍ଟର । ଘଟଣାସ୍ଥଳରେ ପୋଲିସ , ସୁନାବେଡା ବନ୍ୟପ୍ରାଣୀ ସୁରକ୍ଷା ବିଭାଗ ପହଞ୍ଚି ମହିଳାଙ୍କ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛନ୍ତି । ଏହି ଘଟଣା ଘଟିବା ପରେ ଜଳମଡେଇ ଗାଁ ସହିତ ଆଖ ପାଖ ଗାଁ ଲୋକଙ୍କ ମଧ୍ୟରେ ବାଘ ଆତଙ୍କ ଖେଳି ଯାଉଛି । ସଞ୍ଜ ହେଲେ ତାଟି ପଡୁଛି ।
ଏହା ବି ପଢନ୍ତୁ...ବାଡିରୁ ମହିଳାଙ୍କୁ ଝାମ୍ପି ନେଲା ମହାବଳ, ଆତଙ୍କିତ ଗାଁ ଲୋକ
ନୂଆପଡା ଜିଲ୍ଲାର ଜଙ୍ଗଲୀ ଇଲାକା ଗାଁ ଗୁଡିକରେ କଲରାପତରିଆ ବାଘ ଆତଙ୍କ ଦିନକୁ ଦିନ ବୃଦ୍ଧି ପାଇବାରେ ଲାଗିଛି । 2017 ମସିହାରେ ହଳଦୀ ଗାଁର 4 ବର୍ଷର ଛଗନ ପାଣ୍ଡେ ନାମକ ଶିଶୁକୁ ମାରି ଖାଇଥିଲା ବାଘ । ସେହିଭଳି ସିନାପାଲି ବନାଞ୍ଚଳ ଅଧିନସ୍ଥ ହୀରାପୁର ଗାଁର ସେନାପତି ମାଝୀ ନାମକ ଯୁବକଙ୍କୁ କଲରାପତରିଆ ବାଘ ଆକ୍ରମଣ କରିଥିଲା । ସେହିଭଳି ଗତ ସପ୍ତାହରେ ଲୋଡ୍ର ଗାଁରେ ଗାଈ,ଘୁଷୁରୀ,ଛେଳି ମାରି ଖାଇଥିଲା କଲରାପତରିଆ ବାଘ । ଏବେ ପୁଣି ଜଳମଡେଇ ଗାଁରେ ମହିଳାଙ୍କୁ ବାଘ ଝାମ୍ପି ନେଇଛି । ବାରମ୍ବାର ଘଟଣା ଘଟିବ ଚାଲିଥିବାବେଳେ ସରକାର ଉପଯୁକ୍ତ ପଦକ୍ଷେପ ଗ୍ରହଣ କରିବା ଜରୁରୀ ହୋଇ ପଡିଛି ।
ଇଟିିଭି ଭାରତ, ନୂଆପଡା
