ନୂଆପଡା: ସ୍ଥାନୀୟ ଖଡ଼ିଆଳ ବ୍ଲକ ବନ ପାହାଡ଼ ଘେରା ସମାଡ଼ପଦର ଗାଁରେ ଦେଖା ଦେଇଛି ଅଭାବନୀୟ ଘଟଣା । ଦୀର୍ଘ 4 କିଲୋମିଟର ଦୁର୍ଗମ ପାଦ ଚଲା ରାସ୍ତାରୁ ଷ୍ଟ୍ରେଚରରେ ବୁହା ହେଲେ ଗର୍ଭବତୀ ମହିଳା । ସୂଚନା ଅନୁଯାୟୀ ଅବହେଳିତ ବନ ପାହାଡ଼ ଘେରା ସମାଡ଼ପଦର ଗାଁର ଖଗେଶ୍ବର ମାଝୀଙ୍କ ସ୍ତ୍ରୀ ରେମତି ମାଝୀଙ୍କୁ ଶନିବାର ବିଳମ୍ବିତ ରାତିରେ ଜନନୀ ଯନ୍ତ୍ରଣା ହୋଇଥିଲା । ହେଲେ ଦୁର୍ଗମ ପାହାଡିଆ ରାସ୍ତା କାରଣରୁ ତଳ ଗାଁକୁ ଓହ୍ଲାଇ ଚିକିତ୍ସା ପାଇଁ ନିକଟସ୍ଥ ଖଡ଼ିଆଳ ଉପଖଣ୍ଡ ସ୍ବାସ୍ଥ୍ୟକେନ୍ଦ୍ରକୁ ନେବା ସମ୍ଭବ ହୋଇପାରିନଥିଲା ।
ବିକଳ୍ପ ନପାଇ ରାତି ସାରା ଅପେକ୍ଷା କରିବା ପରେ ଜନନୀ ଯନ୍ତ୍ରଣାରେ ଛଟପଟ ହେଉଥିଲେ ରେମତି ମାଝୀ । ଫଳରେ ରବିବାର ସକାଳେ ତାଙ୍କୁ ନେବା ପାଇଁ ତିନିକୋ ଛକ ପାହାଡ଼ ତଳେ ଆମ୍ବୁଲାନ୍ସ ପହଞ୍ଚିଥିଲା । ପରେ ଗାଁ ଲୋକଙ୍କ ସାହାଯ୍ୟରେ ଆଶା ଦିଦି ବାସନ୍ତୀ ମାଝି ଦମ୍ଭ ଦେଖାଇ ଷ୍ଟ୍ରେଚରରେ ଗର୍ଭବତୀ ରେମତି ମାଝୀଙ୍କୁ ବୋହି ଆମ୍ବୁଲାନ୍ସ ପାଖରେ ପହଞ୍ଚାଇଛନ୍ତି ।
ଅପରପକ୍ଷେ ସ୍ବାଧୀନତାର 74 ବର୍ଷ ପରେ ମଧ୍ୟ ସମାଡ଼ପଦର ଗାଁ ଲୋକେ ମୌଳିକ ଅଧିକାରରୁ ବଞ୍ଚିତ । ରାସ୍ତା, ବିଜୁଳି, ପାଣି ଭଳି ଏକାଧିକ ମୌଳିକ ଅଧିକାରରୁ ଏମାନେ ବଞ୍ଚିତ । ହେଲେ ସବୁ ଜାଣି ବି ସତେ ଯେମିତି ନିରବଦ୍ରଷ୍ଟା ସାଜିଛନ୍ତି ସରକାର।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
