ନୂଆପଡା : ଜିଲ୍ଲାକୁ ପୋଲିସ ମହାନିର୍ଦ୍ଦେଶକ ଅଭୟ, ଉତ୍ତର ପଶ୍ଚିମାଞ୍ଚଳ DIG ରାଜେଶ ପଣ୍ଡିତ ଗସ୍ତ କରିଛନ୍ତି । ଦିନିକିଆ ଗସ୍ତରେ ସେ ମାଓପ୍ରବଣ ଅଞ୍ଚଳ ଓ ପଡୋଶୀ ଛତିଶଗଡ଼ ରାଜ୍ୟ ଗରିଆବନ୍ଧ ସୀମାନ୍ତ ଅଞ୍ଚଳରେ ମାଓବାଦୀଙ୍କ ଗତିବିଧି ନେଇ ସମୀକ୍ଷା କରିଛନ୍ତି । ପୂର୍ବରୁ ସୁନାବେଡା ଅଭୟାରଣ୍ୟ ଏବଂ ଛତିଶଗଡ଼ ରାଜ୍ୟ ଗରିଆବନ୍ଧ ସୀମାନ୍ତ ମେନପୁର ଅଞ୍ଚଳରେ ମାଓବାଦୀଙ୍କ ହିଂସା ଅଧିକ ରହିଥିଲା । ଯାହାକି ବର୍ତ୍ତମାନ ଯଥେଷ୍ଟ କମିଯାଇଛି ।
ମାଓବାଦୀମାନେ ହିଂସା ଛାଡି ସମାଜର ମୁଖ୍ୟ ସ୍ରୋତରେ ସାମିଲ ହୁଅନ୍ତୁ ଏବଂ ସରକାରଙ୍କର ଯୋଜନାର ଲାଭ ଉଠାନ୍ତୁ ବୋଲି ପୋଲିସ ମହାନିର୍ଦ୍ଦେଶକ ଅଭୟ ଅପିଲ କରିଛନ୍ତି । ରାଜ୍ୟରେ ମାଓବାଦୀଙ୍କ ଗତିବିଧି ନିୟନ୍ତ୍ରଣ କରିବାରେ ଓଡ଼ିଶା ପୋଲିସ, ସିଆରପିଏଫ ଯବାନ, ଏସଓଜି ଓ ଡିଭିଏଫଙ୍କ କାର୍ଯ୍ୟ ପ୍ରଂଶସନୀୟ । ଏନେଇ ସମସ୍ତ ଯବାନଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି ଡିଜି । ବିଭାଗୀୟ ଅଧିକାରୀଙ୍କ ସହ ମାଓ ସମୀକ୍ଷା ବୈଠକ ପର ଆକାଶ ମାର୍ଗରୁ ଜିଲ୍ଲାର ମାଓ ପ୍ରବଣ ଅଞ୍ଚଳ ପରିଦର୍ଶନ କରି ଫେରିଥିଲେ ଉଭୟ ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
