ନୂଆପଡା: ଜିଲ୍ଲାରେ ଦିନ କୁ ଦିନ ଚାଷୀ ଅସନ୍ତୋଷ ବଢ଼ିବାରେ ଲାଗିଛି । ମାସ ମାସ ଧରି ମଣ୍ଡିରେ ଧାନ ପଡିରହି ଥିବାବେଳେ ଏନେଇ ଚାଷୀ ଉଦବେଗ ପ୍ରକାଶ କରିଛନ୍ତି । ଜିଲ୍ଲା ସ୍ଥିତ ନିଲଜି ଧାନମଣ୍ଡିରେ ବର୍ଷାପାଣିରେ ଧାନ ଓଦା ହେଉ ଥିବାବେଳେ ବୁଲା ଗାଈ ବଳଦ ଧାନକୁ ଖାଇ ନଷ୍ଟ କରୁଥିବା ଦେଖିବାକୁ ମିଳିଛି ।
ନୂଆପଡାରେ ଧାନବିକ୍ରି ସମସ୍ୟାକୁ ନେଇ ଚାଷୀ ଅସନ୍ତୋଷ
ଚଳିତ ଖରିଫ ୠତୁରେ ନିଲଜି ସମବାୟ ସମିତିରେ ସମୁଦାୟ 1120 ଜଣ ଚାଷୀ ପଞ୍ଜିକୃତ ହୋଇଛନ୍ତି । ସେଥିମଧ୍ୟରୁ 807 ଜଣ ଚାଷୀ ମଣ୍ଡିରେ ଧାନ ବିକ୍ରି କରିଛନ୍ତି । 114 ଜଣ ଚାଷୀଙ୍କ ଟୋକନ ଲାପ୍ସ ହୋଇଯାଇଛି । ଶତାଧିକ ଚାଷୀ ମଣ୍ଡିରେ ଧାନ ବିକ୍ରି କରିନପାରି ଚିନ୍ତାରେ ଭାଙ୍ଗି ପଡିଛନ୍ତି । ଆଗକୁ ସରକାର ଯାହା ନିର୍ଦ୍ଦେଶ ଦେବେ ପାଳନ କରିବେ ବୋଲି ସମବାୟ ସମିତି ସମ୍ପାଦକ ପ୍ରକାଶ କରିଛନ୍ତି । ଅପରପକ୍ଷରେ ତୁରନ୍ତ ସରକାର ମଣ୍ଡିରୁ ଧାନ ଉଠାଇ ନିଅନ୍ତୁ । ନଚେତ ମଣ୍ଡିରୁ ଚାଷୀ ଆନ୍ଦୋଳନ ଆରମ୍ଭ ହୋଇ ରାଜରାସ୍ତା ପର୍ଯ୍ୟନ୍ତ ଯିବ ବୋଲି ସମୂହ ଚାଷୀ ଚେତାବନୀ ଦେଇଛନ୍ତି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
