ଭୁବନେଶ୍ୱର: ଓଡ଼ିଶାରେ ଆୟୋଜନ ହେବାକୁ ଯାଉଛି 18ତମ ପ୍ରବାସୀ ଭାରତୀୟ ଦିବସ । ଏହି ଦିବସରେ ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କ ସମେତ ଅନେକ ହେବିଓ୍ବେଟ ସାମିଲ ହେବାକୁ ଯାଉଛନ୍ତି । ଯାହାକୁ ଦୃଷ୍ଟିରେ ରଖି ପୋଲିସ ପକ୍ଷରୁ ପ୍ରସ୍ତୁତି ଜୋରଦାର ରହିଛି । ଆଜି ସୁରକ୍ଷା ବ୍ୟବସ୍ଥାକୁ ନେଇ ମକଡ୍ରିଲ କରିଛି କମିଶନରେଟ ପୋଲିସ ।
ଜାନୁଆରୀ 8 ତାରିଖରୁ ହେବାକୁ ଯାଉଛି ପ୍ରବାସୀ ଭାରତୀୟ ଦିବସ । ଭୁବନେଶ୍ୱରକୁ ବିଶ୍ୱର ବିଭିନ୍ନ କୋଣ ଅନୁକୋଣରେ ରହୁଥିବା ଭାରତୀୟମାନଙ୍କ ସୁଅ ଛୁଟିବ । ଏହିସହ ଏହି ଦିବସରେ ସାମିଲ ହେବେ ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କ ଠାରୁ ଆରମ୍ଭ କରି ଅନେକ ହେବିଓ୍ବେଟ । ତେବେ ଏନେଇ ରାଜଧାନୀରେ ଚାଲିଛି ବଡଧରଣର ସୁରକ୍ଷା ପ୍ରସ୍ତୁତି। କୌଣସି ଅଘଟଣକୁ ଏଡାଇବା ପାଇଁ ପୋଲିସ ପକ୍ଷରୁ ଆଣ୍ଟି କମ୍ବାଟ ଅପରେସନର ମକଡ୍ରିଲ କରାଯାଇଛି ।
ସୁରକ୍ଷା ବ୍ୟବସ୍ଥା କଡାକଡି
ଏୟାରପୋର୍ଟ, ରାଜଭବନ, ଜନତା ମଇଦାନ, ତାରକା ହୋଟେଲ ସମେତ ବିଭିନ୍ନ କାର୍ଯ୍ୟକ୍ରମ ସ୍ଥଳଗୁଡିକରେ ସୁରକ୍ଷା ବ୍ୟବସ୍ଥା ଯାଞ୍ଚ କରାଯାଉଛି । ହୋଟେଲ ଗୁଡିକରେ ହେବିଓ୍ବେଟମାନଙ୍କର ରହଣି ନିମନ୍ତେ ମଧ୍ୟ ସମସ୍ତ ପ୍ରକାର ବ୍ୟବସ୍ଥା କରାଯାଇଛି । ଜନତା ମଇଦାନରେ ହେବାକୁ ଥିବା ପ୍ରବାସୀ ଭାରତୀୟ ଦିବସର କାର୍ଯ୍ୟକ୍ରମ ସ୍ଥଳରେ ଆଜି (ରବିବାର) ପୋଲିସ ପକ୍ଷରୁ ଆଣ୍ଟି କମ୍ବାଟ ଅପରେସନ କରାଯାଇଛି । ଓଡ଼ିଶା ପୋଲିସର କାଉଣ୍ଟର ଟେରରିଷ୍ଟ ସ୍କ୍ୱାର୍ଡ, ସ୍ପେଶାଲ ଟାକ୍ଟିକାଲ ୟୁନିଟ୍, ବମ୍ ସ୍କ୍ୱାର୍ଡ, ଡଗ ସ୍କ୍ୱାର୍ଡ ମିଳିତ ଭାବେ ଆଣ୍ଟି କମ୍ବାଟ ଅପରେସନର ମକଡ୍ରିଲ କରିଛନ୍ତି ।
ଆଣ୍ଟି କମ୍ବାଟ ଅପରେସନ
ପ୍ରବାସୀ ଭାରତୀୟ ଦିବସରେ ଅନେକ ହେବିଓ୍ବେଟ ସାମିଲ ହେଉଥିବାରୁ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ଆତଙ୍କୀ ହମଲା କିମ୍ବା ସେଭଳି କିଛି ଘଟଣା ଘଟିଲେ ଏହାର ମୁକାବିଲା କରିବା ପାଇଁ ଆଣ୍ଟି କମ୍ବାଟ ଅପରେସନ କରାଯାଇଛି । ଜନତା ମଇଦାନର ଚତୁଃପାର୍ଶ୍ୱରେ ସେଭଳି କିଛି ଆତଙ୍କୀ କାର୍ଯ୍ୟକଳାପ ଘଟିଲେ ତାର କିଭଳି ମୁକାବିଲା କରିହେବ କିମ୍ବା କିଭଳି ରୋକାଯିବ ତାହାର ଆଜି ମକଡ୍ରିଲ କରାଯାଇଛି । ଟେରୋରିଷ୍ଟ ସ୍କ୍ୱାର୍ଡ, ସ୍ପେଶାଲ ଟାକ୍ଟିକାଲ ୟୁନିଟ୍, ବମ୍ ସ୍କ୍ୱାର୍ଡ, ଡଗ ସ୍କ୍ୱାର୍ଡ, ଅଗ୍ନିଶମ ବିଭାଗ କିଭଳି କାର୍ଯ୍ୟ କରିବେ ସେନେଇ ରିହରସଲ କରାଯାଇଛି । ପୋଲିସ ଡିଜି ଓ୍ବାଇ ବି ଖୁରାନିଆ ଉପସ୍ଥିତ ରହି ଏହାର ତଦାରଖ କରିଥିଲେ ।
ମୁଖ୍ୟଶାସନ ସଚିବ ଓ ଡିଜିଙ୍କ ତଦାରଖ
ଆଜି ମୁଖ୍ୟଶାସନ ସଚିବ ମନୋଜ ଆହୁଜା ଓ ପୋଲିସ ଡିଜି ଓ୍ବାଇ ବି ଖୁରାନିଆ, ଜନତା ମଇଦାନରେ ପହଞ୍ଚି ଟିମ ସହ ସୁରକ୍ଷା ବ୍ୟବସ୍ଥା ସମ୍ପର୍କରେ ଆଲୋଚନା କରିବା ସହ ତଦାରଖ କରିଥିଲେ । ଅତିଥି ଓ ଭିଭିଆଇପିମାନଙ୍କର ପ୍ରବେଶ ପଥ, ସାଂସ୍କୃତିକ କାର୍ଯ୍ୟକ୍ରମ ପାଇଁ କରାଯାଇଥିବା ଷ୍ଟେଜ, ଖାଇବା ପିଇବା ସ୍ଥାନଗୁଡିକର ମଧ୍ୟ ଯାଞ୍ଚ କରିଥିଲେ ।
ଜଗିବେ ୯୦ପ୍ଲାଟୁନ
ଏନେଇ ଟ୍ୱିନସିଟି ଭୁବନେଶ୍ୱର ଓ କଟକରେ ୯୦ ପ୍ଲାଟୁନ ଫୋର୍ସ ମୁତୟନ ହେବେ । ରାଜ୍ୟ ପୋଲିସର ୬୦ ପ୍ଲାଟୁନ ସମେତ ସେଣ୍ଟ୍ରାଲ ଫୋର୍ସର ୩୦ପ୍ଲାଟୁନ ଫୋର୍ସ ବ୍ୟବସ୍ଥା କରାଯାଇଛି । ଏନେଇ ଟ୍ରାଫିକ ଠାରୁ ଆରମ୍ଭ କରି ପୋଲିସ ମୁତୟନ ପର୍ଯ୍ୟନ୍ତ ସମସ୍ତ ଡ୍ୟୁଟିରେ ରହିବାକୁ ଥିବା ଅଫିସର ଓ ପୋଲିସ କର୍ମଚାରୀମାନେ କଣ କଣ ପଦକ୍ଷେପ ନେବେ ସେନେଇ ଆଲୋଚନା କରିଛନ୍ତି ପୋଲିସ କମିଶନର ।
ପ୍ରବାସୀଙ୍କ ୧୪୦ ଲିଏଜନ ଅଫିସର
ଆମନ୍ତ୍ରିତ ପ୍ରବାସୀମାନଙ୍କୁ ଏୟାରପୋର୍ଟରେ ସ୍ୱାଗତ କରିବାଠୁ ନେଇ ସେମାନଙ୍କ ଫେରିବା ପର୍ଯ୍ୟନ୍ତ ସେମାନଙ୍କ ସହ ଜଣେ ଲେଖାଏଁ ଅଫିସର ନିୟୋଜିତ ରହିବେ । ଏନେଇ ୫୦୦ ଅଫିସରଙ୍କ ମଧ୍ୟରୁ ୧୪୦ଜଣଙ୍କୁ ଲିଏଜନ ଅଫିସର ଭାବେ ଚୟନ କରାଯାଇଛି । ସେମାନଙ୍କ ମଧ୍ୟରେ ଓଏଏସ, ଓଏଫଏସ ରାଙ୍କର ଅଫିସର ରହିଛନ୍ତି । ଅନେକ ନବନିଯୁକ୍ତ ଅଫିସର ମଧ୍ୟ ରହିଛନ୍ତି । ସେମାନଙ୍କୁ ତାଲିମ ଦେଇଛନ୍ତି ଗୃହ ସଚିବ ସତ୍ୟବ୍ରତ ସାହୁ ଓ ବୈଦେଶିକ ମନ୍ତ୍ରଣାଳୟ ସଚିବ ଅଙ୍କନ ବାନାର୍ଜୀ । ଅତିଥିମାନଙ୍କୁ ଓଡ଼ିଶାର ବିଭିନ୍ନ କଳା ଓ ପର୍ଯ୍ୟଟନ ବିଷୟରେ ଅବଗତ କରାଇବେ । ସେହିପରି ୧୫ଜଣ ନବ ନିଯୁକ୍ତ ଆଇପିଏସ ଅଫିସର ମଧ୍ୟ ନିୟୋଜିତ କରାଯାଇଛି ।
ପୋଲିସ ଡିଜି ଓ୍ବାଇ ବି ଖୁରାନିଆ କହିଛନ୍ତି," କମିଶନରେଟ ପୋଲିସ ପକ୍ଷରୁ ସୁରକ୍ଷା ବନ୍ଦୋବସ୍ତ କରାଯାଇଛି । ସମସ୍ତ ପ୍ରକାର ଦିଗକୁ ନଜରରେ ରଖାଯାଇଛି । ଭିଆଇପି ସୁରକ୍ଷା ସହ ଟ୍ରାଫିକ ଓ ଇଣ୍ଟେଲିଜେନସ ଓ ଅନ୍ୟାନ୍ୟ ସନ୍ଦିଗ୍ଧ ଗତିବିଧି ପ୍ରତି ମଧ୍ୟ ଇଣ୍ଟେଲିଜେନସ ନଜର ରଖିଛି ।"
ଭୁବନେଶ୍ୱର, ଇଟିଭି ଭାରତ
