ନୂଆପଡା: ପୁଣି ଦାଦନ ଦୁଃଖ । ବାହାର ରାଜ୍ୟକୁ ପେଟ ପୋଷିବାକୁ ଯାଉଥିବା ଦାଦନ ପେଟପାଟଣାକୁ ଲାତ । ଦିନକୁ ଦିନକୁ ବଢୁଛି ସେମାନଙ୍କ ପ୍ରତି ମାନସିକ ଓ ଶାରୀରିକ ଅତ୍ୟାଚର । ଗତ କିଛିଦିନ ତଳେ ବ୍ରହ୍ମପୁରର 2 ଜଣ ଦାଦନଙ୍କ ଓଡିଶା ଫେରିଆସିବାର ଭିଡିଓ ଭାଇରାଲ ହୋଇଥିଲା ।
ହେଲେ ଏବେ ଆଉ ଏକ ହୃଦୟବିଦାରକ ଘଟଣା ଘଟିଛି । ସାମାନ୍ୟ କଥାକୁ କେନ୍ଦ୍ର କରି ଡାହାଣ ଗୋଡ଼ ପାଞ୍ଚ ଅଙ୍ଗୁଳି କାଟିବା ସହ ଡାହାଣ ହାତ ପାପୁଲିକୁ ଧାରୁଆ ମାରଣାସ୍ତ୍ରରେ ଆକ୍ରମଣ କଲେ ଶ୍ରମିକ ଦଲାଲ । ଏହି ଅଭାବନୀୟ ଘଟଣାଟି ଘଟିଛି ନୂଆପଡା ଜ଼ୀଲ୍ଲା କୋମନା ବ୍ଲକ ତିକ୍ରାପଡା ଗାଁ ପହରିଆପଡାରେ ।
ଖବର ଅନୁଯାୟୀ, ଦାଦନ ଶ୍ରମିକ ଚମାର ପହରିଆ ୬ ମାସ ପୂର୍ବେ ଶ୍ରମିକ ଦଲାଲ ଡୋଳାମଣି ସତନାମୀ ଏବଂ ବିଦେଶ ସୁନାନୀ ପ୍ରଚୁର ଅର୍ଥର ପ୍ରଲୋଭନ ଦେଖାଇ ସୁଦୂର ନାଗପୁରକୁ ନେଇଯାଇଥିଲେ । ସେଠାରେ କାମରେ ନିୟୋଜିତ ଥିଲେ ଶ୍ରମିକ ଚମାର ପହରିଆ । ହେଲେ ନିଜ କାମର ପ୍ରାପ୍ୟ ମାଗିବା ପରେ ଦୁଇ ଦଲାଲ ମାଡ ମାରି ହତ୍ୟା ଉଦ୍ୟମ କରିଥିବା ଶ୍ରମିକ ଅଭିଯୋଗ କରିଛନ୍ତି ।
ନାଗପୁର ରେଳ ଷ୍ଟେସନରେ ନିଶାସକ୍ତ ହୋଇ ଶ୍ରମିକଙ୍କୁ ନିସ୍ତୁକ ମାଡମାରି ଡାହାଣ ଗୋଡ଼ ପାଞ୍ଚ ଆଙ୍ଗୁଳି କାଟି ଦେଇଛନ୍ତି । ସେତିକିରେ ରାଗ ଶାନ୍ତି ନହୋଇ ଡାହାଣ ପାପୁଲିରେ ମଧ୍ୟ ଧାରୁଆ ଅସ୍ତ୍ରରେ ଆକ୍ରମଣ କରି ରେଳ ଷ୍ଟେସନରେ ଛାଡ଼ିଦେଇ ଖସି ଚାଲି ଯାଇଥିଲେ ।
ଗୁରୁତର ଅବସ୍ଥାରେ ନାଗପୁର ରେଳ ଷ୍ଟେସନ ପୋଲିସ ଚମାରଙ୍କ ଉଦ୍ଦାର କରି ନାଗପୁର ସିଟି ହସ୍ପିଟାଲରେ ଭର୍ତ୍ତି କରିଥିଲେ । ଆଜି ଗୁରୁତର ଶ୍ରମିକ ନିଜ ଗାଁ ଫେରିବା ପରେ ଏହି ଘଟଣା ସାମ୍ନାକୁ ଆସିଛି । ଏବେ ଶ୍ରମିକ ଜଣକ ଜ଼ିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଛନ୍ତି । ଖବର ପାଇ ନୂଆପଡା ବିଧାୟକ ରାଜେନ୍ଦ୍ର ଢୋଲକିଆ ପୀଡିତ ଶ୍ରମିକ ଜଣଙ୍କୁ ଭେଟିବା ସହ ଘଟଣା ବିଷୟରେ ପଚାରି ବୁଝିଛନ୍ତି ।
ନୂଆପଡାରୁ ମୋତିଲାଲ ବାଗ୍, ଇଟିଭି ଭାରତ
