ନୂଆପଡା: ଚାଷୀଙ୍କୁ ପୁଣି ଧୋକା ଦେଇଛି ବର୍ଷା । ମୌସୁମି ଆସିଲା ଆରମ୍ଭରୁ ବର୍ଷିଲା । ଭଲ ବର୍ଷାକୁ ଦେଖି ଖୁସିରେ ଫାଟି ପଡିଥିଲେ ଚାଷୀ । ହେଲେ ଆଷାଢ ଯାଇ ଶ୍ରାବଣ ଆସିଲା ବେଳକୁ ଆକାଶରୁ ଉଭାନ ହୋଇଯାଇଛି ବର୍ଷା । କେବଳ ବର୍ଷା ଉଭାନ ହୋଇନି ଯେ ଚାଷୀଙ୍କ ମୁହଁରୁ ହସ ଛଡାଇ ନେଇଛି । ପାଣି ଅଭାବରୁ ଜମି ଫାଟି ଆଁ କରିଛି । ଶୁଖିଲା ଜମିରେ କେମିତି ଚାଷ ହେବ ତାକୁ ନେଇ ଚିନ୍ତାରେ ଚାଷୀ ।
ଭିଡିଓ ସୌଜନ୍ୟ: ପ୍ରତିନିଧି, ନୂଆପଡା
ବର୍ଷାର ଲୁଚକାଳୀ ଖେଳରେ ଭାଙ୍ଗି ପଡିଛନ୍ତି ଚାଷୀ । ସମଗ୍ର ନୂଆପଡାରେ ଜିଲ୍ଲାରେ ଏବେ ମରୁଡିର ପଦଧ୍ବନି । ବିଶେଷ କରି ସିନାପାଲି, ବୋଡେନ, କୋମନା, ନୂଆପଡା ଓ ଖଡିଆଳ ବ୍ଲକର ଚାଷୀ ମୁଣ୍ଡରେ ହାତ ଦେଇ ବସିଲେଣି । ତେବେ ସରକାରୀ ରେକର୍ଡ ଅନୁସାରେ ଜୁଲାଇ ମାସରେ ସ୍ବାଭାବିକ୍ ବର୍ଷା ଠାରୁ ପ୍ରାୟ 50 ପ୍ରତିଶତ କମ ବର୍ଷା ହୋଇଛି । ଆଗକୁ ସ୍ବାଭାବିକ ବର୍ଷା ହେବ, ବିଚଳିତ ନେବାକୁ ପରାମର୍ଶ ଦେଇଛନ୍ତି ଜିଲ୍ଲା କୃଷି ଅଧିକାରୀ ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
