ନୟାଗଡ଼: ପିଡ଼ିଏସ ସାମଗ୍ରୀ ଚୋରା ଚାଲାଣ ଅଭିଯୋଗରେ ଟ୍ରକକୁ ଧରି ପୋଲିସକୁ ଜିମା ଦେଲେ ଗ୍ରାମବାସୀ l ଏଭଳି ଏକ ଘଟଣା ଦେଖିବାକୁ ମିଳିଛି ନୟାଗଡ ଜ଼ିଲ୍ଲା ରଣପୁର ବ୍ଲକ ଅନ୍ତର୍ଗତ ରଙ୍କଦେଉଳି ପଞ୍ଚାୟତରେ l ଅଭିଯୋଗ ଅନୁସାରେ, ରଙ୍କଦେଉଳି ପଞ୍ଚାୟତର ପିଡ଼ିଏସ ଚାଉଳ ଗୋଦାମ ଗୃହରୁ କିଛି ଲୋକ ପିଡ଼ିଏସ ଚାଉଳ ବସ୍ତାକୁ ବଦଳାଇ OD25D6478 ନମ୍ବରର ଏକ ମିନିଟ୍ରକରେ ଲୋଡ଼ କରୁଥିଲେ l ଏହାକୁ ଦେଖି ଗ୍ରାମବାସୀଙ୍କ ମନରେ ସନ୍ଦେହ ସୃଷ୍ଟି ହୋଇଥିଲା l ଚାଉଳ ବୋଝେଇ ଟ୍ରକଟି ରଙ୍କଦେଉଳିରୁ ଗୋଡିପଡା ଅଭିମୁଖେ ଯାଇଥିବାବେଳେ ଗ୍ରାମବାସୀ ଟ୍ରକଟିକୁ ଅଟକାଇବାକୁ ଚେଷ୍ଟା କରିବାରୁ ଡ୍ରାଇଭର ଗାଡି ମଡ଼ାଇ ଦେଇ ଖସିଯିବାକୁ ଉଦ୍ୟମ କରୁଥିବାବେଳେ ଗୋଡିପଡା ଠାରେ ଟ୍ରକଟି କାବୁ କରାଯାଇଥିଲା l
ଟ୍ରକ ସହ ଡ୍ରାଇଭରକୁ ରଣପୁର ଥାନାରେ ଜିମା ଦେବା ସହ ଗ୍ରାମବାସୀଙ୍କ ଦ୍ଵାରା ରଣପୁର ଥାନରେ ଏକ ଲିଖିତ ଅଭିଯୋଗ କରାଯାଇଛି l ଅନ୍ୟପଟେ ରଣପୁର ବ୍ଲକର ଯୋଗାଣ ଅଧିକାରିଣୀ ଅନିତା ରାଉତରାୟ ଏହି ଘଟଣାକୁ ଖଣ୍ଡନ କରିବା ସହ ରଙ୍କଦେଉଳି ପଞ୍ଚାୟତରେ ପିଡ଼ିଏସ ଚାଉଳ ହେରଫେର ହୋଇନଥିବା କହିଥିବା ସୂଚନା ମିଳିଛି l ତେବେ ଏହି ଚାଉଳ କାହାର ଏବଂ କେଉଁଆଡେ ଯାଉଥିଲା ଏହାର ଭିଜିଲାନ୍ସ ତଦନ୍ତ ପାଇଁ ଗ୍ରାମବାସୀ ଦାବି କରିଛନ୍ତି l
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
