ନୟାଗଡ: ଏକ ଲୁଟ ଘଟଣାର ପର୍ଦ୍ଦାଫାଶ କରିବାରେ ସଫଳ ହୋଇଛି ନୟାଗଡ ଜିଲ୍ଲା ପୋଲିସ । 3 କୁଖ୍ୟାତ ଅପରାଧୀଙ୍କୁ ଧରିବା ସହ ଲକ୍ଷାଧିକ ଟଙ୍କାର ସ୍ବର୍ଣ୍ଣ ଅଳଙ୍କାର ଜବତ କରିବାରେ ସଫଳ ହୋଇଛି ପୋଲିସ । ଏନେଇ ଏକ ପ୍ରେସମିଟ କରି ନୟାଗଡ଼ ଏସପି ସିଦ୍ଧାର୍ଥ କଟାରିଆ ସୂଚନା ଦେଇଛନ୍ତି । ରଣପୁର ଥାନା ଆଇଆଇସି ଜ୍ୟୋତି ପ୍ରକାଶ ପଣ୍ଡା, ଶରଣକୂଳ ଏସଡ଼ିପିଓ ଏସ. ଟପ୍ପୋଙ୍କ ଉପସ୍ଥିତିରେ ଏହି ସାମ୍ବାଦିକ ସମ୍ମିଳନୀ କରାଯାଇଥିଲା ।
ପୋଲିସ ପକ୍ଷରୁ ମିଳିଥିବା ସୂଚନା ଅନୁସାରେ ,ଗତ 21ତାରିଖ ସକାଳ ସମୟରେ ରଣପୁର ଥାନା ସଂଖେଇ ଗ୍ରାମର ସ୍ବର୍ଣ୍ଣ ଅଳଙ୍କାର ବ୍ୟବସାୟୀ ଅରୁଣ କୁମାର ସାହୁ ନିଜ ବାଇକ ଯୋଗେ ବ୍ୟବସାୟ କ୍ଷେତ୍ରକୁ ଯିବାବେଳେ ଲୁଟର ଶିକାର ହୋଇଥିଲେ । 3 ଦୁବୃର୍ତ୍ତ ମାରଣାସ୍ତ୍ର ଦେଖାଇ ଅରୁଣଙ୍କ ଠାରୁ ଅଳଙ୍କାର ଭର୍ତ୍ତି ବ୍ୟାଗ ଲୁଟି ନେଇ ଘଟଣାସ୍ଥଳରୁ ଫେରାର ହୋଇଯାଇଥିଲା ।
ଏନେଇ ରଣପୁର ଥାନାର ଦ୍ବାରସ୍ଥ ହୋଇ ଅଭିଯୋଗ କରିଥିଲେ ଅରୁଣ । ପୋଲିସ ତଦନ୍ତ କରି 3 ଡକାୟତଙ୍କୁ ଗିରଫ କରିଛି । ଗିରଫ ଅଭିଯୁକ୍ତମାନେ ହେଲେ ସଦର ଥାନା ଅନ୍ତର୍ଗତ ପଦ୍ମପୁର ଗ୍ରାମର ବିଜୟ ରାଉତ, ଖଣ୍ଡୁ ଗାଁର ସୁଶାନ୍ତ ପ୍ରଧାନ ଏବଂ ବୋଲଗଡ଼ ଥାନା ଘୋରଡ଼ିଆ ଗ୍ରାମର ସନ୍ତୋଷ ସାହୁ । ଗିରଫ ଅଭିଯୁକ୍ତଙ୍କ ଠାରୁ 2460 ଗ୍ରାମ ରୂପା, 149 ଗ୍ରାମ ସ୍ବର୍ଣ୍ଣ ଅଳଙ୍କାର ସହ 3 ଟି ମୋବାଇଲ, ଏକ ଭୁଜାଲି ଓ ଡକାୟତିରେ ବ୍ୟବହାର ହୋଇଥିବା ଏକ ପଲସର ବାଇକକୁ ମଧ୍ୟ ଜବତ କରିଛି ପୋଲିସ ।
ନୟାଗଡରୁ ଜୟେନ୍ଦ୍ର ବେହେରା, ଇଟିଭି ଭାରତ
