ନୟାଗଡ଼: ଦୀର୍ଘ ଦିନର ନିରବତା ପରେ ଏବେ ବୃତଙ୍ଗ ନଦୀବନ୍ଧ ଯୋଜନାକୁ ନେଇ ଆରମ୍ଭ ହୋଇଛି ରାଜନୀତି । କିଛିଦିନ ତଳେ ବୃତଙ୍ଗ କ୍ରିୟାନୁଷ୍ଠାନ କମିଟି ପ୍ରକଳ୍ପ କାର୍ଯ୍ୟକାରୀ ଦାବିରେ ପଦଯାତ୍ରା କରିଥିବା ବେଳେ ଏବେ ଏହାକୁ ବିରୋଧ କରି ମେଳି କରିଛି ପ୍ରକଳ୍ପ ବିରୋଧି ସଂଗ୍ରାମ ସମିତି ।
ତେବେ କୌଣସି ସମ୍ଭାବନା ନ ଥାଇ ହଠାତ କ୍ରିୟାନୁଷ୍ଠାନ କମିଟି ପ୍ରକଳ୍ପ ଦାବି କରି ପଦଯାତ୍ରା କରିବା ଓ ବିସ୍ଥାପନ ବିରୋଧି ସମିତି ମେଳି ବାନ୍ଧିବା ଲୋକଙ୍କ ମନରେ ଅନେକ ପ୍ରଶ୍ନବାଚୀ ସୃଷ୍ଟି କରିଛି । ନୟାଗଡ ଜିଲ୍ଲା କୁଲୁରୁକୁମ୍ପା ,ବାଣିଗୋଛା ଓ ତୁମାଣ୍ଡି ଆଦି ୩ ଟି ପଞ୍ଚାୟତର ୨୨ ଖଣ୍ଡ ଗାଁ ଲୋକଙ୍କ ମନରେ ଏବେ ଏଭଳି ଅନେକ ପ୍ରଶ୍ନ ସୃଷ୍ଟି ହୋଇଛି । କାରଣ ପ୍ରକଳ୍ପ ହେଲେ ୨୨ ଖଣ୍ଡ ଗାଁ ଜଳମଗ୍ନ ହେବା ସହ ସେମାନଙ୍କୁ ନିଜ ଭିଟାମାଟି ହରାଇବେ । ଏହାର ପ୍ରତିବାଦରେ ଏକାଠି ହୋଇଛନ୍ତି ୩ ଟି ପଞ୍ଚାୟତର ଶହ ଶହ ଲୋକେ । ମରିବୁ ପଛେ ନିଜ ଭିଟାମାଟି ଛାଡି କୁଆଡେ ଯିବୁ ନାହିଁ ବୋଲି କହିବା ସହ ପ୍ରସ୍ତାବିତ ସ୍ଥାନରେ ପ୍ରକଳ୍ପ କରାଇ ନ ଦେବାକୁ ରଣନୀତି କରୁଛନ୍ତି । ସ୍ଥାନୀୟ ବିଜେଡି ନେତା ତଥା ଦଶପଲ୍ଲା ବ୍ଳକର ଉପାଧ୍ୟକ୍ଷ ବସନ୍ତ ସାହୁ ଏହାର ନେତୃତ୍ବ ନେଉଛନ୍ତି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
