ନୟାଗଡ଼: ଜିଲ୍ଲାରେ ଭୂତ ଖାଉଛନ୍ତି ଚାଉଳ ଓ ଗହମ । ରାସନକାର୍ଡ ଚାଉଳ ଓ ଗହମ ବଣ୍ଟନରେ ବଡ଼ ଦୁର୍ନୀତି ସାମନାକୁ ଆସିଛି । ୩୦୮୬ଟି ରାସନ କାର୍ଡରେ କୋଟିକୋଟି ଟଙ୍କାର ଚାଉଳ ଗହମ ଦୁର୍ନୀତି ହୋଇଥିବା ଅଭିଯୋଗ ଆଣିଛନ୍ତି ଆଇନଜୀବୀ ରଣଜିତ ଦାଶ । ଏହି ଘଟଣାର ତଦନ୍ତ ଦାବି କରି ସେ ଲୋକାୟୁକ୍ତଙ୍କ ଦ୍ବାରସ୍ଥ ହୋଇଛନ୍ତି । ରାଜ୍ୟ ଯୋଗାଣ ମନ୍ତ୍ରୀ, ଯୋଗାଣ ସଚିବ, ନୟାଗଡ ଜିଲ୍ଲାପାଳ, ଜିଲ୍ଲା ଯୋଗାଣ ଅଧିକାରୀଙ୍କ ସମେତ ଜିଲ୍ଲାର ସମସ୍ତ ବ୍ଲକ NACର ମାର୍କେଟିଂ ଇନ୍ସପେକ୍ଟରଙ୍କୁ ପକ୍ଷଭୁକ୍ତ କରି ମାମଲା ଦାଖଲ କରିଛନ୍ତି ନୟାଗଡ଼ର ବରିଷ୍ଠ ଆଇନଜୀବୀ ରଣଜିତ ।
ରାଜ୍ୟ ସରକାର ପ୍ରତ୍ୟେକ ରାସନ କାର୍ଡଧାରୀଙ୍କୁ ହଜାରେ ଟଙ୍କା ଲେଖାଏଁ କୋଭିଡ ସହାୟତା ଅର୍ଥରାଶି ପ୍ରଦାନ କରିଥିଲେ । ଜିଲ୍ଲାର ସମସ୍ତ ରାସନକାର୍ଡ ହିତାଧିକାରୀ ସେମାନଙ୍କର ପ୍ରାପ୍ୟ ନେଇଯିବା ପରେ ୩୦୮୬ ହିତାଧିକାରୀ ଏବଂ ରଣପୁର ବ୍ଲକ ଏନଏସିକୁ ମିଶାଇଲେ ଏହି ସଂଖ୍ୟା ୫ ହଜାରକୁ ଟପିଯାଇଛି । ଜାତୀୟ ଖାଦ୍ୟ ନିରାପତ୍ତା ଆଇନ ୨୦୧୩ ପରଠାରୁ ପ୍ରତ୍ୟେକ ଗରିବ ପରିବାର ସଭ୍ୟମାନଙ୍କ ପ୍ରତି ମାସିକ ୫କିଲୋ ଚାଉଳ ଗହମ କିଲୋ ପିଛା ୧ ଟଙ୍କାରେ ଯୋଗାଇ ଦିଆଯାଉଛି ।
ଯଦି ଜିଲ୍ଲାରେ ୫ ହଜାର ଭୂତ ରାସନ କାର୍ଡ ହିତାଧିକାରୀଙ୍କ ନାଁରେ ଚାଉଳ ଗହମ ପ୍ରତି କାର୍ଡ ପିଛା ଅନ୍ୟୁନ ୨୦/୨୫ କେଜି ହଡପ ହେଉଥାଏ, ତେବେ କାର୍ଡପିଛା ମାସିକ ୭୫୦ ଟଙ୍କା ଓ ୫୦୦୦ କାର୍ଡରେ ମାସକୁ ୩୭,୫୦,୦୦୦ ଟଙ୍କା ହେଉଛି । ବର୍ଷକୁ ହିସାବ କଲେ ୪ କୋଟି ୫୦ ଲକ୍ଷ ହଡପ ହେଉଛି । କେତେବର୍ଷ ହେଲା ଏମିତି ଭୂତ କାର୍ଡରେ ଚାଉଳ ଗହମ ହଡପ ହେଉଛି ତାହା ତଦନ୍ତ ହେଲେ ଜଣାପଡ଼ିବ । ସେଥିପାଇଁ ଆଇନଜୀବୀ ରଣଜିତ ଦାଶ ଲୋକଯୁକ୍ତଙ୍କ ଦ୍ବାରସ୍ଥ ହୋଇ ଏ ନେଇ ତଦନ୍ତ ଦାବି କରିଛନ୍ତି ।
ଇଟିଭି ଭାରତ, ନୟାଗଡ଼
