ନୟାଗଡ଼: ଜିଲ୍ଲା ରଣପୁର ଥାନା ଅଧିନ ଦର୍ପନାରାୟଣପୁର ଫାଣ୍ଡି ଗୋଡ଼ିମଡ଼ା ଗାଁରୁ ଆସିଥିବା ଅଭାବନୀୟ ଚିତ୍ରକୁ ନେଇ ଚର୍ଚ୍ଚା ଜୋର ଧରିଛି । ଏହି ଗାଁର ଗଗନ ପାତ୍ର ଏବଂ ତାଙ୍କ ପତ୍ନୀ ଜ୍ୟୋସ୍ନା ପାତ୍ର 4 ଦିନ ତଳେ କରୋନାରେ ଆକ୍ରାନ୍ତ ଥିବା ଜାଣିବାକୁ ପାଇଥିଲେ । ଉଭୟ ଗୃହ ସଂଗରୋଧରେ ଥିଲେ । ନିଜ ପୁଅ ଡମ୍ବରୁ ପାତ୍ର ମଧ୍ୟ କରୋନାରେ ଆକ୍ରାନ୍ତ ହୋଇ ପୁରୀରେ ଚିକିତ୍ସାଧୀନ ଅଛନ୍ତି । ସମସ୍ତେ କରୋନାରେ ଆକ୍ରାନ୍ତ ହେବାରୁ ମାନସିକ ଚିନ୍ତାରେ ଆତ୍ମହତ୍ୟା କରିଥିଲେ ଦମ୍ପତି । ସନ୍ଧ୍ୟାରେ ଅନ୍ତିମ ସଂସ୍କାର କରାଯାଇଛି ।
ପରିବାର କିମ୍ବା ଗାଁ ଲୋକେ ଏଥିରେ କେହି ସହଯୋଗ ନକରିବାରୁ ବାଧ୍ୟ ହୋଇ ନିଜ ଜ୍ୱାଇଁ ସଞ୍ଜୟ ସେନାପତି ଶେଷରେ ସବୁ କାର୍ଯ୍ୟ କରିଛନ୍ତି l ସ୍ୱାମୀ-ସ୍ତ୍ରୀଙ୍କ ମୃତ ଦେହ ପୋଲିସ ଉପସ୍ଥିତିରେ 2 ଜଣ ସ୍ୱାସ୍ଥ୍ୟକର୍ମୀ ପିପିଇ କିଟ ପିନ୍ଧି ଉଦ୍ଧାର କରିଥିଲେ । 2 ଜଣ ସ୍ୱାସ୍ଥ୍ୟ କର୍ମୀ 2 ମୃତ ଦେହକୁ ଉଦ୍ଧାର କରିବାରେ ଅସୁବିଧା ହେବାରୁ ଅନ୍ୟ ମାନଙ୍କ ସହାୟତା ଲୋଡିଥିଲେ । ହେଲେ କେହି ସହାୟତାର ହାତ ବଢ଼ାଇନଥିଲେ । ଶେଷରେ ନିଜ ଜ୍ୱାଇଁ ସଂଜୟ ଜୀବନକୁ ବାଜି ଲଗାଇ ପିପିଇ କିଟ ପିନ୍ଧି ମୃତଦେହକୁ ଉଦ୍ଧାର କରିଥିଲେ । ପରେ ପୋଷ୍ଟ ମର୍ଟମ ପାଇଁ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା । ସେଠାରୁ ମୃତ ଦେହ ନିଆଯାଇ ନୟାଗଡ଼ରେ ଦାହ କରାଯାଇଥିଲେ । ଏହି ସମୟରେ କେବଳ ଜ୍ୱାଇଁ ଉପସ୍ଥିତ ଥିବା ସୂଚନା ମିଳିଛି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
