ନୟାଗଡ଼: ବାତ୍ୟା ଜୱାଦ(Cyclone Jawad) ପ୍ରଭାବରେ ନୟାଗଡ଼ ଜିଲ୍ଲାରେ ବର୍ଷା ଲାଗି ରହିଛି । ପାଗ କୋହଲା ରହିବା ସହ ତୁହାକୁ ତୁହା ବର୍ଷା ମଧ୍ୟ ହେଉଛି । ଫଳରେ ଧାନ କ୍ଷେତରେ ପାଣି ଜମି ରହିଥିବା ଦେଖିବାକୁ ମିଳିଛି । ଫଳରେ ଚିନ୍ତାରେ ପଡିଯାଇଛି ଚାଷୀ ।
ତେବେ ଧାନ ଅମଳ ସମୟରେ କ୍ଷେତରେ ଏପରି ବର୍ଷା ଜଳ ଜମିରହିବା ଦେଖିଲେ ଲାଗୁଛି ପାଚିଲା ଧାନ ଗଜା ହେବା ନିଶ୍ଚିତ । ହେକ୍ଟର ହେକ୍ଟର ଚାଷ ଜମିର ଅବସ୍ଥା ଏପରି । ଜିଲ୍ଲା ପ୍ରଶାସନ ଡାକବାଜି ଯନ୍ତ୍ର ସାହାଯ୍ୟରେ ଚାଷୀଙ୍କୁ ସୂଚନା ଦେଇଛି । କଟା ଯାଇଥିବା ଧାନକୁ ତୁରନ୍ତ ଖଳାକୁ ଆଣିବାକୁ ପରାମର୍ଶ ମଧ୍ୟ ଦିଆଯାଇଥିଲା । ଖୁବ କମ ସମୟ ମଧ୍ୟରେ ଖଳାକୁ ଆଣିବା ସମ୍ଭବ ହୋଇପାରିନାହିଁ । ସେଥିପାଇଁ ଚାଷୀ ତରବରିଆ ଭାବେ କଟା ଯାଇଥିବା ଧାନ ସାଇତି ରଖିବାକୁ ପ୍ରାଣପଣେ ଉଦ୍ୟମ କରି ବିଫଳ ହୋଇଛି ।
କିଛି ଦିନ ପୂର୍ବେ ଲଘୁଚାପ ଯୋଗୁଁ ହେକ୍ଟର ହେକ୍ଟର ଚାଷ ଜମି ଜଳମଗ୍ନ ହୋଇ ରହିଥିଲା । ଧାନ ଗଜା ମଧ୍ୟ ହୋଇଥିଲା । ଏବେ ପୁଣି ବାତ୍ୟା ଚାଷୀଙ୍କ ମେରୁଦଣ୍ଡ ଭାଙ୍ଗି ଦେଇଛି । ତେଣୁ ତୁରନ୍ତ କ୍ଷୟକ୍ଷତିର ଆକଳନ କରାଯାଇ ଚାଷୀଙ୍କୁ ପ୍ରୋତ୍ସାହନ ଯୋଗାଇଦେବାକୁ ସାଧାରଣରେ ଦାବି ହୋଇଛି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
