ନୟାଗଡ଼: ସହରର ଛାୟାପଥ ଲେନରେ ଥିବା ଏକ କ୍ଲିନିକ କରି ରୋଗୀସେବା କରୁଥିବା ଜଣେ ନକଲି ଡାକ୍ତରଙ୍କୁ ଗିରଫ କରିଛି ପୋଲିସ । ଏନେଇ ଅଭିଯୋଗ ହେବା ପରେ CDMOଙ୍କ ନିର୍ଦ୍ଦେଶରେ ଏକ ଡାକ୍ତରୀ ଟିମ ଯାଇ ଉକ୍ତ କ୍ଲିନିକରେ କାଗଜପତ୍ର ଯାଞ୍ଚ କରିବାବେଳେ ତାହା ନକଲି ବୋଲି ଜଣାପଡିଥିଲା । ପରେ ନକଲି ଡାକ୍ତରଙ୍କୁ ପୋଲିସ ହେପାଜତରେ ଦେଇଛି ଯାଞ୍ଚରେ ଆସିଥିବା ଡାକ୍ତରୀ ଦଳ । ଗିରଫ ଡାକ୍ତର ଜଣଙ୍କ ଓଡଗାଁ ନନ୍ଦିଘୋର ଗ୍ରାମର ବିଶ୍ୱନାଥ ଘଡେଇ ବୋଲି ପୋଲିସ ସୂଚନା ଦେଇଛି ।
ମିଳିଥିବା ସୂଚନା ଅନୁସାରେ, କଲ୍ୟାଣି ହସ୍ପିଟାଲ ନାମରେ ଏକ ବେଆଇନ ହସ୍ପିଟାଲ ଗଢି ଦୀର୍ଘ ଦିନ ଧରି ନକଲି ଡାକ୍ତର ସାଜି ରୋଗୀ ସେବା କରୁଥିଲେ ବିଶ୍ବନାଥ । ତେବେ ଏ ନେଇ ଅଭିଯୋଗ ହେବା ପରେ ନୟାଗଡ଼ CDMOଙ୍କ କାର୍ଯ୍ୟାଳୟରୁ ନିର୍ଦ୍ଦେଶ ପାଇ ଡାକ୍ତର ସନ୍ତୋଷ ନାୟକଙ୍କ ନେତୃତ୍ବରେ ଏକ ଟିମ ଉକ୍ତ କ୍ଲିନିକରେ ଚଢାଉ କରିଥିଲା । ଏହି ଚଢାଉରେ କ୍ଲିନିକର କାଗଜପତ୍ର ଓ ପଞ୍ଜୀକରଣ ପ୍ରମାଣପତ୍ର ନକଲି ଥିବା ଜାଣିବାକୁ ପାଇବା ସହ କ୍ଲିନିକକୁ ସିଲ କରାଯାଇଛି । ପରେ ନୟାଗଡ଼ ଟାଉନ ଥାନା ପୋଲିସ ନକଲି ଡାକ୍ତରଙ୍କୁ ଗିରଫ କରିବା ସହ ଆଜି ବିଚାର ବିଭାଗୀୟ ହାଜତକୁ ପଠାଇଥିବା ସୂଚନା ରହିଛି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
