ନୟାଗଡ଼: କ୍ଲିନିକରେ ହେଉଥିଲା ବେଆଇନ ଗର୍ଭପାତ । ଖବର ପାଇ ଚଢାଉ କଲା ପୋଲିସ । ନୟାଗଡ଼ ଟାଉନ ଥାନା ନିକଟସ୍ଥ ଆନନ୍ଦ ଭବନ ଆଦିତ୍ୟ କ୍ଲିନିକ ଏବଂ ହସ୍ପିଟାଲରେ ସ୍ପେସାଲ ସ୍କ୍ବାର୍ଡ ଏବଂ ଟାଉନ ଥାନା ପୋଲିସ ମିଳିତ ଚଢ଼ାଉ କରିଥିଲା। କ୍ଲିନିକର ମାଲିକ ସତ୍ୟପ୍ରିୟ ସ୍ବାଇଁ ଓ ଗର୍ଭପାତ କରାଇବାକୁ ଆସିଥିବା ଜଣେ ମହିଳାଙ୍କ ସ୍ୱାମୀ ଓ ସେଠାରେ କାମ କରୁଥିବା ନର୍ସଙ୍କ ସମେତ ଦଲାଲକୁ ଗିରଫ କରିଛି ପୋଲିସ । ଏହି ମାମଲାରେ ମୋଟ 5 ଜଣଙ୍କୁ ଗିରଫ କରିଛି ପୋଲିସ। ଗିରଫ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବା ନେଇ ପୋଲିସ ପକ୍ଷରୁ ସୂଚନା ମିଳିଛି ।
ଉକ୍ତ କ୍ଲିନିକକୁ ସ୍ଥାନୀୟ ତହସିଲଦାର ଅନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ ସିଲ କରିଛନ୍ତି । ବିଗତ ଦିନରେ ନୟାଗଡ଼ ସମଗ୍ର ଦେଶରେ କନ୍ୟାଭ୍ରୁଣ ହତ୍ୟା ଘଟଣାରେ କଳଙ୍କିତ ହୋଇଥିବାବେଳେ ପୁଣି ପ୍ରଶାସନର ନାକ ତଳେ ଏଭଳି ବେଆଇନ କାର୍ଯ୍ୟ ଚାଲିଥିବା ପ୍ରଶାସନ ଉଦାସୀନତାକୁ ପଦାରେ ପକାଇଛି । ତେବେ ଦୃଷ୍ଟାନ୍ତ ମୂଳକ ପଦକ୍ଷେପ ଅଭାବ କାରଣରୁ କ୍ଲିନିକ ମାଲିକମାନେ ଏଭଳି ବେଆଇନ କାର୍ଯ୍ୟକୁ ପ୍ରୋତ୍ସାହିତ କରିଚାଲିଥିବା ସାଧାରଣରେ ଚର୍ଚ୍ଚା ହେଉଛି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
