ନୟାଗଡ: ବହୁ ଚର୍ଚ୍ଚିତ ପରୀ ଅପହରଣ ଏବଂ ପରେ ହତ୍ୟା ମାମଲାରେ ଦିନକୁ ଦିନ ନୂଆ ନୂଆ ତଥ୍ୟ ସାମ୍ନାକୁ ଆସୁଛି । ଗତ 3 ଦିନ ଧରି ଏସଆଇଟି ଗିରଫ କରିନେଇଥିବା ଅଭିଯୁକ୍ତ ସରୋଜ ସେଠୀ ଦୋଷୀ ବୋଲି କହିଛନ୍ତି ଏସଆଇଟି ମୁଖ୍ୟ ଅରୁଣ ବୋଥ୍ରା । ଏନେଇ ଏସଆଇଟି ମୁଖ୍ୟ ଅରୁଣ ବୋଥ୍ରା ସାମ୍ବାଦିକ ସମ୍ମିଳନୀ କରି ସୂଚନା ଦେବାପରେ ମୁହଁ ଖୋଲିଛନ୍ତି ସରୋଜ ସେଠୀଙ୍କ ମାଆ ।
ସରୋଜଙ୍କ ମାଆ ଶୈଳବାଳା ସେଠୀ କହିଛନ୍ତି ଯେ, 'ମୋ ପୁଅ ନିର୍ଦ୍ଦୋଷ, ଆମର କେହି ଲଢିବାକୁ ନାହାଁନ୍ତି ବୋଲି ଜାଣିଶୁଣି ମୋ ପୁଅକୁ ଫସାଇ ଦିଆଯାଇଛି ।' ତେବେ ଏସବୁ ଅନ୍ୟାୟ ବୋଲି ଶୈଳବାଳା କହିଛନ୍ତି । ସୂଚନା ଅନୁଯାୟୀ ମୃତ ପରୀର ପଡୋଶୀ ସରୋଜ ସେଠୀ କିଛିଦିିନ ତଳେ ଏସଆଇଟି ମୁଖ୍ୟ ଅରୁଣ ବୋଥ୍ରାଙ୍କ ନାମରେ ସଙ୍ଗୀନ ଅଭିଯୋଗ ଆଣିଥିଲେ ।
ସରୋଜ କହିଥିଲେ ତାଙ୍କୁ ପରୀ ହତ୍ୟା ମାମଲାରେ ଦୋଷ ମୁଣ୍ଡାଇବାକୁ ବାଧ୍ୟ କରାଯାଉଛି । ଏଥିପାଇଁ ଅରୁଣ ବୋଥ୍ରା ତାଙ୍କୁ ଲାଞ୍ଚ ଯାଚିଥିବା ମଧ୍ୟ ଅଭିଯୋଗ କରିଥିଲେ ସେ । ଏହାପରେ ସରୋଜ ଏବଂ ତାଙ୍କ ମାଆ ଓ ଭଉଣୀଙ୍କୁ ତଦନ୍ତକାରୀ ସଂସ୍ଥା ଏସଆଇଟି ଟିମ୍ ଜେରା ପାଇଁ ଉଠାଇ ନେଇଥିଲା । ଜେରା ପରେ ମାଆ ଓ ଭଉଣୀକୁ ଛାଡିଦେଇ ଥିବାବେଳେ ମାମଲାରେ ସମ୍ପୃକ୍ତି ଥିବା ଅଭିଯୋଗରେ ଏସଆଇଟି ସରୋଜଙ୍କୁ ଗିରଫ କରିଥିଲା । ତେବେ ପରୀକୁ ସରୋଜ ତଣ୍ଟିଚିପି ହତ୍ୟା କରିବା ପରେ ମୃତଦେହ ସହ ଦୁଷ୍କର୍ମ କରିଥିବା ଏସଆଇଟି ମୁଖ୍ୟ ଅରୁଣ ବୋଥ୍ରା କହିବା ପରେ ଏସବୁ ତଥ୍ୟକୁ ଖଣ୍ଡନ କରିଛନ୍ତି ସରୋଜଙ୍କ ମାଆ ଶୈଳବାଳା ସେଠୀ ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
