ନବରଙ୍ଗପୁର: ଜିଲ୍ଲାର କୋଡ଼ିଙ୍ଗା ଥାନା ଅନ୍ତର୍ଗତ ଭାଲୁଗୁଡା ଓ ବାସିନୀ ଗ୍ରାମବାସୀଙ୍କ ମଧ୍ୟରେ ଗଣ୍ଡଗୋଳ । ବହୁଦିନ ଧରି ଏକ ବିବାଦୀୟ ଜମିକୁ ନେଇ ଦୁଇଗାଁ ମଧ୍ୟରେ ଗଣ୍ଡଗୋଳ ଲାଗିରହିଥିବାବେଳେ ସୋମବାର ପୁଣି ଧାନ କାଟିବାକୁ ନେଇ ପୁଣି ମୁଁହାମୁହିଁ ହୋଇଛନ୍ତି ଗ୍ର।ମବାସୀ ।
ଏନେଇ ଖବର ପାଇ କୋଡ଼ିଙ୍ଗା ପୋଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତି ଉପରେ ନିୟନ୍ତ୍ରଣ କରିଥିବା ବେଳେ ଏହାର ସମାଧାନ ଶୀଘ୍ର କରିବାକୁ ଦୁଇ ଗ୍ରାମବାସୀ ଦାବି କରିଛନ୍ତି । ମିଳିଥିବା ସୂଚନା ଅନୁଯାଇ, କୋଡ଼ିଙ୍ଗା ତହସିଲ ଅଧୀନରେ ଥିବା ଭାଲୁଗୁଡା ଓ ନବରଙ୍ଗପୁର ତହସିଲ ଅଧୀନରେ ଥିବା ବାସିନୀ ପଡୋଶୀ ଏହି ଦୁଇ ଗ୍ରାମର ସୀମାନ୍ତରେ କିଛି ସରକାରୀ, ଜଙ୍ଗଲ ଓ ପଟ୍ଟା ଥିବା ଜମିକୁ ନେଇ ଗତ କିଛିବର୍ଷ ହେଲା ଉଭୟ ଗ୍ରାମବାସୀଙ୍କ ମଧ୍ୟରେ ବିବାଦ ଦେଖାଦେଇଛି ।
ଭାଲୁଗୁଡା ଗ୍ରାମବାସୀ କହିବାନୁଯାଇ ଦୀର୍ଘ 50 ବର୍ଷରୁ ଉର୍ଦ୍ଧ ହେବ ଉକ୍ତ ଜମିକୁ ଭାଗଦଖଲ କରି ଚାଷ କରୁଥିଲେ । ଏପରିକି ଜମିର ସମସ୍ତ ଦସ୍ତାବିଜ ମଧ୍ୟ ରହିଛି । କିନ୍ତୁ ବାସିନୀ ଗ୍ରାମର ଲୋକେ ଚାଷ ଜମିରୁ ଧାନ କାଟି ଦେଇଥିଲେ । ଯାହାକୁ ନେଇ ଦେଖା ଦେଇଥିଲା ବିବାଦ ।
ଏହାର ସ୍ଥାୟୀ ସମାଧାନ ପାଇଁ ଆମ ନବରଙ୍ଗପୁର ପ୍ରତିନିଧି ବହୁବାର ଜିଲ୍ଲା ପ୍ରଶାସନ ନିକଟରେ ଦାବି କରିଥିଲେ ମଧ୍ୟ ପ୍ରଶାସନ ଏଥିପ୍ରତି ଧ୍ୟାନ ଦେଉନଥିବାରୁ ସବୁବେଳେ ଦୁଇଗ୍ରାମ ମଧ୍ୟରେ ଗଣ୍ଡଗୋଳ ଲାଗିରହିଛି ।
ସୋମବାର ମଧ୍ୟ ଦୁଇ ଗ୍ରାମର ଶତାଧିକ ଲୋକ ହାତରେ ଠେଙ୍ଗା, ବାଡ଼ି ଧରି ଧାନ ଫସଲ କାଟିବାକୁ ନେଇ ପୁଣି ଗଣ୍ଡଗୋଳ କରିଥିଲେ । କୋଡ଼ିଙ୍ଗା ଥାନା ଅଧିକାରୀ ଏକ ପୋଲିସ ଟିମ ନେଇ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ଆୟତ୍ତ କରି ଦୁଇ ପକ୍ଷଙ୍କୁ ବୁଝାଇ ଶୀଘ୍ର ସମାଧାନ କରିବାକୁ ପ୍ରତିଶ୍ରୁତି ଦେବାରୁ ଲୋକେ ଶାନ୍ତ ପଡିଥିଲେ ।
ଗ୍ରାମବାସୀଙ୍କ କହିବା ଅନୁସାରେ, ଗତ ଦୁଇବର୍ଷ ତଳେ ମଧ୍ୟ ଏହି ଦୁଇଗ୍ରାମବାସୀଙ୍କୁ ନବରଙ୍ଗପୁର ତହସିଲ କାର୍ଯ୍ୟାଳୟକୁ ଡାକି ଦୁଇ ତହସିଲଦାରଙ୍କ ଉପସ୍ଥିତିରେ ଉଭୟ ପକ୍ଷଙ୍କୁ ଉକ୍ତ ବିବାଦୀୟ ଜମିକୁ ନଯିବାକୁ କହିଥିଲେ ଏବଂ ଏହି ଜମିର ସ୍ଥାୟୀ ସମାଧାନ କରିବାକୁ କହିଥିଲେ । କିନ୍ତୁ ପରବର୍ତ୍ତୀ ସମୟରେ ରାଜସ୍ବ ବିଭାଗ ଏଥିପ୍ରତି ଦୃଷ୍ଟି ନଦେବାରୁ ଭାଲୁଗୁଡା ଗ୍ରାମବାସୀ ଏହି ବିବାଦୀୟ ଜମିରେ ଚାଷ କରିଥିଲେ ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
