ନବରଙ୍ଗପୁର: ତେନ୍ତୁଳିଖୁଣ୍ଟି ଥାନା ଅନ୍ତର୍ଗତ ପାତ୍ରପୁଟ ଗ୍ରାମର ଦୁଇ ଛାତ୍ରୀ ନିଖୋଜ ହେବାର ୨୦ ଦିନ ବିତି ଯାଇଥିଲେ ମଧ୍ୟ ପୋଲିସ ଚୁପ ବସିଥିବା ଅଭିଯୋଗ ହୋଇଛି । ଏନେଇ ଆଜି ଏସପିଙ୍କ ଦ୍ଵାରସ୍ଥ ହୋଇଛନ୍ତି ନିଖୋଜ ଦୁଇ ଛାତ୍ରୀଙ୍କ ପରିବାର ।
ସୂଚନା ଅନୁଯାୟୀ, ଗତ ୧୦ ତାରିଖ ରାତିରେ ପାତ୍ରପୁଟ ଗ୍ରାମର ଚିତ୍ର ହରିଜନଙ୍କ ଝିଅ ଯମୁନା ହରିଜନ(୧୪) ଓ କୋରାପୁଟ କେରାପୁଟ ଗ୍ରାମରୁ ଆସି ପାତ୍ରପୁଟରେ ରହି ପାଠ ପଢୁଥିବା ତ୍ରିଲୋଚନ ହରିଜନଙ୍କ ଝିଅ ଲକ୍ଷ୍ମୀ ହରିଜନ(୧୬) ନିଖୋଜ ହୋଇଯାଇଥିଲେ । ପରେ ପରିବାର ଲୋକେ ଦୁଇ ତିନି ଧରି ଖୋଜା ଖୋଜି କରିବା ପରେ ମଧ୍ୟ ଦୁଇ ଝିଅଙ୍କ ପତ୍ତା ପାଇ ନଥିଲେ । ଏନେଇ ନିଖୋଜ ଦୁଇ ଛାତ୍ରୀଙ୍କ ପରିବାର ଲୋକେ ତେନ୍ତୁଳିଖୁଣ୍ଟି ଥାନାରେ ଏତଲା ଦେଇଥିଲେ । କିନ୍ତୁ ଅଭିଯୋଗ ହେବାର ୧୫ ଦିନ ବିତିଯାଇଥିଲେ ମଧ୍ୟ ପୋଲିସ କୌଣସି ପଦକ୍ଷେପ ନ ନେଇ ଚୁପ ବସିଥିବା ଅଭିଯୋଗ ହୋଇଛି । ବର୍ତ୍ତମାନ ପର୍ଯ୍ୟନ୍ତ ଦୁଇ ଛାତ୍ରୀ କେଉଁଠି ଅଛନ୍ତି ଜଣା ପଡୁନଥିବା ବେଳେ ସେମାନେ ଜୀବିତ ନା ମୃତ ତାହାକୁ ନେଇ ପରିବାର ଲୋକେ ଚିନ୍ତାରେ ।
ଏନେଇ ଆଜି ନିଖୋଜ ଦୁଇ ଛାତ୍ରୀଙ୍କ ପରିବାର ଲୋକେ ନବରଙ୍ଗପୁର ଏସପି ନିତିନ କୁସଲକରଙ୍କୁ ସାକ୍ଷାତ କରିଥିଲେ । କିନ୍ତୁ ଜିଲ୍ଲା ପୋଲିସ ପ୍ରଶାସନ ପ୍ରେମ ସମ୍ପର୍କରେ ଦୁଇ ଝିଅ କାହା ସହିତ ଚାଲି ଯାଇଥିବା କହି ଦୁଇ ନିଖୋଜ ପରିବାରଙ୍କୁ ଖୋଜାଖୋଜି କରିବାକୁ କହିଥିଲେ । ଜିଲ୍ଲା ପୋଲିସ ପ୍ରଶାସନଙ୍କ ଏପରି କଥା ଶୁଣି ଦୁଃଖିତ ପରିବାର ଲୋକେ କାହାକୁ ଆମ ଦୁଃଖ ଜଣେଇବୁ କିଏ ଶୁଣିବ ଆମ ଗୁହାରି ବୋଲି କହିଛନ୍ତି । ଜିଲ୍ଲା ପୋଲିସ ପ୍ରଶାସନ କୁ ଖୁବ ଶୀଘ୍ର ଏହାର ତଦନ୍ତ କରି ଝିଅ ଦୁଇଟିକୁ ଫେରେଇ ଆଣିବାକୁ ଉଭୟ ପରିବାର ଦାବି କରିଛନ୍ତି ।
ନବରଙ୍ଗପୁରରୁ ତପନ ବିଷୋୟୀ,ଇଟିଭି ଭାରତ
