ନବରଙ୍ଗପୁର: ମାନବିକତାର ସୀମା ଟପିଲା ଟ୍ରକ ଡ୍ରାଇଭର । ଜିଲ୍ଲାର ଚନ୍ଦାହାଣ୍ଡି ଥାନା ଅନ୍ତର୍ଗତ ଖପରାଢ଼ିହି ଗ୍ରାମର ନାବାଳକ ପ୍ରଦୀପଙ୍କୁ ନେଇ ହରିୟାଣାର ଏକ ଅଜଣା ଢାବା ନିକଟରେ ଛାଡ଼ି ଚମ୍ପଟ ମାରିଛି । ଉକ୍ତ ଢାବା ମାଲିକ ଭିଡ଼ିଓ ସେୟାର କରି ନାବାଳକକୁ ଉଦ୍ଧାର କରିବା ପାଇଁ ଅନୁରୋଧ କରିଛନ୍ତି । ନବରଙ୍ଗପୁର ପୋଲିସ ପ୍ରଦୀପକୁ ଉଦ୍ଧାର କରିବା ପାଇଁ ହରିୟାଣାକୁ ଏକ ଟିମ ପଠାଇବ ବୋଲି ଜଣାପଡ଼ିଛି ।
ପ୍ରଦୀପଙ୍କୁ ବର୍ତ୍ତମାନ ହରିୟାଣାର ରେୱାଡ଼ି ଜିଲ୍ଲାର ଗଡିବଲନି ଛକ ଜାତୀୟ ରାଜପଥ ୮ କଡ଼ରେ ସର୍ଜିତ୍ ଗୁଜ୍ଜରଙ୍କ ହର୍ସୁ ଢ଼ାବାରେ ସୁରକ୍ଷିତ ଅବସ୍ଥାରେ ରହିଛନ୍ତି । ଗତ(ଶୁକ୍ରବାର) ରାତିରେ ୧୧ଟା ସମୟରେ କେହି ଟ୍ରକ୍ ଡ୍ରାଇଭର ତାଙ୍କୁ ଢ଼ାବାରେ ଛାଡି଼ ଚାଲିଯାଇଛି । ନାବାଳକ ଜଣଙ୍କ ନିଜର ନାମ ପ୍ରଦୀପ ବୋଲି କହିବା ସହ ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ଅଞ୍ଚଳର ଖପରାଢ଼ିହି ଗ୍ରାମର ବୋଲି ପରିଚୟ ଦେଇଛନ୍ତି । ଢ଼ାବା ମାଲିକ ଏକ ଭିଡିଓ ଭାଇରଲ କଲା ପରେ ଘଟଣାଟି ଲୋକଲୋଚନକୁ ଆସିଥିଲା ।
ଘଟଣା ସମ୍ପର୍କରେ ଜଣାପଡ଼ିବା ପରେ ଏବେ ଜିଲ୍ଲା ପୋଲିସ ଅଧିକ ତଦନ୍ତ ଚଳାଇଛି । ନାବାଳକକୁ ଉଦ୍ଧାର କରିବାକୁ ସମସ୍ତ ପ୍ରସ୍ତୁତି କରିଥିବା ଜଣାପଡିଛି । ନବରଙ୍ଗପୁରରୁ ଏକ ଟିମ୍ ଯାଇ ନାବାଳକକୁ ଉଦ୍ଧାର କରିବେ ବୋଲି ସୂଚନା ମିଳିଛି । ଏ ସମ୍ପର୍କରେ ନବରଙ୍ଗପୁର ଆରକ୍ଷୀ ଅଧିକାରୀ ସ୍ମିଥ ପର୍ମର ପୁରୁଷୋତ୍ତମ ଦାସ ସୂଚନା ଦେଇଛନ୍ତି । ସେ କହିଛନ୍ତି ଯେ ଢ଼ାବା ମାଲିକ ସହ କଥା ହୋଇଛନ୍ତି । ନାବାଳକକୁ ସୁରକ୍ଷିତ ରଖିବାକୁ କୁହାଯାଇଛି ।
ଅତିଶୀଘ୍ର ଏକ ଟିମ୍ ହରିୟଣା ଯାଇ ନାବାଳକଙ୍କୁ ଉଦ୍ଧାର କରିବ ବୋଲି ସେ ପ୍ରକାଶ କରିଛନ୍ତି । ତେବେ ଟ୍ରକ ଡ୍ରାଇଭର ଜଣକ ନାବାଳକୁ କାହିଁକି କେଉଁ ପରିସ୍ଥିତିରେ ଟ୍ରକ ବସାଇ ନେଇ ହରିୟାଣାରେ ଛାଡ଼ି ପଳାଇଛନ୍ତି ସେ ସମ୍ପର୍କରେ ସ୍ପଷ୍ଟ ହୋଇନାହିଁ । ସେହି ନାବାଳକକୁ ଉଦ୍ଧାର କରିବା ପରେ ଘଟଣା ସମ୍ପର୍କରେ ସ୍ପଷ୍ଟ ହୋଇପାରିବ ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
