ହାଇଦ୍ରାବାଦ: ପ୍ରସିଦ୍ଧ ହାସ୍ୟ ଅଭିନେତା କପିଲ ଶର୍ମା ଏବଂ ବଲିଉଡ ଅଭିନେତା ରାଜପାଲ ଯାଦବ, କୋରିଓଗ୍ରାଫର ରେମୋ ଡିସୁଜା ଏବଂ ହାସ୍ୟ ଅଭିନେତ୍ରୀ ସୁଗନ୍ଧା ମିଶ୍ରଙ୍କୁ ହତ୍ୟା ଧମକ ଦିଆଯାଇଛି । ଏହି କଳାକାରମାନଙ୍କୁ ଏକ ଇମେଲ୍ ମାଧ୍ୟମରେ ହତ୍ୟା ଧମକ ମିଳିଛି । ବିଷ୍ଣୁ ନାମକ ଜଣେ ବ୍ୟକ୍ତି ରାଜପାଲ ଯାଦବଙ୍କ ଇମେଲ୍ ଆକାଉଣ୍ଟକୁ ଏକ ଧମକପୂର୍ଣ୍ଣ ମେଲ୍ ପଠାଇଛନ୍ତି, ଯେଉଁଥିରେ ତାଙ୍କୁ, ତାଙ୍କ ପରିବାର, ତାଙ୍କ ସହଯୋଗୀଙ୍କୁ ହତ୍ୟା କରାଯିବ ବୋଲି ଚେତାବନୀ ଦିଆଯାଇଛି ।
4 ତାରକାଙ୍କୁ ହତ୍ୟା ଧମକ
ଡିସେମ୍ବର ୧୪, ୨୦୨୪ରେ ପଠାଯାଇଥିବା ଏହି ଇମେଲ୍ ଚିନ୍ତା ବଢ଼ାଇଛି। ଇମେଲଟି don99284@gmail.com ଇମେଲ ଠିକଣାରୁ ରାଜପାଲ ଯାଦବଙ୍କ ଦଳର ଇମେଲ ଆକାଉଣ୍ଟ teamrajpalyadav@gmail.com କୁ ପଠାଯାଇଥିଲା । ଏହା ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି, ରାଜପାଲ ଯାଦବଙ୍କ ପତ୍ନୀ ରାଧା ରାଜପାଲ ଯାଦବ ମୁମ୍ବାଇର ଆମ୍ବୋଲି ପୋଲିସ ଷ୍ଟେସନରେ ଏକ ପୋଲିସ ଅଭିଯୋଗ ଦାଖଲ କରିଛନ୍ତି। ଆମ୍ବୋଲି ପୋଲିସ ଭାରତୀୟ ଦଣ୍ଡ ସଂହିତାର ଧାରା 351(3) ଅନୁଯାୟୀ ଏକ ମାମଲା ରୁଜୁ କରିଛି ।
ପାକିସ୍ତାନରୁ ଆସିଛି ଧମକପୂର୍ଣ୍ଣ ମେଲ୍
ସେପଟେ ଏହି ମାମଲାରେ ସୁଗନ୍ଧା ମିଶ୍ର ଏବଂ ରେମୋ ଡିସୁଜା ମଧ୍ୟ ସମାନ ପ୍ରସଙ୍ଗରେ ଅଭିଯୋଗ ଦାଖଲ କରିଛନ୍ତି । ପୋଲିସର କହିବା ଅନୁଯାୟୀ, ଧମକପୂର୍ଣ୍ଣ ଇମେଲ୍ ପାକିସ୍ତାନରୁ ପଠାଯାଇଥିଲା । ପୋଲିସ ଏହି ମାମଲାର ତଦନ୍ତ ଆରମ୍ଭ କରିଛି । ପୋଲିସ ଏପର୍ଯ୍ୟନ୍ତ ଦାୟୀ ବ୍ୟକ୍ତିଙ୍କୁ ଚିହ୍ନଟ କରିନାହିଁ ।
ଧମକପୂର୍ଣ୍ଣ ଇମେଲରେ କ'ଣ ଲେଖା ହୋଇଛି ?
ଇମେଲରେ ଲେଖା ଅଛି, 'ଆମେ ତୁମର ସାମ୍ପ୍ରତିକ କାର୍ଯ୍ୟକଳାପ ଉପରେ ନଜର ରଖୁଛୁ ଏବଂ ଆମେ ଏକ ସମ୍ବେଦନଶୀଳ ବିଷୟ ପ୍ରତି ତୁମର ଦୃଷ୍ଟି ଆକର୍ଷଣ କରିବାକୁ ଚାହୁଁଛୁ ।' ଏହା କୌଣସି ପବ୍ଲିସିଟି ଷ୍ଟଣ୍ଟ କିମ୍ବା ଆପଣଙ୍କୁ ହଇରାଣ କରିବାର ପ୍ରୟାସ ନୁହେଁ, ଆମେ ଆପଣଙ୍କୁ ଏହି ବାର୍ତ୍ତାକୁ ଅତ୍ୟନ୍ତ ଗମ୍ଭୀରତା ଏବଂ ଗୋପନୀୟତାର ସହିତ ନେବାକୁ ଅନୁରୋଧ କରୁଛୁ । 'ବିଷ୍ଣୁ' ନାଁରେ ଏହି ମେଲରେ ସାଇନ୍ ହୋଇଛି ।
ଏହା ମଧ୍ୟ ପଢନ୍ତୁ: 'ସୁରକ୍ଷିତ ରହିବାକୁ ଚାହୁଁଥିଲେ ଦିଅ 2 କୋଟି ନହେଲେ...' ସଲମାନ ଖାନଙ୍କୁ ପୁଣି ହତ୍ୟା ଧମକ
ସୂଚନା ଥାଉ କି, ଏହା ପ୍ରଥମ ଥର ନୁହେଁ ଯେତେବେଳେ ବଲିଉଡ ସେଲିବ୍ରିଟିମାନଙ୍କୁ ଇଣ୍ଡଷ୍ଟ୍ରିରେ ଧମକ ମିଳିଛି । ଗତ ବର୍ଷ ବିପଦରେ ପରିପୂର୍ଣ୍ଣ ଥିଲା । ସଲମାନ ଖାନ, ଏପି ଢିଲୋ ଏବଂ ଶାହରୁଖ ଖାନଙ୍କ ପରି ସେଲିବ୍ରିଟିମାନଙ୍କୁ ହତ୍ୟା ଧମକ ଦିଆଯାଇଥିଲା । ଏଥିସହ ନିକଟରେ ସୈଫ ଅଲି ଖାନଙ୍କ ଘରେ ବାଂଲାଦେଶୀ ଅଭିଯୁକ୍ତ ଚୋରି କରିବା ଉଦ୍ୟମରେ ଘରେ ପଶି ଅଭିନେତାଙ୍କୁ ଛୁରାମାଡ଼ କରିଥିଲା । ସେଲିବ୍ରିଟିଙ୍କୁ ଏଭଳି ଆକ୍ରମଣ ଓ ଧମକ ମିଳୁଥିବା ବେଳେ ଆଇନବ୍ୟବସ୍ଥା ନେଇ ପ୍ରଶ୍ନ ଉଠିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
