ନବରଙ୍ଗପୁର: ରାଇଘରର ଟିନା ମିସ୍ତ୍ରୀ ହତ୍ୟାକାଣ୍ଡ ମାମଲା । ଅଭିଯୁକ୍ତକୁ ଗିରଫ ଦାବି କରି ରାଇଘର ପୋଲିସ ବିରୋଧରେ ବିକ୍ଷୋଭ । ମୁଖ୍ୟ ରାସ୍ତା ଅବରୋଧ, ଦୋକାନ ବଜାର ବନ୍ଦ ।
ସୂଚନା ଅନୁଯାୟୀ, ନବରଙ୍ଗପୁର ଜିଲ୍ଲା ରାଇଘର ବ୍ଲକ କେବିକଙ୍ଗା ଗ୍ରାମରେ ଗତ 22 ତାରିଖରେ ଟିନା ମିସ୍ତ୍ରୀ ନାମକ ଜଣେ ମହିଳାଙ୍କୁ ହତ୍ୟାକରି ଏକ ପୋଖରୀରେ ପକାଇ ଦିଆଯାଇଥିଲା । ଘଟଣା ପରେ ଟିନାଙ୍କ ବାପା ବୃନ୍ଦାବନ ବିଶ୍ବାସ ରାଇଘର କୁନ୍ଦେଇ ଥାନାରେ ଏକ ଲିଖିତ ଅଭିଯୋଗ କରିଥିଲେ ଯେଉଁଥିରେ ସେ ଟିନାଙ୍କ ସ୍ବାମୀ ଓ ଶ୍ବଶୁରଙ୍କ ନାମ ସହ ଅନ୍ୟ ଅଭିଯୁକ୍ତଙ୍କ ନାମ ରଖିଥିଲେ ।
ତେବେ ପୋଲିସ ଏହି ହତ୍ୟାକାଣ୍ଡରେ କେବଳ ଟିନାଙ୍କ ସ୍ବାମୀ ସମୀର ମିସ୍ତ୍ରୀ ଓ ଶ୍ବଶୁରଙ୍କୁ ଗିରଫ କରି କୋର୍ଟ ଚାଲାଣ କରିଥିବାବେଳେ ଅନ୍ୟ ଅଭିଯୁକ୍ତମାନଙ୍କୁ ଗିରଫ କରିନାହିଁ । ଯାହାକୁ ନେଇ ଟିନାଙ୍କ ବାପା ବାରମ୍ବାର ଉଚ୍ଚପଦସ୍ଥ ପୋଲିସ ଅଧିକାରୀଙ୍କୁ ଭେଟିଥିଲେ । ହେଲେ କୌଣସି କାର୍ଯ୍ୟାନୁଷ୍ଠାନ ନ ହେବାରୁ ସେ ରାଇଘର ଆଞ୍ଚଳିକ ବଙ୍ଗୀୟ ଉନ୍ନୟନ ସମିତିରେ ଏହା ଜଣାଇଥିଲେ ।
ପରେ ଆଜି ଅଭିଯୁକ୍ତମାନଙ୍କୁ ଗିରଫ ଦାବିରେ ପ୍ରାୟ 30ଟି ଗାଁର ଶତାଧିକ ମହିଳା ଓ ପୁରୁଷ ଏକତ୍ରିତ ହୋଇ ବିକ୍ଷୋଭ କରିଥିଲେ । ଏହା ସହ ଅଭିଯୁକ୍ତମାନଙ୍କୁ ଗିରଫ ନ କରିବା ପର୍ଯ୍ୟନ୍ତ ଆନ୍ଦୋଳନ ଚାଲିବ ବୋଲି ବିକ୍ଷୋଭକାରୀ ମାନେ ପ୍ରକାଶ କରିଛନ୍ତି । ସେପଟେ ଘଟଣାସ୍ଥଳରେ ବ୍ୟାପକ ପୋଲିସ ମୁତୟନ ହୋଇଛନ୍ତି ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
