ନବରଙ୍ଗପୁର: ଗଣିତ, ବିଜ୍ଞାନ ଓ ଇଂରାଜୀ ପାଇଁ ଅଧିକ ସମୟ ପାଠପଢା । ଶିକ୍ଷା ବିଭାଗ ପାଇଁ କୋଟି କୋଟି ଟଙ୍କାର ଯୋଜନା । ମାତ୍ର ଏହା କେବଳ କାଗଜ କଲମରେ । ଆଜି ଆମେ ଆପଣଙ୍କୁ ଦେଖାଇବୁ ଏମିତି ଏକ ଚିତ୍ର । ଯାହାକୁ ଦେଖିଲା ପରେ ଆପଣ କହିବେ ସତରେ ଏହା ଶିକ୍ଷା ବ୍ୟବସ୍ଥାର ନଗ୍ନ ଚିତ୍ର ।
ବିଦ୍ୟାଳୟରେ ଅଛି ପ୍ରଥମରୁ ଅଷ୍ଟମ ଶ୍ରେଣୀ । ନିୟମତ ସ୍କୁଲକୁ ମଧ୍ୟ ଆସୁଛନ୍ତି ଛାତ୍ରଛାତ୍ରୀ । ମାତ୍ର 8ଟି ଶ୍ରେଣୀ ପାଇଁ ରହିଛି ଦୁଇଟି ଶ୍ରେଣୀଗୃହ । ଏହି ଘଟଣା ହେଉଛି ଜିଲ୍ଲା ଝରିଗାଁ ବ୍ଳକ ଅନ୍ତର୍ଗତ ଗୋଟିଛାପର ଗ୍ରାମର । ଗ୍ରାମରେ ରହିଥିବା ଉଚ୍ଚ ପ୍ରଥମିକ ବିଦ୍ୟାଳୟରେ ରହିଛି 8ଟି ଶ୍ରେଣୀ । ମାତ୍ର ପାଠ ପଢାଇବାକୁ ରହିଛି ଦୁଇଟି ଶ୍ରେଣୀଗୃହ । ତାହା ପୁଣି ଜରାଜୀର୍ଣ୍ଣ ଅବସ୍ଥାରେ । ବର୍ଷା ହେଲେ ଶ୍ରେଣୀଗୃହର ଛାତରୁ ଗଳୁଛି ପାଣି । ଫଳରେ ଛାତ୍ରଛାତ୍ରୀମାନଙ୍କୁ ବାଧ୍ୟ ହୋଇ ବାରଣ୍ଡାରେ ପାଠ ପଢାଉଛନ୍ତି ଶିକ୍ଷକ ।
ଏହି ବିଦ୍ୟାଳୟରେ ସର୍ବ ମୋଟ ୩୪ ଜଣ ଛାତ୍ରଛାତ୍ରୀ ରହିଛନ୍ତି । ବିଦ୍ୟାଳୟରେ ଶୌଚାଳୟର ଅଭାବ ନାହିଁ । କିନ୍ତୁ ତାହା କୈାଣସି କାର୍ଯ୍ୟରେ ଆସୁନାହିଁ । ପାନୀୟ ଜଳର କୈାଣସି ବନ୍ଦୋବସ୍ତ ନାହିଁ । ଏହି ବିଦ୍ୟାଳୟରେ ଦୁଇ ଜଣ ଶିକ୍ଷକ ଓ ଜଣେ ଶିକ୍ଷୟିତ୍ରୀ ଅଛନ୍ତି । ମାତ୍ର ଏହି ଶିକ୍ଷକ ଓ ଶିକ୍ଷୟିତ୍ରୀ ମିଳିତ ଭାବରେ ମନୋମୁଖୀ କାର୍ଯ୍ୟକଳାପ ଚଳାଇଥିବା ଅଭିଯୋଗ ହୋଇଛି । ଏହି ଶିକ୍ଷକ ଓ ଶିକ୍ଷୟିତ୍ରୀମାନେ ଛାତ୍ରଛାତ୍ରୀ ମାନଙ୍କର ଭବିଷ୍ୟତକୁ ନଷ୍ଟକରି ଗଢୁଛନ୍ତି ନିଜର ଉଜ୍ଜ୍ୱଳ ଭବିଷ୍ୟତ ।
ତେବେ ଏହି ବିଦ୍ୟାଳୟରେ ଜଣେ ଶିକ୍ଷୟିତ୍ରୀ ଅଛନ୍ତି । ଏହି ଶିକ୍ଷୟିତ୍ରୀ ଜଣକ ଏହି ବିଦ୍ୟାଳୟରେ 2011 ମସିହାରେ ଯୋଗଦାନ କରିଥିଲେ । ଯୋଗଦାନ କରିବା ପରେ ଆଜି ପର୍ଯ୍ୟନ୍ତ ୩୬୫ ଦିନ ବି ବିଦ୍ୟାଳୟକୁ ଆସି ନାହାନ୍ତି । କିନ୍ତୁ ବର୍ଷ ସାରା ସରକାରୀ ଖାତାରେ ତାଙ୍କର ଉପସ୍ଥିତ ସ୍ବାକ୍ଷର ସମାନ ରହିଅଛି । ଏହି ଶିକ୍ଷୟିତ୍ରୀ ଜଣକ ମାସରେ ୧୫ ଦିନରେ ସ୍କୁଲକୁ ପଢାଇବାକୁ ଆସନ୍ତି । ମାତ୍ର ମାସସାରା ତାଙ୍କର ସ୍ବାକ୍ଷର ଥାଏ ବୋଲି ଅଭିଯୋଗ କରିଛନ୍ତି ଗ୍ରାମବାସୀ ।
ତେବେ ବିଦ୍ୟାଳୟରେ ଚାଲୁଥିବା ସମସ୍ତ ଅବହେଳାକୁ କଥାକୁ ସ୍ବୀକାର କରିଛନ୍ତି ବିଦ୍ୟାଳୟର ପ୍ରଧାନ ଶିକ୍ଷକ ସୁବ୍ରତ କୁମାର ଭତରା ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
