ନବରଙ୍ଗପୁର: ଶିକ୍ଷା କ୍ଷେତ୍ରରେ ବହୁତ ପଛୁଆ ନବରଙ୍ଗପୁର ଜିଲ୍ଲା । ଏହାସହ ବର୍ତ୍ତମାନ ଧିରେ ଧିରେ ଭୁଷୁଡିବାରେ ଲାଗିଲାଣି ଶିକ୍ଷା ବ୍ୟବସ୍ଥା । ଏଠାରେ ଥିବା ବିଦ୍ୟାଳୟରେ ପିଲାଙ୍କୁ ପାଠପଢା ବଦଳରେ ସେମାନଙ୍କୁ କୁଲି କରି କାମରେ ଲଗାଯାଉଛି ।
ଏଭଳି ଦୃଶ୍ୟ ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଡାବୁଗାଁ ବ୍ଲକ ସଦର ମହକୁମା ସରକାରୀ ପଞ୍ଚାୟତ ଉଚ୍ଚ ଇଂରାଜୀ ବିଦ୍ୟାଳୟରେ । ଏଠାରେ ପ୍ରଧାନ ଶିକ୍ଷୟିତ୍ରୀଙ୍କ ଆଦେଶ ଅନୁସାରେ ସ୍କୁଲରେ ପଢୁଥିବା ନବମ ଶ୍ରେଣୀର ଆଦିବାସୀ ଛାତ୍ର ଲୁହା ଖଟ ବୋହୁଥିବା ଦେଖିବାକୁ ମିଳିଛି । ସରକାର ବିଜ୍ଞାନ, ଗଣିତ ଏବଂ ଇଂରାଜୀ ପାଠକୁ ଗୁରୁତ୍ବ ଦେବା ବେଳେ ଏଠାରେ କିନ୍ତୁ ଗଣିତ ପାଠ ପଢା ସମୟରେ ଛାତ୍ରମାନଙ୍କୁ କୁଲି କାମରେ ନିୟୋଜିତ କରିଛନ୍ତି ।
ବିଦ୍ୟାଳୟ ପରିସରରେ ୧୦୦ ଶର୍ଯ୍ୟା ବିଶିଷ୍ଟ ଏକ ଆଦିବାସୀ ଛାତ୍ରାବାସ ରହିଛି । ଛାତ୍ରାବାସରେ ରହୁଥିବା ଛାତ୍ରମାନଙ୍କ ନିମନ୍ତେ ଗୋଟିଏ ଟ୍ରକରେ ଲୁହା ଖଟ ଅଣାଯାଇଥିଲା । ସେହି ଖଟଗୁଡିକୁ ଟ୍ରକରୁ ଛାତ୍ରାବାସକୁ ନେବାପାଇଁ କୁଲିକୁ ଡାକିବା ବଦଳରେ ଛାତ୍ରାବାସରେ ରହୁଥିବା ଆଦିବାସୀ ଛାତ୍ରଙ୍କୁ ପ୍ରଧାନଶିକ୍ଷୟିତ୍ରୀ କହିଥିଲେ । କିନ୍ତୁ ଏହି ଘଟଣା ବାବଦରେ କ୍ୟାମେରା ସାମନାରେ କିଛି କହିବା ପାଇଁ ସିଧା ମନା କରିଛନ୍ତି ପ୍ରଧାନ ଶିକ୍ଷୟିତ୍ରୀ । ତେବେ ଏହି ଘଟଣାକୁ ସାଧାରଣରେ ଖୁବ ନିନ୍ଦା କରାଯାଇଛି ।
ନବରଙ୍ଗପୁରରୁ ତପନ ବିଷୋୟୀ,ଇଟିଭି ଭାରତ
