ନବରଙ୍ଗପୁର: ଗାଁର ଉନ୍ନତି ପାଇଁ ସରକାର ମାଳ ମାଳ ଯୋଜନା କରି କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ଠିକାଦାର ଓ ଯନ୍ତ୍ରୀର ମଧୁଚନ୍ଦ୍ରିକା ଯୋଗୁଁ ଉନ୍ନତମାନର କାମ ହୋଇ ପାରୁନାହିଁ । ଏଭଳି ଏକ ଅଭିଯୋଗ ଆସିଛି ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ଅନ୍ତର୍ଗତ ଚନ୍ଦ୍ରପୁର ଗ୍ରାମରୁ ।
ଜିଲ୍ଲା ଗ୍ରାମ ଉନ୍ନୟନ ସଂସ୍ଥା ନବରଙ୍ଗପୁର ପକ୍ଷରୁ ଚନ୍ଦ୍ରପୁର ଗ୍ରାମରେ ନୂତନ କଂକ୍ରିଟ ଖଳା ନିର୍ମାଣ ଯୋଜନା ପାଇଁ ଅଟକଳ ୭ଲକ୍ଷ ୨୦ ହଜାର ଟଙ୍କା ବ୍ୟୟରେ ହୋଇଛି। ହେଲେ ଗ୍ରାମବାସୀ ଏନେଇ ଅଭିଯୋଗ କରିଛନ୍ତି ଠିକା କର୍ମଚାରୀ କିଭଳି ଭାବରେ ନିମ୍ନ ମାନର କାମ କରିଛନ୍ତି । ଭଲ କାମ ପାଇଁ ବିଭାଗୀୟ ଯନ୍ତ୍ରୀ ଓ କର୍ମଚାରୀକୁ ଗ୍ରାମବାସୀ କହିଥିଲେ କିନ୍ତୁ କେହି ଶୁଣିନଥିଲେ ।
ଖୋଲା ନିର୍ମାଣ ପାଇଁ ପ୍ରଥମେ କମ ଗାତ କରି ଚାରିପଟୁ ୱାଲ କରିଥିଲେ। ସେଠାରେ ଛୋଟ ପଥର ନ ଦେଇ ବଡ ବଡ଼ ପଥର ଦେଇଥିଲେ ଗ୍ରାମବାସୀ ଅଭିଯୋଗ କଲେ ମଧ୍ୟ କିଏ ଶୁଣୁନଥିଲେ। କମ ପରିମାଣରେ ସିମେଣ୍ଟ ପଡ଼ିବା ଦ୍ଵାରା ବର୍ଷାରେ ଧୋଇ ହୋଇ ପଥର ବାହାରି ପଡିଛି। ଯାହା ଦ୍ବାରା କି ତାହା କାମରେ ଲାଗି ପାରୁନାହିଁ।
ଏହାସହ ଗାତ ଖୋଳିବା ପରେ ଚାରିପଟେ ଲୁହାଛଡ ବାନ୍ଧି ସିମେଣ୍ଟ କଂକ୍ରିଟ କରିବା କଥା । ସେହି ପରିମାଣରେ ଲୁହାଛଡ଼ କିମ୍ବା ସିମେଣ୍ଟ ଖର୍ଚ୍ଚ ହୋଇନାହିଁ। ନିୟମ ଅନୁଯାୟୀ ଗାତରେ ବାଲି ଦେଇ ଭର୍ତ୍ତି କରିବାଥିଲା । ବାଲି ଜାଗାରେ ମାଟି ଭର୍ତି କରାଯାଇଛି।
ସରକାରୀ ନିୟମ ଅନୁଯାୟୀ କାମ ହୋଇନାହିଁ । ଏବେ ପ୍ରଶ୍ନ ହେଲା ଯେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ ବ୍ୟୟରେ ନିର୍ମାଣ କାର୍ଯ୍ୟ କାହା ନିମନ୍ତେ । ଏନେଇ ଗ୍ରାମବାସୀ ଭିଜିଲାନ୍ସ ନିକଟରେ ଦ୍ବାରସ୍ଥ ହୋଇଛନ୍ତି କିନ୍ତୁ ଏପର୍ଯ୍ୟନ୍ତ କିଛି ସୁଫଳ ମିଳିନାହିଁ ।
ନବରଙ୍ଗପୁରରୁ ତପନ ବିଷୋୟୀ,ଇଟିଭି ଭାରତ
