ନବରଙ୍ଗପୁର: ସର୍ବଭାରତୀୟ ସ୍ତରରେ ଆୟୋଜିତ ଇସ୍ରୋର ମହାକାଶ ବିଜ୍ଞାନ ସମ୍ବନ୍ଧୀୟ ନିବନ୍ଧ ପ୍ରତିଯୋଗିତାରେ ନବରଙ୍ଗପୁରର ଦେବାଶିଷଙ୍କୁ ସଫଳତା । ମହାକାଶ ବିଜ୍ଞାନ ଗବେଷଣା ସମ୍ବନ୍ଧରେ ଆଗାମୀ ଦୁଇ ଦଶନ୍ଧୀରେ ଆହ୍ବାନ ଏବଂ ଏହାର ପରିଣତି ସମ୍ବନ୍ଧରେ ସାରଗର୍ଭକ ନିବନ୍ଧ ଲେଖି ଜିଲ୍ଲାର ତେନ୍ତୁଳିଖୁଣ୍ଟି ବ୍ଲକ ପଡେଇଗୁଡା ଗ୍ରାମର ଛାତ୍ର ଦେବାଶିଷ ବିଷୋୟୀ ସର୍ବଭାରତୀୟ ସ୍ତରରେ ଏହି ସଫଳତା ଲାଭ କରିଛନ୍ତି । ଏନେଇ ଦେବାଶିଷଙ୍କୁ ଚାରିଆଡୁ ଛୁଟୁଛି ଶୁଭେଚ୍ଛାର ସୁଅ ।
ଭାରତୀୟ ମହାକାଶ ଗବେଷଣା ସଂସ୍ଥା(ଇସ୍ରୋ) ପକ୍ଷରୁ ଚଳିତ ବର୍ଷ ଜୁନ 24 ତାରିଖରେ ସର୍ବଭାରତୀୟ ସ୍ତରରେ ଅନଲାଇନ ମାଧ୍ୟମରେ ଆୟୋଜିତ ହୋଇଥିଲା ଏକ ରଚନା ପ୍ରତିଯୋଗିତା । ଯେଉଁଥିରେ ତଥ୍ୟ ଭିତ୍ତିକ ସାରଗର୍ଭକ ଗବେଷଣାତ୍ମକ ତଥ୍ୟ ଉପସ୍ଥାପନ କରି ଦେବାଶିଷ ନବରଙ୍ଗପୁର ଜିଲ୍ଲା ତଥା ରାଜ୍ୟର ନାଁ ରଖିଛନ୍ତି । 21ଜୁଲାଇ, 2003ରେ ଜନ୍ମିତ ଦେବାଶିଷ ତେନ୍ତୁଳିଖୁଣ୍ଟି ବ୍ଲକର ଗୁମ୍ମାସ୍ଥିତ ସରସ୍ବତୀ ଶିଶୁ ମନ୍ଦିରରୁ ପଢା ଆରମ୍ଭ କରି ନବରଙ୍ଗପୁରସ୍ଥିତ ସରସ୍ବତୀ ଶିଶୁ ବିଦ୍ୟା ମନ୍ଦିରରୁ ସଫଳତାର ସହ ମାଟ୍ରିକ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ । ବର୍ତ୍ତମାନ ସେ କୋରାପୁଟସ୍ଥିତ ବିଜ୍ଞାନ ଇଣ୍ଟରନ୍ୟାସନାଲ୍ କଲେଜରେ ଯୁକ୍ତ ଦୁଇ ଦ୍ବିତୀୟ ବର୍ଷରେ ଅଧ୍ୟୟନରତ ।
ଦେବାଶିଷଙ୍କ ପିତା, ରାଧାକୃଷ୍ଣ ବିଷୋୟୀ ପୂଜାରୀଗୁଡାସ୍ଥିତ ସରସ୍ବତୀ ଶିଶୁ ବିଦ୍ୟା ମନ୍ଦିରରେ ପ୍ରଧାନ ଆଚାର୍ଯ୍ୟ ରୂପେ କାର୍ଯ୍ୟରତ । ସେପଟେ ମା’ ପୁଷ୍ପାଞ୍ଜଳୀ ବିଷୋୟୀ ଜଣେ ଗୃହିଣୀ । କୋରୋନା ମହାମାରୀ ସମୟରେ ଚାରିଆଡେ ଲକଡାଉନ ଓ ସଟଡାଉନ ଜାରି ରହିଥିବା ବେଳେ ଦେବାଶିଷ ବହୁ ଉପାଦେୟ ଲେଖା ଲେଖି କରିବା ସହ ନିଜ ଅଧ୍ୟୟନରେ ମନ ବଳାଇଛନ୍ତି । ତେବେ ତାଙ୍କୁ ମିଳିଥିବା ସଫଳତା ପାଇଁ ସେ ଜେଜେବାପା ପର୍ଶୁରାମ ବିଷୋୟୀ ଓ ଅଧ୍ୟାପିକା ପ୍ରତିଚି ପଟ୍ଟନାୟକଙ୍କୁ ଶ୍ରେୟ ଦେଇଛନ୍ତି ।
ଦେବାଶିଷଙ୍କ ଉଚ୍ଚକୋଟୀର ଆଲେଖ୍ୟକୁ ଇସ୍ରୋ ପକ୍ଷରୁ ସ୍ବୀକୃତି ମିଳିବା ସହ ପୁରସ୍କାର ଓ ମାନପତ୍ର ଦେଇ ସମ୍ମାନିତ କରାଯାଇଛି l ଦେବାଶିଷଙ୍କ ଏଭଳି ସଫଳତାରେ ନବରଙ୍ଗପୁର ଜିଲ୍ଲାରେ ଖେଳିଛି ଖୁସିର ଲହରୀ ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
