ନବରଙ୍ଗପୁର: ନବରଙ୍ଗପୁର ପାପଡାହାଣ୍ଡି ବାଙ୍କସର୍ଗି ଗାଁରେ ଅଭାବନୀୟ ଘଟଣା l ଶାଶୂଘରୁ ନବବଧୂର ମୃତଦେହ ଉଦ୍ଧାର । ଏପଟେ ଝିଅର ମୃତ୍ୟୁ ନେଇ ପାପଡାହାଣ୍ଡି ଥାନାରେ ହତ୍ୟା ଅଭିଯୋଗ କଲେ ନବବଧୂଙ୍କ ପରିବାର l
ଅଭିଯୋଗ ଅନୁସାରେ, ତେନ୍ତୁଳିଖୁଣ୍ଟି ବ୍ଲକ ଅନ୍ତର୍ଗତ ମଞ୍ଚାଗାଁ ପଞ୍ଚାୟତର ବିରିଗୁଡା ଗ୍ରାମର ମେନକା ସୌରା (20) ପ୍ରାୟ ଛଅ ମାସ ତଳେ ବାଙ୍କସର୍ଗି ଗ୍ରାମର ତୀର୍ଥ ସୌରାଙ୍କୁ ପ୍ରେମ ବିବାହ କରିଥିଲେ l କିଛି ଦିନ ବେଶ ଖୁସରେ ଚାଲିଥିବା ବୈବାହିକ ଜୀବନ । ହେଲେ ହଠାତ ସବୁକିଛି ବଦଳି ଗଲା । ଦୁହିଁଙ୍କ ଭିତରେ ଛୋଟଛୋଟ କଥାକୁ ନେଇ ହେଉଥିଲା ପାଟିତୁଣ୍ଡ ।
ତେଣୁ ସ୍ତ୍ରୀଙ୍କୁ ଶ୍ବଶୁର ଘରେ ଛାଡି ସ୍ବାମୀ ଦାଦନ ଖଟିବା ପାଇଁ ବାହାର ରାଜ୍ୟକୁ ଚାଲିଯାଇଥିଲେ। ପ୍ରାୟ ସାତ ଦିନ ତଳେ ମୃତା ମେନକାଙ୍କ ଶ୍ବଶୁର ତାଙ୍କୁ ବୁଝାସୁଝା କରି ପୁଣି ଶାଶୂ ଘରକୁ ଫେରାଇ ଆଣିଥିଲେ । ହେଲେ ରବିବାର ସଂଧ୍ୟାରେ ହଠାତ ମେନକାର ମୃତ୍ୟୁ ଖବର ପରିବାର ଲୋକଙ୍କୁ ଆଶ୍ଚର୍ଯ୍ୟ କରିଥିଲା ।
ଯାହାକୁ ନେଇ ପରିବାର ଲୋକେ ବାଙ୍କସର୍ଗି ଗାଁରେ ଆଜି ସକାଳେ ପହଞ୍ଚିଥିଲେ । ମୃତଦେହ ଚଟାଣରେ ପଡ଼ିଥିବା ଦେଖି ସ୍ଥାନୀୟ ପାପଡାହାଣ୍ଡି ଥାନାରେ ଯୌତୁକ ନିର୍ଯାତନା ନେଇ ହତ୍ୟା କରାଯାଇଥିବା ସନ୍ଦେହ କରି ଶାଶୁ ଶ୍ବଶୁର ଓ ନଣନ୍ଦଙ୍କ ନାମରେ ଅଭିଯୋଗ କରିଛନ୍ତି l ଏନେଇ ପାପଡାହାଣ୍ଡି ପୁଲିସ ଶବକୁ ବ୍ୟବଚ୍ଛେଦ ପରେ ସମ୍ପୂର୍ଣ୍ଣ ସତ୍ୟ ଜଣାପଡିବା ସହ ତଦନ୍ତ ଚାଲିଛି ବୋଲି ସୂଚନା ଦେଇଛନ୍ତି l
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
