ନବରଙ୍ଗପୁର: ବିବାହକୁ ସ୍ମରଣୀୟ କରିବା ପାଇଁ ଅନେକ ଲୋକ ଖାସ ପ୍ଲାନିଂ କରିଥାନ୍ତି। ଏଥିପାଇଁ କିଏ ଅପର୍ଯ୍ୟାପ୍ତ ଟଙ୍କା ଖର୍ଚ୍ଚ କରି ଧୁମଧାମରେ ବାହା ହୁଏ ତ ଆଉ କିଏ ନିରାଡମ୍ବରରେ ବିବାହ କରେ। ହେଲେ ନବରଙ୍ଗପୁରର ସ୍ଥିତ ସାଇ କଲ୍ୟାଣ ମଣ୍ଡପ ଠାରେ ଯେଉଁ ବିବାହ ହୋଇଛି ତାହା ସମ୍ପୂର୍ଣ୍ଣ ନିଆରା।
ବାଜା ବାଣ ସହ ଧୁମଧାମରେ ଏହି ନବଦମ୍ପତିଙ୍କ ବିବାହ ସମ୍ପର୍ଣ୍ଣ ହୋଇଛି। ଏହାସହ ନବବଧୂ ମଧ୍ୟ ଘରେ ଆସି ପହଞ୍ଚିଯାଇଛି। ହେଲେ ରିସେପସନ ପାର୍ଟି ଦିନ ଦେଖିବାକୁ ମିଳିଛି କିଛି ନିଆରା ଦୃଶ୍ୟ। ଜୀବନର ନୂତନ ଇଂନିସ ଆରମ୍ଭ କରିବା ସହ ରାଜନୀତିରେ ମଧ୍ୟ ନୂତନ ସିରିଜ୍ ଆରମ୍ଭ କରିଛନ୍ତି ଏହି ନବଦମ୍ପତି। ରିସେପସନ ପାର୍ଟି ଦିନ ଏହି ଦମ୍ପତି ବିଜେପିର ପ୍ରାଥମିକ ସଦସ୍ୟ ଭାବେ ସାମିଲ ହୋଇଛନ୍ତି।
ସୂଚନା ଅନୁସାରେ,ନବରଙ୍ଗପୁର ବିଜେପି ବିଧାୟକ ପ୍ରାର୍ଥୀ ଗୌରୀ ମାଝୀ,ଜୟପୁର ବିଜେପି ବିଧାୟକ ପ୍ରାର୍ଥୀ ଗୌତମ ସାମନ୍ତରାୟ ,ଜିଲ୍ଲା ଯୁବ ମର୍ଚ୍ଚା ସଭାପତି କାହ୍ନୁ ଚରଣ ଦାସ ଉପସ୍ଥିତ ରହି ନୂଆ ବିବାହିତ ଦମ୍ପତିଙ୍କୁ ପ୍ରାଥମିକ ସଦସ୍ୟ ଭାବେ ଗ୍ରହଣ କରିଛନ୍ତି। ଏହି ନୂଆ ଦମ୍ପତି ହେଲେ ବର ଅନନ୍ତ ପଣ୍ଡା ଓ କନ୍ୟା ଲିସାରାଣୀ ପାତ୍ର।
ଆମ ପରିବାରର ସମସ୍ତେ ଭାରତୀୟ ଜନତା ପାର୍ଟିରେ ଅଛୁ। ତେଣୁ ଆମ ପରିବାରରେ ଯେତେବେଳେ ନୂଆ ସଦସ୍ୟ ଜଣେ ଆସିଲେ ସେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏବଂ ତାଙ୍କ କାର୍ଯ୍ୟକଳାପକୁ ବେଶ ପସନ୍ଦ କରନ୍ତି। ସେଥିପାଇଁ ସେ ନିଜେ ଭାରତୀୟ ଜନତା ପାର୍ଟିରେ ପ୍ରାଥମିକ ସଦସ୍ୟ ହେବାକୁ ଇଛା କରିବାକୁ ତାଙ୍କୁ ଆମେ ଭାରତୀୟ ଜନତା ପାର୍ଟିରେ ସଦସ୍ୟ ଭାବେ ସାମିଲ କରିଥିବା ବର ଅନନ୍ତ ପଣ୍ଡା କହିଛନ୍ତି।
ନବରଙ୍ଗପୁରରୁ ତପନ ବିଶୋଇ,ଇଟିଭି ଭାରତ
