ନବରଙ୍ଗପୁର: ବହୁଚର୍ଚ୍ଚିତ କୋଷାଗୁମୁଡ଼ା ନାବାଳିକା ଗଣଦୁଷ୍କର୍ମ ଓ ହତ୍ୟା ଘଟଣାରେ ତାତିଛନ୍ତି ଓକିଲ । ମୃତ ପୀଡିତା ପରିବାରଙ୍କୁ ଭେଟିଛି ନବରଙ୍ଗପୁର ଓକିଲ ସଂଘର ସଦସ୍ୟ । ସଂଘର ସଭାପତି ନରସିଂହ ତ୍ରିପାଠୀଙ୍କ ନେତୃତ୍ବରେ ଓକିଲ ସଂଘର ଏକ ପ୍ରତିନିଧି ଦଳ ଗୁମଣ୍ଡଳୀ ଗାଁ ଗସ୍ତ କରିଥିଲେ । ମୃତ ନାବାଳିକାଙ୍କ ବାପା, ମା' ଓ ଅନ୍ୟ ପାରିବାରିକ ସଦସ୍ୟଙ୍କ ସହିତ ଘଟଣା ବାବଦରେ ସବିଶେଷ ଆଲୋଚନା କରିଥିଲେ ।
ମୃତ ପୀଡିତାଙ୍କୁ ନ୍ୟାୟ ପ୍ରଦାନ ପାଇଁ ଓକିଲ ସଂଘ ଶେଷ ପର୍ଯ୍ୟନ୍ତ ନିଜ ଲଢେଇ ଜାରି ରଖିବା ସହ ପରିବାର ସଦସ୍ୟଙ୍କ ସମର୍ଥନରେ ସର୍ବଦା ଛିଡା ହେବେ ବୋଲି ଆଶ୍ବସନା ଦେଇଥିଲେ । ପୂର୍ବରୁ ପୋଲିସ ଉକ୍ତ ଘଟଣାରେ ସମ୍ପୃକ୍ତ ଥିବା ଅଭିଯୁକ୍ତଙ୍କୁ ଗିରଫ କରିଛି କି ନାହିଁ ସେ ନେଇ କୌଣସି ତଥ୍ୟ ଦେଉନଥିବାବେଳେ ନବରଙ୍ଗପୁର ଓକିଲ ସଂଘ ଘଟଣାରେ ସମ୍ପୃକ୍ତ ଥିବା ଅଭିଯୁକ୍ତଙ୍କ ସପକ୍ଷରେ କେସ ଲଢିବେ ନାହିଁ ବୋଲି ନିଷ୍ପତ୍ତି ନେଇଛନ୍ତି । ଏହା ସହ ଅବିଭକ୍ତ କୋରାପୁଟ ଜିଲ୍ଲାର କୌଣସି ଓକିଲ ଏହି ଘଟଣାରେ ସମ୍ପୃକ୍ତ ଅଭିଯୁକ୍ତଙ୍କ କେସ ନଲଢ଼ିବା ପାଇଁ ଜିଲ୍ଲା ଓକିଲ ସଂଘ ନିବେଦନ କରିଛନ୍ତି ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
