ନବରଙ୍ଗପୁର: କୂଅ ମଧ୍ୟରେ ଗାଡି ଖସି ଚାରି ମୃତ୍ୟୁ ଘଟଣା । ମୃତକ ସପନ ସରକାର ଓ ରିତା ସରକାରଙ୍କ ମରଶରୀର ଉମରକୋଟସ୍ଥିତ ବାସଭବନ ପହଞ୍ଚିଛି । ସେପଟେ ଅନ୍ୟ ଦୁଇ ଜଣ ମୃତକ ହାଜରି ଢାଲି ଓ ବିଶ୍ବଜିତି ଢାଲିଙ୍କ ମର ଶରୀର କଣ୍ଡାଗାସ୍ଥିତ ବାସଭବନରେ ପହଞ୍ଚିଛି । ସେମାନଙ୍କ ମରଶରୀର ପହଁଞ୍ଚିବା ପରେ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି । ଆଜି ରାତିରେ ସେମାନଙ୍କ ଶେଷ କୃତ୍ୟ ସମ୍ପନ୍ନ କରିବା ନେଇ ପରିବାର ଲୋକେ ସୂଚନା ଦେଇଛନ୍ତି ।
ସପନ ଓ ପରିବାର ଛତିଶଗଡ଼ କାଙ୍କେରରୁ କୋଣ୍ଡା ଗ୍ରାମକୁ ଫେରୁଥିବା ବେଳେ ନିଖୋଜ ହେବା ନେଇ ଥାନାରେ ଦିଆଯାଇଥିଲା ଏତଲା । ହେଲେ କୂଅରୁ କାର୍କୁ ଉଦ୍ଧାର ହେବା ପରେ ଘଟଣା ସ୍ପଷ୍ଟ ହୋଇଛି । ମାତ୍ର ଦୁଃଖର ବିଷୟ ସପନଙ୍କ ସମେତ ମୋଟ ୪ ଜଣଙ୍କର ମୃତ୍ୟୁ ଘଟିଛି । କାର ଭିତରୁ ପରିବାରର ୪ ସଦସ୍ୟଙ୍କ ମୃତଦେହକୁ ଉଦ୍ଧାର କରିଛି ପୋଲିସ । କାଙ୍କେର ପୋଲିସ ଷ୍ଟେସନର ଏସଡିପିଓ ଶରଦ ଦୁବେ କହିଛନ୍ତି, "ମୃତ ତହସିଲଦାରଙ୍କ ବଡ ଭଉଣୀ ରୀନା ଦତ୍ତ ଅପହରଣ ନେଇ ଉତ୍ତରପ୍ରଦେଶ କାଙ୍କେର ଥାନାରେ ଏକ ମାମଲା ରୁଜୁ କରିଥିଲେ । ନବରଙ୍ଗପୁର ଉମରକୋଟ ଏବଂ କୋଣ୍ଡା ଗ୍ରାମର ସମ୍ପର୍କୀୟମାନେ ତାଙ୍କ ବିବାହ ଉତ୍ସବରେ ଯୋଗ ଦେଇଥିଲେ ବୋଲି ଅଭିଯୋଗ ପତ୍ରରେ ଦର୍ଶାଯାଇଥିଲା ।
ସପନ ସରକାରଙ୍କ ସହିତ ତାଙ୍କ ପତ୍ନୀ ରୀତା ସରକାର, ଶାଳକ ଓ ଜଣେ ପଡ଼ୋଶୀ ଥିଲେ । ଏହି ଅଘଟଣରେ ୪ ଜଣଙ୍କ ଦୁଃଖଦାୟକ ମୃତ୍ୟୁ ଘଟିଛି । ପୋଲିସ କାରକୁ ଉଦ୍ଧାର କରିବା ପରେ ମୃତଦେହକୁ ମଧ୍ୟ ଉଦ୍ଧାର କରି ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି ।
ଇଟିଭି ଭାରତ, ନବରଙ୍ଗପୁର
