ନବରଙ୍ଗପୁର: ଡାବୁଗାଁ ଥାନା ଅନ୍ତର୍ଗତ ଚେରଚେଟିଆଗୁଡ଼ା ଗ୍ରାମରେ ଘଟିଛି ଅଭାବନୀୟ ଘଟଣା । ମୋବାଇଲ ଚାର୍ଜ ବସାଇବା ସମୟରେ ନାବାଳକଙ୍କ ମୃତ୍ୟୁ ଘଟିଛି । ସନାଧର ଭତରା ନାମକ ଜଣେ ନାବାଳକ ମୋବାଇଲ ଚାର୍ଜ ବସାଇବା ସମୟରେ ବିଦ୍ୟୁତ୍ ଆଘାତରେ ଘଟଣାସ୍ଥଳରେ ମୃତ୍ୟୁବରଣ କରିଛନ୍ତି । ଖବର ପାଇ ଡାବୁଗାଁ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି ।
ମୃତ ଯୁବକ ଜଣକ ପୁଜାରିଗୁଡ଼ାର ସନାଧର ଭତରା (17 ) ବୋଲି ଜଣାପଡିଛି । ସୂଚନା ଅନୁଯାୟୀ ଡାବୁଗାଁ ଥାନା ଅନ୍ତର୍ଗତ ପୂଜାରୀଗୁଡ଼ା ଗ୍ରାମର ଜୟରାମ ଭତରାର ପୁଅ ସନାଧର ଭତରା ନିକଟସ୍ଥ ଚେରଚେଟିଆ ଗୁଡ଼ା ଗ୍ରାମରେ ଥିବା ଭଉଣୀ ବଗ ଭତରା ଘରେ 3 ବର୍ଷ ହେଲା ରହି ଆସୁଥିଲେ । ସୋମବାର ସନାଧର ଭତରା ସାଙ୍ଗ ମାନଙ୍କ ସହ ଡାବୁଗାଁ ଥାନା ମେଦନା ଗ୍ରାମକୁ ଦଶହରା ହାଟ ବୁଲିବାକୁ ଯାଇଥିଲା । ମଙ୍ଗଳବାର ସକାଳ ପ୍ରାୟ 7.30ଟା ସମୟରେ ସନାଧର ମୋବାଇଲ ବ୍ୟାଟେରିକୁ କାଢି ବିଦ୍ୟୁତ ତାରରେ ଚାର୍ଜ କରୁଥିଲା । ଏହି ସମୟରେ ମୋବାଇଲ ବ୍ୟାଟେରି ଫାଟିଥିଲା । ଫଳରେ ଏଥିରେ ସନାଧର ଡାହାଣ ହାତ ପାପୁଲି ଫାଟି ଯାଇଥିବା ବେଳେ ବିଦ୍ୟୁତ୍ ତାର ସଂସ୍ପର୍ଶରେ ଆସି ଘଟଣାସ୍ଥଳରେ ତାର ମୃତ୍ୟୁ ଘଟିଥିଲା ।
ସନାଧରର ମୃତ୍ୟୁ ପରେ ପରିବାର ଲୋକେ ଡାବୁଗାଁ ଥାନାରେ ଏତଲା ଦେଇଥିଲେ । ପରେ ପୋଲିସ ମୃତଦେହ ଜବତ କରିବା ସହ ଏକ ଅପମୃତ୍ୟୁ ମାମଲା ରୁଜୁ କରି ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଥିଲେ ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
